ބިމުއަޑީގައި ވަޅުލައިގެން ނޫނީ ނުކެއްކޭ މަންދިގެ ވާހަކަ އަޑު އެހިންތަ؟
12 އޮކްޓޯބަރު 2022 | ބުދަ 06:59މަންދި ތައްޔާރު ކުރަނީ ކަންބަޅި މަސް ބޭނުން ކޮށްގެން، ކަންބަޅި މަސްގަނޑު މީރު ކުރަނީ، އެކަމަށް ހާއްސަ ހަވާދުގަނޑެއް ބޭނުންކޮށްގެން
ޔަމަނުގެ ޘަޤާފީ އާދަކާދައަށް ބަލާއިރު، މަންދި ލިބެނީ ހާއްސަ މުނާސަބާތަކުގައި
ފާއިތުވީ 6 ވަރަކަށް އަހަރު ދުވަހު، އެ ޤައުމުގެ ނަން މީޑިއާއިން މުޅިންވެސް އިވެމުން ދިޔައީ ސިޔާސީ ހަމަނުޖެހުންތަކާއި، ހަނގުރާމައާއި ކުރިމަތިލުންތަކާއި، ބަނޑުހައިހޫނުކަމާއި އިންސާނީ ކާރިޘާތަކާ ގުޅުވައިގެންނެވެ. ނަމަވެސް މިފަހަރު ތަފާތު ވާހަކައެކެވެ. މިއީ އާދަޔާ ޚިލާފު ގޮތަކަށް ތައްޔާރު ކުރާ، އެ ޤައުމަށް ހާއްސަ ކޭމެއް، ޢަރަބި ޖާފަތްތަކުގައި މަޤުބޫލުކަން ހޯދި ވާހަކައެވެ. ދައްކަން މިއުޅެނީ ޔަމަނަށް ހާއްސަ، މަންދިގެ ވާހަކައެވެ.
އެއްގަމު މަސް ބޭނުން ކޮށްގެން ތައްޔާރު ކުރާ މަންދިއަކީ ޔަމަންގެ އެންމެ ފެންވަރު މަތީ ރެސްޓޯރަންޓްތަކުގެ އިތުރުން، ދުނިޔޭގެ އެކި ކަންކޮޅުތަކުގައި އަރަބި ކޭން ވިއްކާ ރެސްޓޯރަންޓްތަކަށްވެސް މިއަދު ފަރިތަ ނަމެކެވެ. ޔަމަނުގެ ޘަޤާފަތާ ގުޅިފައި ވާ މަންދިއަކީ، ބިމުއަޑީގައި ހުންނަ އަވަނެއްގައި ނޫނީ ނުކެއްކޭ ކޭމެއް ކަމީ، މި ކޭމުގެ އެންމެ ހާއްސަ ސިފައެވެ.
ޔަމަނުގެ ހަޟްރަމައުތޭ ކިއުނު ސަރަޙައްދުން އުފެދިގެން އައި މަންދި ތައްޔާރު ކުރަނީ ކަންބަޅި މަސް ބޭނުން ކޮށްގެންނެވެ. ކަންބަޅި މަސްގަނޑު މީރު ކުރަނީ، އެކަމަށް ހާއްސަ ހަވާދުގަނޑެއް ބޭނުންކޮށްގެންނެވެ. އެ ހަވާދުގަނޑަށް ކިއާ އުޅެނީ ހަވައިޖުއެވެ. މީރު ކުރި މަސްގަނޑު ކައްކަނީވެސް ބިމުގެ އަޑިއަށް ފައްތާފައިވާ ހާއްސަ އަވަނެއްގައެވެ.
ޔަމަނުގެ ބޯޑަރު ހުރަސްކޮށް، އަރަބި އެހެން ޤައުމުތަކަށްވެސް މަންދިގެ މަޤުބޫލުކަން ވަނީ ފެތުރިފައެވެ. ދުނިޔޭގެ އެކިކަންކޮޅުތަކުން ގިނަ ޤައުމުތަކެއްގައި، މަންދިއަކީ މައިގަނޑު ޑިޝްއަކަށް ވަނީ ވެފައެވެ.
ޢަބްދުﷲ ބިން މާލިކްއަކީ މަންދީ ރެސްޓޯރަންޓެއްގެ ވެރިއެކެވެ. ހަޟްރަމައުތަށް ނިސްބަތްވާ ޢަބްދުﷲ ބިން މާލިކް ޤަބޫލު ކުރާ ގޮތުގައި، ވެރިރަށް ސަންއާގެ މީހުންނަށް އެންމެ ފުރަތަމަ މަންދި ތަޢާރަފު ކޮށްދިން މީހުންގެ ތެރޭގައި އޭނާވެސް ހިމެނޭނެއެވެ.
މަންދި ކެއްކުމުގެ މަސައްކަތް ފެށެނީ ކަންބަޅި މަސްގަނޑު މީރު ކުރަން ފަށާ ހިސާބުންނެވެ. ބިމު އަޑީ އަވަނުގައި މަސްގަނޑު ފިހަމުން ދާއިރު، ހޫނު ހިފަހައްޓަނީ ދަރާއި ބޯޓުދެލި ބޭނުންކޮށްގެންނެވެ. މަސްގަނޑު ރަނގަޅަށް ރޯ ފިލުވަނީ އެ އުފައްދާ ހޫނު އާވީގައި ބަންދުކޮށްފައި ބަހައްޓައިގެންނެވެ. އެކަމަށް، 2 ގަޑިއެއް ހާ އިރު ހޭދަވެއެވެ. މަންދި ކައްކާ ނިމުމުން، ކޭމެއްގެ ގޮތުގައި ސަރވް ކުރަނީ ބަތާއެކީގައެވެ.
ޔަމަނުގެ ޘަޤާފީ އާދަކާދައަށް ބަލާއިރު، މަންދި ލިބެނީ ހާއްސަ މުނާސަބާތަކުގައެވެ. ކަންބަޅި މަހުގެ އިތުރުން ކުކުޅާއި ބަކަރި އަދި ޖަމަލު މަހުގައިވެސް މަންދި ތައްޔާރު ކުރެއެވެ.
