އެޗްއާރުސީއެމުން ގުރައިދޫ މަރުކަޒާ ގުޅޭގޮތުން ނެރުނު ރިޕޯޓާ ގުޅިގެން އަޅަން ޖެހޭ ފިޔަވަޅުތައް ވަނީ އަޅާފައި: ސަރުކާރު

ކ. ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒާ ގުޅޭގޮތުން ހިޔުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ނެރެފައިވާ ރިޕޯޓުގައިވާ ކަންކަމާ ގުޅިގެން އަޅަން ޖެހޭ ފިޔަވަޅުތައް އަޅާފައިވާ ކަމަށް ސަރުކާރުން ބުނެފިއެވެ.

ބުރާސްފަތި ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި އެ އޮފީހުގެ ތަރުޖަމާނު، މިއުވާން މުޙައްމަދު މިފަދައިން ވިދާޅުވީ މިދިޔަ ސެޕްޓެމްބަރު މަހު އެޗްއާރުސީއެމުން ނެރުނު ރިޕޯޓުގައި ހާއްސަ އެހީއަށް ބޭނުންވާ މީހުންގެ މަރުކަޒުގައި ހުރި މައްސަލަތައް ފާހަގަކުރުމާ ގުޅިގެންނެވެ. މިއުވާން ފާހަގަކުރެއްވި ގޮތުގައި މި ރިޕޯޓަކީ އެޗްއާރުސީއެމުން މި އަހަރުގެ މާޗު މަހުގެ ކުރީ ކޮޅު އެ މަރުކަޒަށް ކުރެއްވި ޒިޔާރަތާ ގުޅޭ ރިޕޯޓެއް ކަމަށެވެ. އަދި އެ އިދާރާއަށް ފާހަގަކުރެވުނު ކަންކަން ހިއްސާ ކުރުމުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އިން އެކަންކަމާމެދު ވަގުތުން ފިޔަވަޅު އަޅާފައިވާނެ ކަމަށް ވެސް އޭނާ ވިދާޅުވިއެވެ.

މީގެ އިތުރުން އެޗްއާރުސީއެމްގެ އެ ރިޕޯޓުގައި ފާހަގަކޮށްފައިވާ ކަންކަމަކީ މިހާރުގެ ހާލަތު އޮތްގޮތް ކަމަށް ނުބެލެވޭނެ ކަމަށް ވެސް މިއުވާން ވިދާޅުވިއެވެ.

އެޗްއާރުސީއެމް އިން ނެރެފައިވާ ރިޕޯޓުގައި ވެސް ވަނީ މިއީ އެ އިދާރާއިން މިއަހަރުގެ މާޗު މަަހުގެ 6-8 އަށް ގުރައިދޫގައި ހުންނަ ހާއްސަ އެހީއަށް ބޭނުންވާ މީހުންގެ މަރުކަޒަށް ކުރި ޒިޔާރަތެއްގައި ފާހަގަކުރެވުނު ކަންކަން ކަމަށް ބުނެފައެވެ. އޭގެ ތެރޭގައި ހިމެނޭ ބައެއް ކަނަކް 2008 ވަނަ އަހަރުން ފެށިގެން ރަނގަޅު ކުރަން އަންގާފައިވާ ކަމަށް ވެސް އެ އިދާރާއިން ވަނީ ބުނެފައެވެ.

އެ އިދާރާގެ ރިޕޯޓުގައި މައިގަނޑު ހަ ކަމެއް އިސްލާހު ކުރަން އަންގައިފައެވެ. އެގޮތުން، ކެއަރވޯކަރުންގެ މަސައްކަތްތަކާއި ބަލި މީހުންގެ ކަންކަން ބެލުމަށް މަރުކަޒުން ކަނޑައަޅާ އުސޫލެއްގެ މަތިން ސުޕަވައިޒަރުން ވޯޑުތަކަށް ޒިޔާރަތްކޮށް، ލިޔެކިޔުންތައް ބެލެހެއްޓުމާއި މަރުކަޒުގައި މަސައްކަތް ކުރާ ހުރިހާ މުވައްޒަފުންނަށް "އެންޓީ ޓޯޗާ" ތަމްރީންތައް ދިނުމާއި މަރުކަޒުން ބަލަހައްޓާ މީހުން، އެކަކު އަނެކަކަށް ކުރާ ޖިންސީ ފުރައްސާރައާއި ޖިންސީ ގޯނާގެ އަމަލުތައް ހުއްޓުވާނެ ނިޒާމެއް ހަމަޖައްސައި ފިޔަވަޅު އެޅުން ހިމެނެއެވެ.

މީގެ އިތުރުން ފަރުވާ ދޭން ބޭނުންވާ މުހިންމު ސިއްޙީ އާލާތްތައް ހޯދުމާއި ސްޕެޝަލިސްޓް ޑޮކްޓަރުންނަށް ދެއްކުމަށް ލަފާ ދޭ ބަލި މީހުން އަވަހަށް ޑޮކްޓަރަށް ދެއްކޭ އިންތިޒާމު ހަމަޖެއްސުމާއި ފަރުވާ ހޯދާ މީހުންގެ ވޯޑުތަކުގެ އެތެރެ މޮނިޓަރ ކުރެވޭ ގޮތަށް ސީސީޓީވީ ހަރުކުރުމާއި އެކަންކަން މޮނިޓަރ ކުރުމަށް ވެސް އެޗްއާރުސީއެމުން ވަނީ އަންގައިފައެވެ.