މިދިޔަ މަހާ އަޅައިބަލާއިރު މި މަހުގެ މިހާތަނަށް ޑެންގީ ހުން ޖެހިގެން ރިޕޯޓްކުރެވޭ މިންވަރު އިތުރު: އެޗްޕީއޭ
މިއަހަރުގެ އޭޕްރިލް މަހުން ފެށިގެން މިހާތަނަށް، މާލެއާއި އަތޮޅުތަކުން ޑެންގީ ހުން ޖެހިގެން ރިޕޯޓް ކުރެވެމުންދާ އަދަދުވެސް އިތުރު
ޑެންގީއަކީ ސާފު ފެނުގައި އުފެދޭ އީޑިސް މަދިރީގެ ސަބަބުން ފެތުރޭ ބައްޔެއް
މިދިޔަ ސެޕްޓެމްބަރު މަހާ އަޅައިބަލާއިރު މި މަހުގެ މިހާތަނަށް ޑެންގީ ހުން ޖެހިގެން ރިޕޯޓް ކުރެވުނު މިންވަރު އިތުރު ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
ބުދަ ދުވަހު ނެރުނު ނޫސްބަޔާނެއްގައި އެޗްޕީއޭއިން ބުނީ މިއަހަރުގެ އޭޕްރިލް މަހުން ފެށިގެން މިހާތަނަށް މާލެއާއި އަތޮޅުތަކުން ޑެންގީހުން ޖެހިގެން ރިޕޯޓް ކުރެވެމުންދާ އަދަދުވެސް އިތުރުވެފައިވާކަމަށެވެ.
އާންމު ގޮތެއްގައި ކޮންމެ އަހަރަކުވެސް ވިއްސާރަ މޫސުމާ ގުޅިގެން ޑެންގީ އުޅޭ ނިސްބަތް އިތުރުވެގެންދާ ކަމަށާއި، މި އަހަރަކީ ގިނައިން ވިއްސާރަކުރި އަހަރަކަށްވެފައި، މިހާރުވެސް ކުރަމުންދާ ވިއްސާރައާ ގުޅިގެން މަދިރި އާލާވެ އިތުރުވުން ކުރިއަށް އޮތްތަނުގައި ގިނަކަމަށް ބެލެވޭ ކަމަށްވެސް އެޗްޕީއޭއިން ބުނެއެވެ.
ޑެންގީއަކީ ސާފު ފެނުގައި އުފެދޭ އީޑިސް މަދިރީގެ ސަބަބުން ފެތުރޭ ބައްޔަކަށްވުމުން މި ބަލިން ރައްކާތެރިވުމަށްޓަކައި، މަދިރި އުފެދި އާލާވާ ތަންތަން ނައްތާލުމާއި މަދިރި ހެފުން މަދުކުރުމަށްޓަކައި ރައްކާތެރިކަމުގެ ފިޔަވަޅުތައް އެޅުމަށް ވަނީ އިލްތިމާސްކޮށްފައެވެ.
މަދިރިން ރައްކާތެރިވުމުގެ ގޮތުން ހަޑިގަނޑު ރަނގަޅަށް ނިވާވާގޮތަށް ހެދުން އެޅުމާއި، މަދިރި ލޯޝަނާއި މޮސްކިޓޯ ރެޕެލެންޓް ބޭނުންކުރުމާއި، ފަތިސް ވަގުތާއި ހަވީރުގެ ވަގުތުގައި ގޭގެ ދޮރުތައް ލައްޕާފައި ބެހެއްޓުމަކީ ކުރެވިދާނެ ކަންކަންކަމަށް އެޗްޕީއޭއިން ވަނީ ބުނެފައެވެ.
މީގެ އިތުރުން ހުސް ފުޅިއާއި ދަޅުފަދަ ތަކެތި، ގޯތި ތެރެއާއި މަގުމައްޗަށް އުކާލުމަކީ އެފަދަ ތަކެތީގައި ފެން ހަރުލައި މަދިރި ބިސް އަޅައި އާލާވުމަށް މަގުފަހިވާނެ ކަމެއް ކަމަށާއި، އެފަދަ ކަންކަން ނުކުރުމަށްވެސް ވަނީ އިލްތިމާސްކޮށްފައެވެ.
ޑެންގީ ހުން ޖެހިއްޖެ ހާލަތެއްގައި ގޭގައިވެސް ފަރުވާ ދެވޭނެއެވެ. އެގޮތުން، އަރާމުކުރުމާއި ގިނަގިނައިން ދިޔާއެއްޗެހި ބޭނުން ކުރުމާއި ޕެރެސެޓެމޯލް ބޭނުން ކުރުމަކީ ކުރެވިދާނެ ކަންކަންކަމަށް އެޗްޕީއޭއިން ބުނެއެވެ. ތިން ދުވަހަށްވުރެ ގިނަ ދުވަހަށް ހުން އައިސް މާބޮޑަށް ވަރު ދެރަވާނަމަ ޑޮކްޓަރެއްގެ ލަފާ ހޯދުން މުހިންމުކަމުގައިވެސް އެ އިދާރާއިން ބުނެއެވެ.
ޑެންގީ ހުން ޖެހުމުން، ހުންއައުމުގެ އިތުރަށް އެހެނިހެން ނުރައްކާތަކާ ކުރިމަތިވާކަމަށާއި، ޚާއްސަކޮށް ކުޑަކުދިންނާއި މާބަނޑުމީހުންނާއި އުމުރުން ދުވަސްވީ މީހުންނާއި ބައެއް ބޮޑެތި ބަލިތައް ހުންނަ މީހުންނަށް ޑެންގީގެ ނުރައްކާ ބޮޑުކަމަށް އެޗްޕީއޭއިން ބުނެއެވެ. އެފަދަ ނުރައްކާތެރި ހާލަތްތައް އަވަހަށް ދެނެގަނެ ފަރުވާ ނުފެށިއްޖެނަމަ ފުރާނައަށް ނުރައްކާވުން ވެސް އެކަށީގެންވެއެވެ.
ޑެންގީ ކޮންޓްރޯލް ކުރުމަށްޓަކައި އެންމެ މުހިއްމު އެއް ކަމަކީ ޑެންގީ ޖައްސައި އާލާވުމުން ހުއްޓުވުމެވެ. މިކަން ހާސިލްކުރެވޭނީ ލޯކަލް ކައުންސިލްތަކާއި، ސިއްހީ ޚިދުމަތްދޭ ފަރާތްތަކާއި، ކޮންސްޓްރަކްޝަން އަދި އެހެނިހެން އިންޑަސްޓްރިއަލް މަސައްކަތް ކުރާ ސައިޓްތައް ހިންގާ ފަރާތްތަކާއި، އާންމުން ފަރާތްތަކުގެ ބައިވެރިވުން މުހިންމު ކަމަށްވެސް އެޗްޕީއޭއިން ބުންޏެވެ.
