ތުރީޑީ ޕްރިންޓެޑް "ގެރި މަސް" ތައްޔާރު ކުރަނީ ސޯއީ، ޕީޒް ޕްރޮޓީންސް، ސަނާމުގު، ބީޓްރޫޓް، ނިއުޓްރިޝަނަލް ޔީސްޓް އަދި ކާށި ސަރުބީ ބޭނުންކޮށްގެން
ހާހެއްހާ ރެސްޓޯރަންޓުން މިހާރުވެސް ދަނީ ރީޑިފައިން މީޓުން ޕްރިންޓްކުރާ 2 ޕައުންޑް ސްޓޭކަށް، 40 ޑޮލަރު ދެމުން
ވަކިން ޚާއްސަކޮށް ހުޅަނގުގެ ބާރުތަކުން ފަތުރަމުންދާ ނުފޫޒާއެކު، ބައެއް މީހުންގެ ކެއިން ބުއިމުގެ އާދަތަކަށްވެސް ވަނީ ބަދަލު އައިސްފައެވެ. މި މޭރުމުން އެންމެ މަޝްހޫރުވަމުންދާ އެއް ޓްރެންޑަކީ ޖަނަވާރާއި ޖަނަވާރުގެ އެކި ބައިތައް ބޭނުންކޮށްގެން އުފައްދާ އެކި ކަހަލަ ބާވަތްތައް ކެއުމުން އިސްތިސްނާވެ، ގަސްގަހާގެހީގެ ބައިތަކުން އުފައްދާ ބާވަތްތަކަށް ބަރޯސާވުމެވެ. ނުވަތަ "ވީގަން"އަކަށް ވުމެވެ. އެފަދަ ގޮތަކަށް ކެއިންބުއިމުގެ އާދަތައް ބަދަލުކުރިކަމުގައި ވީނަމަވެސް، ޖަނަވާރުގެ މަހުގެ އުފެއްދުންތަކަށް ނަފްސު އެދި ގޮވާ ގޮވުންތައް މަދުނުވުމުގެ ނަތީޖާއެއްގެ ގޮތުން، ޒަމާނީ ޓެކްނޮލޮޖީގެ އެހީގައި، ޖަނަވާރުގެ މަހުގެ އުފެއްދުންތަކާ ވީހާވެސް އެއްގޮތަށް ވީގަން ކާނާގެ ބާވަތްތައް ތައްޔާރުކުރުމުގެ އޮއިވަރު މިހާރު ދަނީ ގަދަވަމުންނެވެ.
އެފަދަ އެއް ކުންފުންޏަކީ އިޒްރޭލުގެ ރީޑިފައިން މީޓްއެވެ. ރީޑިފައިން މީޓް ކުންފުނިން މިހާރު ވަނީ ތުރީޑީ ޕްރިންޓިންގް ޓެކްނޮލޮޖީގެ އެހީގައި ތައްޔާރުކުރާ "ގެރި މަސް"، ފުޅާ ދާއިރާއެއްގައި ވިލާތަށް އެކްސްޕޯޓް ކުރުމުގެ އެއްބަސްވުމެއް އެކުލަވާލާފައެވެ. އެ ކުންފުނީގެ ކާރުޚާނާއެއް ނެދަލަންޑްސްގައިވެސް މިހާރު ވަނީ ހުޅުވާފައެވެ.
ކުންފުނީގެ ތުރީޑީ މަޝްރޫއާބެހޭގޮތުން ވާހަކަދައްކަމުން މެނޭޖަރު ޔާރޯން އިޝެލް ވަނީ މަސައްކަތް ކުރިއަށްދާ ގޮތް ތަފްސީލުކޮށްދީފައެވެ.
ރީޑިފައިން މީޓް ކުންފުނިން މަސްނޫއީ ތުރީޑީ ޕްރިންޓަޑް "ގެރި މަސް" ތައްޔާރުކުރަނީ ސޯއީއާއި ޕީޒް ޕްރޮޓީންސްގެ އިތުރުން ސަނާ މުގާއި، ބީޓްރޫޓް އަދި ނިއުޓްރިޝަނަލް ޔީސްޓްއާއި ކާށި ސަރުބީ ބޭނުންކޮށްގެންނެވެ.
ގަސްގަހާގެހީގެ ބާވަތްތައް ބޭނުންކޮށްގެން މަސް ތައްޔާރުކުރުމަކީ މި ފަހަކަށް އައިސް އިންތިހާއަށް ވައިގައި ހިފާފައިވާ ޓްރެންޑެކެވެ. ނަމަވެސް އަދުގެ ދުނިޔޭގެ ބާޒާރުތަކުގައި ތަކެތީގެ އަގު އިންތިހާއަށް އުފުލެމުން ދިއުމުގެ ސަބަބުން، އެ ޓްރެންޑަށް ފެތުނު ބައެއް މީހުން މިހާރު ވަނީ އަނެއްކާވެސް ހަގީގޯ އެއްގަމު މަސް ކާންފަށާފައެވެ.
ކަން މިހެން އޮތްނަމަވެސް ރީޑިފައިން މީޓްއިން އޮތީ ވަރުގަދަ އަޒުމެއްގައެވެ. ހާހެއްހާ ރެސްޓޯރަންޓުން މިހާރުވެސް ދަނީ ރީޑިފައިން މީޓުން ޕްރިންޓްކުރާ 2 ޕައުންޑް ސްޓޭކަށް، 40 ޑޮލަރު ދެމުންނެވެ.
