ކުނި ވަކިކުރާ އޮޓޮމެޓިކް މެޝިނެއް ތިލަފުށީގައި ބަހައްޓަނީ

ތިލަފުއްޓަށް ގެންދާ ކުނި ވަކިކުރުމަށް ޚާއްސަ މެޝިނެއް ބެހެއްޓުމަށް، އެންވަޔަރަންމަންޓް މިނިސްޓްރީއާއި ވެމްކޯ، އަދި ޕާލޭގެމެދުގައި އެއްބަސްވުމެއްގައި ސޮއިކޮށްފިއެވެ.

އަންގާރަ ދުވަހު ސޮއިކުރެވުނު މި އެއްބަސްވުމުގެދަށުން ތިލަފުށީގައި ބަހައްޓާ މެޝިނަކީ، ރާއްޖޭގައި ފުރަތަމަ ފަހަރަށް ބަހައްޓާ މިފަދަ މެޝިނެވެ. މި އެއްބަސްވުމުގެ ދަށުން މި މެޝިން ޑިޒައިންކޮށް އިންސްޓޯލްކުރުމުގެ މަސައްކަތް ހަވާލުކޮށްފައިވަނީ ޕާލޭއާއެވެ.

ވެމްކޯއިން ބުނިގޮތުގައި، މި މެޝިނަކީ އެއްވެފައި ހުންނަ ކުނިތަކުގެ ތެރެއިން ދަގަނޑުގެ ބާވަތްތަކާއި ޕްލާސްޓިކާއި އެހެނިހެން ކުނިތައް އޮޓޯއިން ވަކިކޮށްދިނުމުގެ ގާބިލުކަން ލިބިފައިވާ މެޝިނެކެވެ.

މި މެޝިނަކީ ރާއްޖޭގައި ރައްކާތެރިކަމާއެކު ކުނި ނައްތާލުމަށް ކުރަމުން އަންނަ މަސައްކަތުގެ ދަށުން ބަހައްޓާ މެޝިނެކެވެ. މިހާރުވެސް ވެމްކޯއިން ތިލަފުއްޓަށް ކުނި ގެންދަނީ އެކި ބާވަތްތަކުގެ ކުނި ވަކިކޮށްގެންނެވެ.

ކުނި ވަކިކުރުމުގެ މަސައްކަތް ވެމްކޯއިން މިހާރު ކުރަނީ އެ ކުންފުނީގެ މުވައްޒަފުންލައްވައެވެ. މުވައްޒަފުންގެ އަތުން މި މަސައްކަތް ކުރަމުން އަންނައިރު، މެޝިނާއެކު އެކަމަށް ހައްލު ލިބިގެންދާނެކަމަށް ވެމްކޯއިން ބުނެއެވެ.

މީގެ އިތުރުން، ސަރުކާރުން އަންނަނީ ރީޖަނަލް ވޭސްޓް ސެންޓަރުތައްވެސް ގާއިމްކޮށް އެތަންތަނުން ކުނި މެނޭޖްކުރުމުގެ މަސައްކަތްތައްވެސް ކުރަމުންނެވެ. އަދި ރަށު ފެންވަރުގައި، ރައްކާތެރިގޮތުގައި ކުނި ވަކިކޮށް މެނޭޖްކުރުމުގެ މަސައްކަތްތައްވެސް ސަރުކާރުން އަންނަނީ ކުރަމުންނެވެ.