ފުޅާ ދާއިރާއެއްގައި މަސްތުވާތަކެތި ޓްރެފިކް ކުރަމުންދިޔަ މީހަކު ހައްޔަރުކޮށްފި
10 އޮކްޓޯބަރު 2022 | ހޯމަ 15:38މި މައްސަލައިގައި ހައްޔަރުކޮށްފައިވަނީ 20 އަހަރުގެ ދިވެހި ޒުވާނެއް
ފުލުހުން ހޯދި މަސްތުވާތަކެތި، ކޮތަޅަކަށް އަޅާފައި
މާލޭގައި ފުޅާދައިރާއެއްގައި މަސްތުވާތަކެތި ޓްރެފިކް ކުރަމުންދިޔަ މީހަކު ހައްޔަރުކޮށްފިއެވެ.
ފުލުހުން ބުނެފައިވާ ގޮތުގައި މި މައްސަލައިގެ ތުހުމަތުގައި, އާދީއްތަ ދުވަހުގެ ރޭގެ ވަގުތެއްގައި ހައްޔަރުކޮށްފައިވަނީ 20 އަހަރުގެ ޒުވާނެކެވެ. އޭނާ ހައްޔަރުކުރީ ފުލުހުންނަށް ލިބުނު މައުލޫމާތަކާ ގުޅިގެން ޑްރަގް އެންފޯސްމަންޓާއި ޑްރަގް އިންޓެލިޖެންސް ގުޅިގެން ހިންގި އޮޕަރޭޝަނެއްގައެވެ. އޭނާ އަތުލައިގަތީ ހެންވޭރު ތުއްރަވާސް ގޯޅިން ކަމަށާއި، އޭނާގެ ހަށިގަނޑު ބަލައި ފާސްކުރުމުން، "ޑްރަގް ޓްރެފިކްކުރާ މީހެއްކަމަށް ކަނޑައަޅަން" ގާނޫނުގައި ބުނާ މިންގަނޑަށް އޭނާގެ އަތުން މަސްތުވާތަކެތި ފެނިފައިވާކަމަށެވެ.
ހައްޔަރުކުރި މީހާގެ މައުލޫމާތެއް ފުލުހުން ހާމައެއް ނުކުރެއެވެ. އަދި އޭނާގެ އަތުން ފެނުނު މަސްތުވާތަކެތީގެ ބަރުދަނުގައި ހުރި މިންވަރެއްވެސް ނުބުނެއެވެ.
މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
