ހައްޖު އެހީތެރީން ހޯދީ ހިއުމަން ރިސޯސް ޕޮލިސީގައި ބަޔާންކޮށްފައިވާ ގޮތުގެ މަތިން – އިސްލާމިކް މިނިސްޓަރު
އިސްލާމިކް މިނިސްޓްރީގެ އެދުމަށް އެއް މުވައްޒަފަކު ހައްޖު ދަތުރުގައި ބައިވެރިކޮށްފައިވާނެ
އިސްލާމިކް މިނިސްޓަރު ޑރ. އަހުމަދު ޒާހިރު
1443 ވަނަ އަހަރު ހައްޖަށް ދިޔަ މީހުންނަށް އެހީތެރިވުމަށް މީހުން ހޯދާފައިވަނީ ހައްޖު ކޯޕަރޭޝަންގެ ހިއުމަން ރިސޯސް ޕޮލިސީގައި ބަޔާންކޮށްފައިވާ ގޮތުގެ މަތިން ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މާފަންނު މެދު ދާއިރާގެ މެންބަރު އިބްރާހީމް ރަޝީދު، އިސްލާމިކް މިނިސްޓަރާއި ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލުގެ ޖަވާބުގައެވެ. މެންބަރު އިބްރަހީމް ރަޝީދު ކުރެއްވި ސުވާލުގައި ވަނީ 1443 ވަނަ އަހަރު ހައްޖު ދަތުރާ ގުޅިގެން އެހީތެރިކަން ހޯދުމަށް ހައްޖު ކޯޕަރޭޝަނުން ކުރި އިއުލާނާ ގުޅިގެން ހައްޖާ އުމުރާ ދަތުރުގައި ވަޑައިގެން އަމަލީ ގޮތުން، މަސައްކަތް ކުރައްވާ އަރަބި ބަސް ރަނގަޅަށް ދެނެވަޑައިގަންނަވާ ބޭފުޅުންތަކެއް ކުރިމަތިލައްވާފައި ވަނިކޮށް، އެ ބޭފުޅުންނަށް ފުރުސަތު ނުދީ، އެއްވެސް ގޮތަކަށް ސައުދީ އަރަބިއްޔާއަށް ދަތުރުކޮށްފައި ނުވާ އަދާލަތު ޕާޓީގެ މެންބަރުންނާއި މިނިސްޓްރީ އޮފް އިސްލާމިކް އެފެއާޒްގެ ތެރެއިން ވަކި ބަޔަކަށް ފުރުސަތު ދީގެން ހައްޖު ކޯޕަރޭޝަންގެ އެހީތެރިކަމާ އެކު މީހުން ހައްޖަށް ގެންގޮސްފައިވާނެތޯ، އަދި ގެންގޮސްފައިވާނަމަ އެއީ ކިތައް މީހުންތޯއެވެ.
މެންބަރުގެ ސުވާލުގެ ޖަވާބުގައި މިނިސްޓަރު ވިދާޅުވީ 1443 ވަނަ އަހަރުގައި މޯލްޑިވްސް ހައްޖު ކޯޕަރޭޝަންގެ ފަރާތުން ހައްޖު ދަތުރުގައި ބައިވެރިވާނެ އެހީތެރިން ހޮވާފައިވާނީ އެ ކުންފުނީގެ ހިއުމަން ރިސޯސް ޕޮލިސީގައި ބަޔާންކޮށްފައިވާ ގޮތުގެ މަތިން އާންމުކޮށް އިއުލާންކޮށް އިންޓަވިއުކޮށް، އިންޓަވިއުއިން އެންމެ މަތިން މާކްސް ހޯދި ފަރާތް ކަމަށެވެ.
މީގެ އިތުރުން 1443 ވަނަ އަހަރުގެ ހައްޖު ދަތުރުގެ އެހީތެރިންގެ ގޮތުގައި އިސްލާމިކް މިނިސްޓްރީގެ އެދުމަށް އެއް މުވައްޒަފަކު ހައްޖު ދަތުރުގައި ބައިވެރިކޮށްފައިވާނެ ކަމަށް ވެސް މިނިސްޓަރު ވިދާޅުވިއެވެ.
