ނުރަސްމީ ދަތުރުފުޅެއްގައި ރައީސް ސިންގަޕޫރަށް
ރައީސްގެ ދަތުރުފުޅުގެ އިތުރު ތަފްސީލެއް ރައީސް އޮފީހުން ހާމަ ނުކުރައްވާ
ރައީސްގެ ދެކަނބަލުން މީގެ ކުރިން ސިންގަޕޫރަށް ކުރެއްވި ދަތުރުފުޅެއްގެ ތެރެއިން
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު، ސިންގަޕޫރަށް ކުރައްވާ ނުރަސްމީ ދަތުރުފުޅެއްގައި ފުރާވަޑައިގެންފިއެވެ.
ރައީސް ނުރަސްމީ ދަތުރުފުޅެއްގައި ސިންގަޕޫރަށް ވަޑައިގަންނަވާފައިވާއިރު، މިކަމާއި ގުޅޭ އިތުރު ތަފްސީލެއް ރައީސް އޮފީހުން ހާމަކޮށްފައި ނުވެއެވެ.
ރައީސް މީގެ ކުރިންވެސް ނުރަސްމީ ދަތުރުފުޅެއްގައި ސިންގަޕޫރަށް ވަޑައިގެންނެވިއެވެ. މިއަހަރުގެ ފެބްރުއަރީ މަހު ސިންގަޕޫރަށް ވަޑައިގެންނެވުމުގެ ކުރިން ރައީސް ވިދާޅުވެފައިވަނީ ޑޮކްޓަރުގެ ލަފާގެމަތިން އެމަނިކުފާނު ތައިރޮއިޑް ފަރުވާއަކަށް ސިންގަޕޫރަށް ފުރާވަޑައިގަންނަވާ ކަމަށެވެ. އޭގެ ކުރިންވެސް އަނބިކަނބަލުންނާއެކު އެމަނިކުފާނު ސިންގަޕޫރަށް ވަޑައިގެންނެވިއެވެ.
ޑޮކްޓަރުގެ ލަފާގެމަތިން ތައިރޮއިޑް ފަރުވާއަކަށް އެމަނިކުފާނު ސިންގަޕޫރަށް ވަޑައިގަތީ 23 ފެބްރުއަރީ 2022ގައެވެ. އެގޮތުން ސިންގަޕޫރުގައި ކުރިއަށްދިޔަ މި ސަރޖަރީއަށްފަހު ކުރެއްވި ޓްވީޓެއްގައި އެމަނިކުފާނު ވިދާޅުވީ، ސަރޖަރީ ނިމިއްޖެކަމަށާއި ހާލުކޮޅު ރަނގަޅުވަމުން އަންނަކަމަށެވެ.
