މާލެ އަތޮޅުން ފެށިގެން އައްޑުއާ ހަމައަށް ވައިޓް އެލަރޓް ނެރެފި
އެލަރޓް ނެރެފައިވަނީ މިރޭ 8:45ން ފެށިގެން ދަންވަރު 1:30އާ ހަމައަށް
މޫސުން - މާލެއަށް ބޯކޮށް ވާރޭވެހެނީ
މާލެ އަތޮޅުން ފެށިގެން އައްޑޫ ސިޓީއާ ހަމައަށް ވައިޓް އެލަރޓް ނެރެފިއެވެ.
މޫސުމާބެހޭ ގައުމީ އިދާރާއިން އެލަރޓް ނެރެފައިވަނީ މިރޭ 8:45ން ފެށިގެން ދަންވަރު 1:30އާ ހަމައަށެވެ.
އެ އިދާރާއިން ބުނެފައިވަނީ، އެލަރޓުގެ މުއްދަތުގައި މާލެ އަތޮޅުން ފެށިގެން އައްޑު ސިޓީއާ ދެމެދުގެ އަތޮޅުތަކުގެ ރަށްތަކަށް ބޯކޮށް ވާރޭވެހުމާއެކު ގުގުރުން އެކަށީގެންވާ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދާނެ ކަމަށްވެސް ވަނީ ލަފާކޮށްފައެވެ.
މޫސުމާބެހޭ ގައުމީ އިދާރާއިން ލަފާކުރާގޮތުގައި ރާއްޖެއަށް މިހާރު ކުރަމުން އަންނަ ވިއްސާރައިގައި ކަނޑުތައްވެސް ގަދަވާނެއެވެ.
މޫސުން ގޯސްވެ ކަނޑު ގަދަވުމުގެ ސަބަބުން ކަނޑުދަތުރު ކުރާ ފަރާތްތަކުން ރައްކާތެރިކަމުގެ ފިޔަވަޅު އެޅުމަށް، ކަމާބެހޭ އިދާރާތަކުން އިލްތިމާސްކުރެއެވެ. އަދި ފެންބޮޑުވެދާނެފަދަ ހާލަތަކަށް ތައްޔާރުވެ ތިބުމަށްވެސް އިލްތިމާސްކުރެއެވެ.
