ލުއިޒް ޑިއާޒް އަށް އަނިޔާވެ ކުޅުމާ ދުރަށް

ލިވަޕޫލަށް ކުޅެމުން އަންނަ ކޮލަމްބިއާގެ ވިންގަ ލުއިޒް ޑިއާޒަށް އަނިޔާވެ ކުޅުމާ ދުރަށް ދާން ޖެހިއްޖެއެވެ.

ޑިއާޒަށް އަނިޔާވެފައިވަނީ އިނގިރޭސި ޕްރިމިއާ ލީގުގައި ލިވަޕޫލުން އާސެނަލާ ދެކޮޅަށް ކުޅުނު މެޗުގައެވެ. އެ މެޗުން ލިވަޕޫލް ބަލިވެފައިވަނީ 2-3 އިންނެވެ.

ޑިއާޒަށް ލިބިފައިވަނީ ކަކުލުގެ އަނިޔާއެކެވެ. އަނިޔާގެ ސަބަބުން ކުޅުމާ ދުރުގައި ހުންނަން ޖެހޭތީ، ޑިއާޒަށް ލިވަޕޫލްގެ 10 މެޗެއް ގެއްލޭނެ ކަމަށް މީޑިއާ ރިޕޯޓުތައް ބުނެއެވެ. މީގެ އިތުރުން އަނިޔާ އިން ރަނގަޅު އޭނާ އަށް އަނބުރާ ކުޅުމުގެ ތެރެއަށް އާދެވޭނީ ނޮވެމްބަރު މަހު ޤަތަރުގައި ފަށާ ފީފާ ވޯލްޑް ކަޕަށްފަހު، ޑިސެމްބަރު މަހުގެ ފަހު ކޮޅު ކަމަށް ވެސް ރިޕޯޓުތައް ބުނެއެވެ.

ޕޯޗުގަލްގެ ޕޯޓޯ ދޫކޮށް ޑިއާޒް ލިވަޕޫލަށް ބަދަލުވީ މިއަހަރުގެ ޖެނުއަރީ މަހުއެވެ. ފަސް އަހަރު ދުވަހުގެ އެއްބަސްވުމެއްގެ ދަށުން އޭނާ ލިވަޕޫލަށް ބަދަލުވީއިރު. މިހާ ހިސާބަށް އޭނާ އައީ ލިވަޕޫލްގައި މުހިންމު ދައުރެއް އަދާ ކުރަމުންނެވެ.

މި ސީޒަންގައި ލިވަޕޫލަށް ވަނީ އަނިޔާގެ ގިނަ މައްސަލަތަކަކާ ކުރިމަތިލާން ޖެހިފައެވެ. ޑިއާޒްގެ އިތުރުން ވެސް އެ ޓީމުގެ ބައެއް ކުޅުންތެރިން ތިބީ އަނިޔާގައެވެ.