ވޯލްޑްކަޕަށް ގާތްގަނޑަކަށް މަހެއް: ޤަތަރުގެ އިންސާނީ ޙައްޤުތަކާ މެދު ބޮޑެތި ސުވާލުތަކެއް!

ދުނިޔޭގެ ތައްޓަށް ކުޅޭ އެންމެ ވަރުގަދަ ފުޓުބޯޅަ މުބާރާތް އެ ޤައުމުގައި ފެށުމަށް ދޮޅުމަހެއްހަށްވުރެ ވެސް ކުޑަ ދުވަސްކޮޅަކަށް ވެފައި ވަނިކޮށް، ޤަތަރުގެ މަސައްކަތްތެރިންގެ ޙައްޤުތައް ކަށަވަރު ކުރުމުގައި އެ ޤައުމުން ގެނެސްފައިވާ އިސްލާހީ ބަދަލުތައް، ކައުންސިލް އޮފް ޔޫރަޕްސް ޕާލަމެންޓްރީ އެސެމްބްލީއިން މުރާޖާކޮށްފިއެވެ.

ދުނިޔޭގެ އެކި ކަންކޮޅުތަކުން ޤަތަރަށް ހިޖުރަކޮށްގެން މަސައްކަތް ކުރާ މީހުންގެ ޙައްޤުތައް ކަށަވަރު ކުރުމުގައި ޤަތަރުގައި އިހުމާލުތަކެއް ހުރި ކަމަށް ބުނެ، އިންސާނީ ޙައްޤުތަކަށް ވަކާލާތު ކުރާ ގިނަ ޖަމާއަތްތަކެއްގެ ފާޑުކިއުންތައް، ޤަތަރު ސަރުކާރަށް ވަނީ އަމާޒު ވެފައެވެ.

ކަން މިހެން އޮތް އިރު، މަސައްކަތްތެރިންގެ ޙައްޤުތައް ކަށަވަރުކޮށް، އަދިވެސް އިތުރު ނަތީޖާތަކެއް ނެރޭ މަންޒަރު، ޤަތަރުން ފެންނަން ޖެހޭ ކަމަށް ކައުންސިލް އޮފް ޔޫރަޕްސް ޕާލަމެންޓްރީ އެސެމްބްލީއިންވަނީ ބުނެފައެވެ.

ކައުންސިލް އޮފް ޔޫރަޕްސް ޕާލަމެންޓްރީ އެސެމްބްލީގައި ކުރިއަށް ދިޔަ އަޑުއެހުމުގައި ޤަތަރު ތަމްސީލު ކުރެއްވީ ޤަތަރުގެ ސުޕްރީމް ކޮމިޓީ ފޮރ ޑެލިވަރީ އެންޑް ލެގަސީގެ ސީނިއަރ އެޑްވައިޒަރ ފޮރ ވަރކާޒް ވެލްފެއަރ އެންޑް ލޭބަރ ރައިޓްސް، މަޙްމޫދު ޤުތޫބުއެވެ. އަޑުއެހުމުގައި ޤަތަރުގެ ދިފާޢުގައި ވާހަކަ ކުރިއަށް ގެންދަވަމުން ޤުތޫބު ވިދާޅުވީ، މަސައްކަތްތެރިންނަށް ކުރިމަތިލާން ޖެހޭ ތަކުލީފުތަކުގެ ވާހަކަތައް، އެއްވެސް ބިރަކާ ނުލާ ހިއްސާ ކުރުމުގެ އިންތިޒާމްތައް ހަމަޖައްސާފައި ވާނެ ކަމަށާއި، މަސައްކަތްތެރިންގެ ޙައްޤުތައް ކަށަވަރު ކުރާނެ އާ މިންގަނޑުތަކެއްވެސް ތަޢާރަފު ކޮށްފައި ވާނެ ކަމަށެވެ.

ނޯވޭގެ ފުޓުބޯޅަ އެސޯސިއޭޝަންގެ އިސްވެރިޔާ ލީއްޒަ ކްލާވަނަސް ވަނީ، ޤަތަރުން އަދިވެސް ރިޢާޔަތް ކުރަން ޖެހޭ މައްސަލަތަކެއް އެބަހުރި ކަން ފާހަގަކޮށްފައެވެ. އެގޮތުން ބަޔާންކޮށްދޭން ނޭނގޭ ގޮތަށް މަރުވެފައިވާ މަސައްކަތްތެރިންގެ މަރުގެ ކޭސްތައް މިނިވަންކަމާއެކު ތަޙުޤީގު ކުރުން ފަދަ ކަންކަން ހިމެނޭ ކަމަށެވެ.

ޤަތަރަކީ ވޯލްޑްކަޕް ފުޓުބޯޅަ މުބާރާތެއް، މެދުއިރުމަތީގައި ހޮސްޓް ކުރާ ފުރަތަމަ ޤައުމެވެ.

2.8 މިލިއަން މީހުންގެ އާބާދީއެއް އޮތް ޤަތަރުގެ އާބާދީގެ ބޮޑުބައެއް ހިއްސާ ކުރަނީ ހިޖުރަވެރި މަސައްކަތްތެރިންނާއި އެ ނޫންވެސް ބިދޭސީންނެވެ. މަސްދުވަހުގެ މުއްދަތަށް ދެމިގެންދާ ވޯލްޑްކަޕް ފުޓުބޯޅަ މުބާރާތާ ދިމާކޮށް 1.2 މިލިއަނެއްހާ މީހުން ޤަތަރަށް ޒިޔާރަތް ކުރާނެ ކަމަށް އަންދާޒާ ކުރެވޭ އިރު، އެ މުބާރާތައް ތައްޔާރު ވުމުގެ ގޮތުން ޤަތަރުން ދަނީ ވަގުތީ މުވައްޒަފުންގެ ގޮތުގައި، ދުނިޔޭގެ އެކި ކަންކޮޅުތަކުން އެތައް ހާސް މުވައްޒަފުންނެއް ރެކްރޫޓު ކުރަމުންނެވެ.