މި މަހުގެ 5 ވަނަ ދުވަހު އއ. މާޅޮހުގެ ދެކުނުން ބަންޑުން ޖަހާލި ލޯންޗުން ގެއްލިގެން ހޯދަމުންދާ މުހައްމަދު މިންހާޖު ގެއްލުނު ހާދިސާގައި އޭނާއާއި އިތުރު މީހަކު ކުރަމުންދިޔަ ދަތުރާ ބެހޭގޮތުން ލިބެމުންދާ މައުލޫމާތަކީ ތެދު މައުލޫމާތެއް ނޫންކަމަށް، ޗީފް ސުޕްރިޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވެއްޖެއެވެ.

ލޯންޗު ބަންޑުން ޖަހާލި ހާދިސާގައި ކުރި ދަތުރާ ގުޅޭގޮތުން، މި ހާދިސާގައި ސަލާމަތްވެ އއ. ފެރިދޫއަށް އެރި އަލީ އަހްމަދުގެ ފަރާތުން ސާފުކުރަންޖެހޭ މައުލޫމާތު ސާފުކޮށްފައިވާކަމަށް ބަޝީރު ވިދާޅުވިއެވެ. އެހެންނަމަވެސް އޭނާގެ ފަރާތުން ދަތުރާ ގުޅިގެން ލިބެމުންދާ މައުލޫމާތަކީ ތެދު މައުލޫމާތެއް ނޫންކަމަށް ބަޝީރު ވިދާޅުވިއެވެ.

އެގޮތުން އެމީހުން ނުކުމެ އުޅުނީ މަހަށްކަމަށާއި، ލޯންޗު ބަންޑުންޖަހާލިއިރުވެސް އޭނާއާއެކު ގެއްލިގެން ހޯދަމުންދާ މުހައްމަދު މިންހާޖް ކަނޑުގައި އުޅުނުކަމަށް އަހްމަދު މައުލޫމާތު ދީފައިވާކަމަށް ބަޝީރު ވިދާޅުވިއެވެ. އަދި ރޭގަނޑުވުމުން އަހްމަދަށް މިންހާޖް ގެއްލުނީ ކަމަށް ބުނެފައިވާކަން ބަޝީރު ފާހަގަކުރެއްވިއެވެ. ލޯންޗުން ވަރަށް ގިނަ މިންވަރަކަށް ތެޔޮ ފެނިފައިވާކަމަށްވެސް ބަޝީރު ވިދާޅުވިއެވެ.

މި މައުލޫމާތުތަކަށް ބަލާއިރު، މިއީ ތެދު މައުލޫމާތު ނޫންކަން ފާހަގަކުރެވިފައިވާ ކަމަށާއި، އެ ދެމީހުންނަކީވެސް މަސްތުވާތަކެތީގެ ރިކޯޑް އޮތް ދެމީހުންކަމަށް ބަޝީރު ވިދާޅުވިއެވެ.

މިންހާޖް ހޯދުމަށް ކުރަމުންދާ މަސައްކަތުގެ ދަށުން، އދ. ހަންޏާމީދޫގެ ދެކުނު ކަނޑުއޮޅިން (އދ އަތޮޅު އިރުމަތިން) ފެށިގެން އަތޮޅުގެ ހުޅަނގަށް ވާގޮތަށް 87.6 ކޮޑިމޭލުގެ ސަރަހައްދެއް ވަނީ ބަލާފައެވެ. އަދި އއ. މާޅޮހު ފަޅުގައި އޮތް، ބަންޑުންޖަހާލި ލޯންޗު އާދިއްތަ ދުވަހު 13:30 އެހާކަންހާއިރު ކަފުޖަހައިގެން ހިމަންދޫއަށް ގެންގޮސްފައިވާ ކަމަށް ފުލުހުން ބުނެފައިވެއެވެ.

މި މަހުގެ 7 ވަނަ ދުވަހު ހިނގި މި ހާދިސާއާ ގުޅިގެން ފުލުހުންނާއި ސިފައިން ވަނީ ކަނޑުމަތީގެ އޮޕަރޭޝަނެއް، ވައިގެ މަގުންވެސް ހިންގާފައެވެ. މި މަސައްކަތް ހުއްޓާލާފައިވަނީ ކަނޑު މަގުންނާއި ވައިގެ މަގުން ބޮޑު ސަރަހައްދެއް ބެލުމަށްފަހު، މިދިޔަ އަންގާރަ ދުވަހުއެވެ.