ހައްޖަށް ދިޔަ މީހުންނަށް ޕީސީއާރު ޓެސްޓު ހަދަން ހަވާލުކުރީ ޕްރޮކިއުމެންޓް ޕޮލިސީގައި ބަޔާންކޮށްފައިވާ ގޮތުގެ މަތިން – އިސްލާމިކް މިނިސްޓަރު
11 އޮކްޓޯބަރު 2022 | އަންގާރަ 05:14ޕީސީއާރު ޓެސްޓު ހަދާފައިވަނީ މެޑިފްލެކްސް މެދުވެރިކޮށް ބޮލަކަށް 200 ރުފިޔާގެ ރޭޓުން
އިސްލާމިކް މިނިސްޓަރު ޑރ. އަހުމަދު ޒާހިރު
1443 ވަނަ އަހަރު މޯލްޑިވްސް ހައްޖު ކޯޕަރޭޝަންގެ ހަވާލުގައި ހައްޖަށް ދިޔަ ފަރާތްތަކުން ހަދަންޖެހޭ ޕީސީއާރު ޓެސްޓު ހަދައިދޭނެ ބަޔަކު އެ ކުންފުނިން ހޯދާފައިވަނީ އެ ކުންފުނީގެ ޕްރޮކިއުމެންޓް ޕޮލިސީގައި ބަޔާންކޮށްފައިވާ ގޮތުގެ މަތިން ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވެއްޖެއެވެ.
އިސްލާމިކް މިނިސްޓަރު މިހެން ވިދާޅުވީ މާފަންނު މެދު ދާއިރާގެ މެންބަރު އިބްރާހީމް ރަޝީދު، އިސްލާމިކް މިނިސްޓަރާ ލިޔުމުން ޖަވާބު ހޯއްދެވުމަށް ކުރައްވާފައިވާ ސުވާލުގެ ޖަވާބުގައެވެ. މެންބަރު އިބްރާހީމް ރަޝީދު ކުރެއްވި ސުވާލުގައި ވަނީ، ސަރުކާރުން ހިންގާ ހޮސްޕިޓަލުތަކުން ހާޖީންގެ ކޮވިޑް ޓެސްޓު ހެދޭނެ ގޮތް ހަމަޖެހިފައިވަނިކޮށް، ހައްޖު ކޯޕަރޭޝަނުން އެއްވެސް އަމިއްލަ ކްލިނިކަކަށް ފައިސާ ދައްކައިގެން ކޮވިޑް ޓެސްޓު ހަދާފައިވާނެތޯ އަދި ހަދާފައިވާނަމަ އެއީ ކޮން ކުލިނިކެއްތޯ އަދި ކޮވިޑް ޓެސްޓު ކުރުމަށް މީހަކަށް ކިހާވަރެއް ދެއްކިތޯއެވެ.
މެންބަރުގެ ސުވާލުގެ ޖަވާބުގައި އިސްލާމިކް މިނިސްޓަރު ވިދާޅުވެފައިވަނީ ހައްޖުވެރިންގެ ޕީސީއާރު ޓެސްޓު ހަދައިދިނުމުގެ ހިދުމަތް އެ ކުންފުންޏަށް ކޮށްދޭނެ ފަރާތެއް ހޯދުމަށް އެ ކުންފުނީގެ ޕްރޮކިއުމެންޓް ޕޮލިސީގައި ބަޔާންކޮށްފައިވާ ގޮތުގެ މަތިން، ދިވެހިރާއްޖޭގައި އެ ހިދުމަތް ފޯރުކޮށްދޭ ފަރާތްތަކުން ހޯދުނު އަގުތަކުން އެންމެ ހެޔޮއަގެއް ހުށަހަޅާފައިވަނީ މެޑިފްލެކްސް ލެބޯޓަރީން ކަމަށެވެ.
އެހެންކަމުން ހައްޖު ކޯޕަރޭޝަންގެ ފަރާތުން 1443 ވަނަ އަހަރު ހައްޖުވެރިންގެ ޕީސީއާރު ޓެސްޓު ހަދާފައިވަނީ މެޑިފްލެކްސް މެދުވެރިކޮށް ބޮލަކަށް 200 ރުފިޔާގެ ރޭޓުން ކަމަށް މިނިސްޓަރުގެ ޖަވާބުގައި ވިދާޅުވެފައިވެއެވެ. އަދި މި ހިދުމަތް ފޯރުކޮށްދޭ ސަރުކާރު ހޮސްޕިޓަލުކަމުގައިވާ އިންދިރާ ގާންދީ މެމޯރިއަލް ހޮސްޕިޓަލުން، އެ ކުންފުންޏަށް ޕިސީއާރު ޓެސްޓު ހެދުމުގެ ހިދުމަތް ފޯރުކޮށްދެނީ ބޮލަކަށް 700 ރުފިޔާގެ ރޭޓުން ކަމަށް މިނިސްޓަރު ވިދާޅުވިއެވެ.
މީގެ އިތުރުން މި ހިދުމަތް ފޯރުކޮށްދޭ ފަރާތެއްކަމުގައިވާ މޯލްޑިވްސް ޕޮލިސް ސަރވިސްގައި އެދުމުން، އެ ފަރާތުން ބުނެފައިވަނީ އެ ހިދުމަތް ހޯދަން ބޭނުންވާ ކެމިކަލް އަތުގައި ނެތްކަމަށެވެ. އަދި ކެމިކަލް ދިނުމަށް ހެލްތު ޕްރޮޓެކްޝަން އެޖެންސީ މެދުވެރިކޮށް މަސައްކަތް ކުރެވި އެގޮތަށް އެކަންވެސް ނުވުމުގެ ސަބަބުން މޯލްޑިވްސް ޕޮލިސް ސަރވިސް މެދުވެރިކޮށް ޕީސީއާރު ޓެސްޓު ހެދޭގޮތް ނުވި ކަމަށް މިނިސްޓަރު ވިދާޅުވިއެވެ.
