މަޝްހޫރު ދީނީ އިލްމުވެރިޔާ އިސްމާއީލް ބިން މޫސާ (މުފްތީ މެންކް) އޮކްޓޯބަރ މަހު ރާއްޖެ ވަޑައިގަތުމަށް ހަމަޖެހިފައިވާއިރު، މާލެ ސިޓީގެ އިތުރުން އައްޑޫ ސިޓީ އަދި ފުވައްމުލައް ސިޓީގައި ދަރުސް ދެއްވުމަށް ހަމަޖެހިފައިވާކަމަށް އިސްލާމިކް މިނިސްޓްރީން ބުނެފިއެވެ.

އިސްލާމިކް މިނިސްޓްރީން ވަނީ، މުފްތީ މެންކް މި މަހުގެ 28ން 31ށް ރާއްޖެއަށް ޒިޔާރަތް ކުރައްވަން ހަމަޖެހިފައިވާކަން ހާމަކޮށްފައެވެ. އެމިނިސްޓްރީން ބުނީ، މުފްތީ މެންކު މާލެއާއި ހުޅުމާލޭގެ އިތުރުން ފުވައްމުލައް އަދި އައްޑޫ ސިޓީގައި ދަރުސް ދެއްވާނެކަމަށެވެ. ދަރުސްތަކުގެ ޝެޑިއުލް މިނިސްޓްރީން އާންމުކޮށްފައިވާއިރު، އެންމެ ފުރަތަމަ މިމަހުގެ 28 ވަނަ ދުވަހު ދަރުސް އޮންނާނީ މާލެ ސިޓީގެ އަލިމަސް ކާނިވަލުގައެވެ. އެއަށްފަހު އޮކްޓޯބަރ މަހުގެ 29 ވަނަ ދުވަހު މުފްތީ މެންކު ދަރުސް ދެއްވުމަށް ހަމަޖެހިފައިވަނީ ފުވައްމުލައް ސިޓީގައެވެ. އެއީ ފުވައްމުލައް ސިޓީގެ ފުޓުބޯޅަ ސްޓޭޑިއަމްގައެވެ. 30 ވަނަ ދުވަހު އައްޑޫ ސިޓީގެ ސިޓީ ސްކޮޔަރގައި ދަރުސް ދެއްވާނެއެވެ. އެންމެފަހު ދަރުސް ދެއްވާނީ ހުޅުމާލެ ސިންތެޓިކް ޓްރެކްގައެވެ. އެއީ މިމަހުގެ 31 ވަނަ ދުވަހުއެވެ.

ހުޅުމާލޭގައި ދަރުސް ބޭއްވުމަށް ހައުސިންގ ޑިވެލޮޕްމަންޓް ކޯޯޕަރޭޝަން (އެޗްޑީސީ)އާ އިސްލާމިކް މިނިސްޓްރީއާ ދެމެދު އެއްބަސްވުމެއްގައި ވަނީ ސޮއިކޮށްފައެވެ. އެ އެއްބަސްވުމުގައި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު އަހްމަދު އާތިފްއެވެ. އަދި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އަހްމަދު ޒާހިރުއެވެ.

މުފްތީ މެންކް މީގެ ކުރިންވެސް އެކި ފަހަރު މަތިން ރާއްޖެ ވަޑައިގެން، ދީނީ ދަރުސްވެސް ދެއްވާފައިވެއެވެ.

މުފްތީ މެންކް އެންމެފަހުން ރާއްޖެ ވަޑައިގަތީ 2020 ވަނަ އަހަރުއެވެ. އެ ދަތުރުފުޅުގައި ދަރުސް ދެއްވީ ހދ. ކުޅުދުއްފުށީގައެވެ. އޭގެ ކުރިން 2016 ވަނަ އަހަރާއި 2015 ވަނަ އަހަރުވެސް ރާއްޖެވަޑައިގެން، އެކި މައުލޫތަކަށް ދީނީ ދަރުސް ދެއްވިއެވެ.