މާލީ ބާޒާރުން ޖާގަ ގެއްލި، ލުބްނާން ފައިސާ ގަހަނާ ކަބަޑަށް!

މި ދުވަސްވަރަކީ ކޮވިޑް-19ގެ ބަލިމަޑުކަމުން ހީނަރު ކުރި އިޤްތިޞާދުތައް މަޑުމަޑުން ކޮޅަށް ޖެހި، ކުރިއެރުމުގެ ދުވެލި ހިފަމުން އަންނަ ދުވަސްވަރެއް ކަމުގައި ވީ ނަމަވެސް، ބަލިމަޑުކަމުގެ ކުރީއްސުރެވެސް ހީނަރުކަމުގެ އަނދަވަޅަކަށް މިޞްރާބު ޖަހާފައި އޮތް ލުބްނާންގެ އިޤްތިޞާދު ހެޔޮ ފާލަކަށް އެޅިދާނެ ކަމުގެ ކުޑަ ނަމަވެސް ނިޝާނެއް އަދި ނުފެއެވެ. ދުވަހަކަށް ވުރެ ދުވަހެއް، ޤައުމުގެ ހާލަތު ދަނީ ދަށް ވަމުންނެވެ. ގޯހުން ގޯހަށެވެ. ފައިސާގެ އަގު ވެއްޓެމުން ގޮސް، މިއަދު ފައިސާ ފޮތީގައި މާލީ މުއާމަލާތެއް ކުރާނެ އާރެއް ބާރެއް ނެތޭވެސް ދެންނެވިދާނެއެވެ.

ސިޔާސީ ކޯޅުންގަނޑު ކިތަންމެ ބޮޑުވެ، ޤައުމު ކިތަންމެ ބިކަ ވަމުން ދިޔަ ކަމުގައި ވީ ނަމަވެސް ލުބްނާންގެ ހިތްވަރުގަދަ ރައްޔިތުން ތިބީ ދޫ ދޭ ގޮތަކަށް ނޫނެވެ. އެމީހަކަށް ވީ ގޮތަކުން، ލިބުނު އެއްޗެއް ހޯދަން މަސައްކަތް ކުރެއެވެ. މިއީ 1975 އިން 1990 އަށް އެ ޤައުމުގައި ކުރި ވަރުގަދަ ދާޚިލީ ހަނގުރާމައަށް ފަހު ލުބްނާން ދުށް އެންމެ ބޮޑު މާލީ ކާރިޘާ ކަމުގައި ވީ ނަމަވެސް، އުއްމީދު ނަގާ ނުލާ ތިބި ރައްޔިތުންތަކެއް އަދިވެސް އެ ޤައުމުން ފެނެއެވެ. އެފަދަ އެއް ތަނަކީ އުތުރުގެ ސިޓީއެއް ކަމަށް ވާ ޓްރިޕޮލީގައި ފެޝަންގެ ސަމާނު ވިއްކާ ފިހާރައެކެވެ. އެ ފިހާރާގައި މިހާރު އުފައްދަމުންދާ ގަހާނާތައް ތައްޔާރު ކުރަނީ، ބާޒާރުގައި މުޅިންހެން ދައުރު ކުރުން ހުއްޓިފައި ވާ ލުބްނާންގެ ފައިސާ ފޮތި ބޭނުން ކޮށްގެންނެވެ.

250 އަދި 500 ލެބަނީޒް ޕައުންޑް ފައިސާ ފޮތީގެ އަގުތައް އިރެއްގައި 0.16 އަދި 0.33 އެމެރިކާ ޑޮލަރުގައި ހުރި ނަމަވެސް، މިއަދު އެ އަގުތައް ވަނީ 0.01 އެމެރިކާ ޑޮލަރަށް ވުރެ ދަށަށް ގޮސްފައެވެ. މާލީ ބުރަދަން ގެއްލި، ބާޒާރުތަކުގެ މުއާމަލާތުން އެ ފައިސާ ފޮތިތަކަށް އޮތް ފުރުޞަތު މުޅިންހެން ބަންދުވެފައި ވީ ނަމަވެސް، އެ ފައިސާ ފޮތިތަކުގެ ބޭނުން ހިފިދާނެ ގޮތެއް ހޯދީ ފިހާރައިގެ އޯނަރު ރީމާ މައުލާވީ އަލް ޞަމަދުއާއި ގަހަނަ ހެދުމުގެ މަސައްކަތުގައި އުޅޭ ނިސްރީން ދަސޫކީ ހައްފާރުއެވެ.

ނިސްރީންއާއި ރީމާ، އެ ފައިސާ ފޮތިތައް ބޭނުން ކުރަނީ ކެވެއްޔާއި ކަންފަތުގައިލާ އެއްޗެހީގެ އިތުރުން ތަޅުދަނޑިލާ އެއްޗެއްސާއި އަތުކުރީގައި ހަރުކުރާ ކަފްލިންކްސް ފަދަ ގަހަނާގެ ބާވަތްތައް އުފެއްދުމަށެވެ. އެހެން ނޫނީ "މަރުވެފައިވާ" ފައިސާ ފޮތިތަކެއް އަލުން ބޭނުން ކުރެވޭ ކަމަށްޓަކާ ފިހާރައިގެ އޯނަރު ހުރީ ވަރަށްވެސް ފަޚްރުވެރިވެފައެވެ.

250 ލުބްނާން ޕައުންޑްގެ ފައިސާ ފޮތި ބޭނުންކޮށްގެން ތައްޔާރު ކޮށްފައިވާ އާދައިގެ ކެވެއްޔެއް ވިއްކަނީ 150000 ލުބްނާން ޕައުންޑް ނުވަތަ އެލްބީޕީއަށެވެ. އެއީ އޮކްޓޯބަރު 5 ވަނަ ދުވަހުގެ މަރކެޓް ރޭޓަށް ބަލާއިރު، ގާތްގަނޑަކަށް 3.85 އެމެރިކާ ޑޮލަރެވެ.

އެއްބަޔަކު ގަހަނާ ހަދައިގެން ބޭނުން ކުރަމުން ދާ އިރު، އަނެއް ބަޔަކު ދަނީ އެއީ އިރެއްގައި ބޭނުން ކުރި ފައިސާކަން ދަރިފަސްކޮޅަށް އަންގައިދިނުމުގެ ގޮތުން، ފުޅި ފުޅީގައި ފައިސާ ރައްކާ ކުރަމުންނެވެ.

މީގެ 3 އަހަރެއްހާ ދުވަސް ކުރިން، މާލީ ހީނަރުކަމުގެ ފުން އަނދަވަޅަކަށް ލުބްނާންގެ އިޤްތިޞާދު ވެއްޓުނު ފަހުން، ލުބްނާން ފައިސާގެ ރަސްމީ ރޭޓްގެ އަގުތައް ވަނީ 95 ޕަސެންޓަށް ވުރެ ބޮޑަށް ދަށަށް ގޮސްފައެވެ. އޮކްޓޯބަރު 11 ވަނަ ދުވަހު، މާލީ ބާޒާރުގެ އަގުތައް ހުރި ގޮތަށް ބަލާއިރު 1 އެލްބީޕީއަށް ޖެހެނީ 0.00066 އެމެރިކާ ޑޮލަރެވެ.