އިނގިރޭސިވިލާތުގައި ކްލައިމެޓް އެކްޓިވިސްޓުން ކުރަމުންދާ މުޒާހަރާތައް ހުއްޓުވުމަށް މަސައްކަތް ފަށާފައިވާކަން އެ ގައުމުން ހަމާކޮށްފިއެވެ،
އެ ގައުމުގެ ހޯމް ސެކްރެޓްރީ ސުއެލާ ބްރެވަމެން ވިދާޅުވީ އެ މުޒާހަރާތައް ކޮންޓްރޯލް ކުރުމަށް އެހީތެރިވުމަށް ފުލުހުންނަށް އިތުރު ބާރުތަކެއް ދިނުމަށް ނިންމާފައިވާ ކަަމަށެވެ. މި ފިޔަވަޅުތައް އެންމެ ބޮޑަށް އަމާޒުވަނީ އެންވައިރަމެންޓަލް ގްރޫޕްތަކަށް ކަމަށް މީޑިއާ ރިޕޯޓްތައް ބުނެއެވެ. ހޯމް ސެކްރެޓްރީ ވަނީ މުޒާހަރާގެ ބައެއް ބައިވެރިން ތަންތަނަށް ގެއްލުން ދޭ ކަމަށާއި އެއީ އިންސާނީ ހައްގެއްކަމަށް ބަލައި ނުގަންނަ ކަމަށް ވިދާޅުވެފައެވެ. އަދި މި އަމަލުތަކުގެ ސަބަބުން ފުލުހުންގެ ވަސީލަތްތައް ބޭކާރުވާ ކަމަށް ވެސް އޭނާ ވަނީ ފާހަގަކުރައްވާފައެވެ.
އިނގިރޭސިވިލާތުގައި ކުރިއަށްދާ މުޒާހަރާތަކަކީ ދިރިއުޅުމުގެ އަގު މައްޗަށް ދިއުމާއި ތިމާވެށީގެ ހާލަތާއި ގުޅިގެން ކުރިއަށް ގެންދާ މުޒާހަރާތަކެކެވެ. "އިނަފް އިޒް އިނަފް" ގެ ނަމުގައި ކެމްޕެއިން އެއް ފަށާ، އާއްމުން ދަނީ އެކަމާއި މެދު އަޑު އުފުލަމުންނެވެ. އަދި ހަކަތައިގެ އަގު އުފުލޭތީ އެކަމާއި މެދު މުޒާހަރާގެ ބައިވެރިން ދަނީ ހިތްހަމަނުޖެހުން ފާޅުކުރަމުންނެވެ. އެތައް ހާސް ބަޔަކު ބައިވެރިވާ މި މުޒާހަރާތަކުގެ ތެރެއިން އެތައް ބަޔަކު ހައްޔަރުވެސްކޮށްފައިވެއެވެ.
