ދަނޑުވެރިންގެ ދުވަހާއި ގުޅިގެން ދަނޑުވެރިންނަށް ޚާއްސަ ވޯކްޝޮޕެއް
މިއީ ތިން ދުވަހުގެ މުއްދަތަށް ކުރިއަށްގެންދާ ވޯކްޝޮޕެއް
ވޯކްޝޮޕްގައި ބައިވެރިވާ ދަނޑުވެރިން
މިއަހަރުގެ ދަނޑުވެރިންގެ ދުވަހާއި ގުޅިގެން ދަނޑުވެރިންނަށް ޚާއްސަ ވޯކްޝޮޕެއް ފަށައިފިއެވެ.
ތިން ދުވަހުގެ މުއްދަތަށް ކުރިއަށްގެންދާ ވޯކްޝޮޕް މިމަހުގެ 12 ވަނަ ދުވަހު ފަށާފައިވަނީ ކ. ކާށިދޫގައެވެ. މި ވޯކްޝޮޕް ހުޅުވުމުގެ ރަސްމިއްޔާތު އިފްތިތާޙު ކޮށްދެއްވާފައި ވަނީ މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުގެ ޑެޕިއުޓީ މިނިސްޓަރު އަހުމަދް ނާސިރު އެވެ.
މި ވޯކްޝޮޕް ހުޅުވައި ދެއްވަމުން ޑެޕިއުޓީ މިނިސްޓަރު ދެއްކެވި ވާހަކަފުޅުގައި ދަނޑުވެރިކަން ކުރުމުގައި ދިމާވާ ތަފާތު އެކި މައްސަލަތައް ފާހަގަކޮށް އެ މައްސަލަތަކަށް ހައްލު ހޯދުމަށް ދަނޑުވެރިކަމުގެ ތަމްރީނު އުނގެނުމުގެ މުހިންމުކަން ފާހަގަކުރެއްވިއެވެ. މިގޮތުން އަމިއްލަ ގޭބިސީތަކުން ލިބެން ހުންނަ އެއްޗެހި ބޭނުންކޮށްގެން ގަސްތަކަށް ދިމާވާ ތަފާތު ބަލިތަކުން އަރައިގަންނާނެ ގޮތްތައް ދަސްކުރުމުގެ އިތުރުން ސަރުކާރުގެ އެކި މުއައްސަސާތައް މެދުވެރިކޮށް ދަނޑުވެރިންނަށް ފޯރުކޮށްދޭ ޚިދުމަތްތަކުގެ ބޭނުންތައް އެންމެ ފުރިހަމަ ގޮތުގައި ހިފައިގެން ދަނޑުވެރިކަން ކުރިއެރުވުމަށް ޑެޕިއުޓީ މިނިސްޓަރު ވަނީ ދަނޑުވެރިންނަށް އިލްތިމާސް ކުރައްވާފައެވެ.
29 ދަނޑުވެރިންގެ ބައިވެރިވުމާއެކު ކުރިއަށް ގެންދާ މި ވޯކްޝޮޕްގެ ފުރަތަމަ ދުވަހުގައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުގެ ފަރާތުން ދަނޑުވެރިކަން ތަރައްޤީކުރުމުގެ އިތުރުން ދަނޑުވެރިން ހޭލުންތެރިކުރުމަށް ކުރިއަށްގެންދާ ތަފާތު އެކި ޕްރޮގްރާމްތަކުގެ މައުލޫމާތު ދީފައިވެއެވެ. މީގެ އިތުރުން ދަނޑުވެރިކަމުގައި އާންމުގޮތެއްގައި ދިމާވާ ބަލިތަކާއި ތިމާވެއްޓަށް އަންނަ ބަދަލުތަކުގެ ސަބަބުން ދަނޑުވެރިކަމަށް ކުރިމަތިވާ ގޮންޖެހުންތަކުން އަރައިގަންނާނެ ގޮތުގެ މައުލޫމާތުގެ އިތުރުން ގަސްތަކަށްޖެހޭ ބަލިތަކާއި ގުޅޭ ފަންނީ މައުލޫމާތުތައް ފޯރުކޮށް ދިނުމަށް ވަނީ ހަމަޖެހިފައެވެ. އަދި މިނިސްޓްރީ އާއި ވޯލްޑް ބޭންކާ ގުޅިގެން ކުރިއަށް ގެންދާ ސަސްޓެއިނަބްލް ފިޝަރީޒް ރިސޯސަސް ޑިވެލޮޕްމެންޓް ޕްރޮޖެކްޓް (އެސްއެފްއާރްޑީޕީ)ގެ ދަށުން ދަނޑުވެރިކަމަށް ޕްލޭން ކޮށް، އިންވެސްޓު ކުރުމުގެ އިތުރުން އިންވެސްޓު ކުރުމަށް ރާއްޖެއިން ލިބެން ހުރި ފުރުސަތުތައް ދަނޑުވެރިންނާއި ހިއްސާ ކުރުމަށް ވަނީ ނިންމާފައެވެ.
އަދި އެސްއެމްއީ ޑިވެލޮޕްމެންޓް ފައިނޭންންސް ކޯޕަރޭޝަން (އެސްޑީއެފްސީ)ގެ ފަރާތުން ދައުލަތުން ދަނޑުވެރިންނަށް ފޯރުކޮށްދޭ 'ދަނޑުވެރި ނަފާ' ލޯނުގެ މައުލޫމާތު ދިނުމުގެ އިތުރުން އެސްޑީއެފްސީގެ ފަރާތުން ދެވޭ ޚިދުމަތްތަކާއި ލޯނަށް އެދުމަށް ކަންކުރަންވީ ގޮތުގެ މައުލޫމާތު ދިނުންވެސް މި ވޯކްޝޮޕްގައި ކުރިއަށް ގެންދާނެއެވެ.
ބިޒްނަސް ކޯޕަރޭޝަން ސެންޓަރު (ބީސީސީ)ގެ ފަރާތުން އެ ކޯޕަރޭޝަން މެދުވެރިކޮށް ލިބެންހުރި ފުރުސަތަތަކުގެ އިތުރުން ވެލިއު އެޑިޝަންގެ މުޙިންމު ކަމާއި ބެހޭގޮތުން މައުލޫމާތު ދިނުމުގެ އިތުރުން އިކޮނޮމިކް މިނިސްޓްރީގެ ފަރާތުން އިންޕޯޓް ޓެރިފް ރެޖީމަށް އިސްލާހު ގެނައުމަށް އެ މިނިސްޓްރީގެ ފަރާތުން ކުރަމުން ގެންދާ މަސައްކަތްތަކާއި، އެ ބަދަލުތައް ގެނައުމަށް ކުރިމަތިވާ ގޮންޖެހުންތަކުގެ މައުލޫމާތުވެސް ދަނޑުވެރިންނާއި ހިއްސާކުރާނެއެވެ.
މީގެ އިތުރުން މޫސުމީ މައްސަލަތަކުގެ ސަބަބުން ދަނޑުވެރިންނަށް ކުރިމަތިވާ ގޮންޖެހުންތަކުގައި އެހީތެރިކަން ފޯރުކޮށްދިނުމަށް އަޔާދީ ތަކަފުލްއިން މިހާރު އެކުލަވާލަމުންދާ އިންޝުއަރެންސް ސްކީމްއާއި ގުޅޭ މައުލޫމާތުތައްވެސް މި ވޯކްޝޮޕްގެ ތެރެއިން ކާށިދޫގެ ދަނޑުވެރިންނާއި ހިއްސާކުރެވިގެންދާނެއެވެ.
