ރާއްޖެއިން ނަގާފައިވާ ލޯނުތައް އަނބުރާ ދެއްކުމުގައި ދައްޗެއް އަންނާނެ ކަމަށް ބެލެވެނީ 2026ގައި، އެހެންނަމަވެސް ލޯނު ނުދެއްކޭ ހާލަތެއް ނެތް: އަމީރު
2026ށް ދާއިރު އެ ފަންޑުގައި 600 މިލިއަން ޑޮލަރާ ކައިރިކުރާ އަދަދެއް ހުންނާނެކަމަށް ލަފާކުރެވޭ
ފިނޭންސް މިނިސްޓަރ އަމީރު
ލޯނު އަނބުރާ ދެއްކުމުގެ ދައްޗެއް އަންނާނެކަމަށް ބެލެވެނީ 2026ގައި ކަމަށާއި، ދުރާލައި ތައްޔާރުވެގެން އެކަމުން އަަރައިގަނެވޭނެކަމުގެ ޔަގީންކަން އެބައޮތްކަަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅުދައްކަވަމުން، ރާއްޖޭގެ އިގްތިސާދީ ހާލަތާމެދު ވާހަކަފުޅުދައްކަވަމުން އަމީރު ވިދާޅުވީ، ދުނިޔޭގެ އިގްތިސާދުގެ ހާލަތު ދަށަށް ދިޔަނަމަވެސް ރާއްޖެއިން ނަގާފައިވާ ލޯނުތައް ނުދެއްކޭނެފަދަ ހާލަތެއް އޮތްކަމަށް ލަފާނުކުރެވޭ ކަމަށެވެ. ރާއްޖެޓީވީން ދެންނެވި ސުވާލަކަށް ޖަވާބުދެއްވަމުން އަމީރު ވިދާޅުވީ އައިއެމްއެފްއާއި ވޯލްޑް ބޭންކްފަދަ ތަންތަނުން ނެރެފައިވާ ރިޕޯޓްތަކުން، ރާއްޖެއިން ނަގާފައިވާ ލޯނުތަކުން ކުރު ރާސްތާގައި ގެއްލުމެއް ނުވާނެކަން އެނގެން އެބައޮތްކަަމަށެވެ.
މީގެ އިތުރުން ރާއްޖޭގެ ސޮވަރިން ޑިވެލޮޕްމެންޓް ފަންޑު އިތުރަށް ބޮޑުވެގެން ދާނެކަމަށާއި، 2026ށް ދާއިރު އެ ފަންޑުގައި 600 މިލިއަން ޑޮލަރާ ކައިރިކުރާ އަދަދެއް ހުންނާނެކަމަށް ބެލެވޭކަމަށް އަމީރު ވިދާޅުވިއެވެ.
މި ސަރުކާރު އައުމަށްފަހު ސޮއިކޮށްފައިވާ ލޯނު އެއްބަސްވުންތަކަކީ ނިސްބަތުން ލުއި އެއްބަސްވުންތަކެއްކަމަށް މީގެ ކުރިން ފިނޭންސް މިނިސްޓަރ އަމީރު ވަނީ ފާހަގަކުރައްވާފައެވެ. އަދި އެ ލޯނުތަކުގެ އިންޓްރަސްޓް ރޭޓުތައްވެސް ނިސްބަތުން ކުޑަކަމަށް އަމީރު ވިދާޅުވިއެވެ. ހަމައެހެންމެ މިހާރު ނަގާފައިވާ ލޯނުތަކުގައި ލޯނު ދައްކަންޖެހޭ މުއްދަތުވެސް ދިގުކަމަށް މިނިސްޓަރު ވިދާޅުވިއެވެ.
ފިނޭންސް މިނިސްޓްރީން ވަނީ މީގެ ކުރިން ދުނިޔޭގެ އިގުތިސާދަށް ކުރަމުންދާ ނޭދެވޭ އަސަރު ރާއްޖެއަށްވެސް ކުރަމުންދާކަން ފާހަަގަކޮށްފައެވެ. އަދި ރާއްޖެއަށްވެސް އިގްތިސާދުގައި ދައުރުވާ ފައިސާ މަދުވުމުގެ މައްސަލަ ކުރިމަތިވެފައިވާ ކަމަށާއި، އޭގެ ސަބަބުން ކޭޝްފްލޯ މެނޭޖްކޮށް، ޕަބްލިކް ސެކްޓަރު އިންވެސްޓްމެންޓްތައް މަޑުޖައްސާލުމުގެ ސިޔާސަތުތަކެއް ސަރުކާރުން ވަނީ ގެންގުޅެފައެވެ.
