އާރްވީއެސްއޭ ވިމެންސް ހޭންޑް ބޯލް ޓޯނަމެންޓްގެ އެއްވަނައަށް ޓީމް މާރަންދޫ ޖެހިލައިފިއެވެ.

ލީގު ތާވަލުގެ އެއްވަނައަށް މާރަންދޫ އެރީ ކުޅުނު ތިން މެޗުގެ ތެރެއިން ދެމެޗު ކާމިޔާބުކޮށްގެންނެވެ. އާދީއްތަ ދުވަހު ކުޅުނު މާރަންދޫގެ ތިންވަނަ މެޗުގައި އެޓީމު ބައްދަލުކުރީ ހޯރަފުށީ އެއަރޕޯޓު ޓީމާއެވެ. މި މެޗު ޓީމް މާރަންދޫން ކާމިޔާބުކުރީ 17-13ންނެވެ. މެޗުގެ މޮޅު ކުޅުންތެރިއަކީ މާރަންދޫ ޓީމުގެ ރިޝްތާއެވެ.

އާދީއްތަ ދުވަހު 22 ސްޕޯޓްސް ކްލަބާއި އިމަގުވެސް ބައްދަލުކުރިއެވެ. މި މެޗު 15-7ން ކާމިޔާބުކުރީ 22 ސްޕޯޓްސް ކްލަބެވެ. މެޗުގެ މޮޅު ކުޅުންތެރިއަކީ 22 ސްޕޯޓްސް ކްލަބުގެ މަރިޔަމް މާޔާއެވެ.

މި ނަތީޖާއާއެކު ޓީމް މާރަންދޫ އެއްވަނައިގައި އޮތީ ކުޅުނު ތިން މެޗުގެ ތެރެއިން ދެމެޗު ކާމިޔާބުކޮށްގެން ލިބުނު ހަ ޕޮއިންޓާއެކުއެވެ. ކުޅުނު ދެމެޗުންވެސް މޮޅުވި 22 ސްޕޯޓްސް ކްލަބް ދެވަނާގައި ހަ ޕޮއިންޓާއެކުއެވެ. މާރަންދޫއަށް އެއްވަނަ ލިބެނީ ފައިދާ ގޯލުންނެވެ. ނަމަވެސް ކުރިއަށް އޮތް މެޗުން މޮޅުވެގެން އެއްވަނައަށް ޖެހިލުމުގެ ފުރުސަތު 22 ސްޕޯޓްސް ކްލަބަށް އެބައޮތެވެ. ތިން ޕޮއިންޓާއެކު ތިންވަނާގައި ފްރިގޭޓަރ އޮތްއިރު ހަތަރުވަނާގައި އޮތް ހޯރަފުށީ އެއަރޕޯޓް ޓީމަށްވެސް ލިބެނީ ތިން ޕޮއިންޓެވެ. ޕޮއިންޓެއް ނުލިބި ތާވަލުގެ ފުލުގައި އޮތީ އިމަގުއެވެ.

ހއ އަތޮޅުގެ ރަށްތަކަށް ހުޅުވާލައިގެން ކުރިއަށް ގެންދާ މި މުބާރާތް ކުރިއަށްދަނީ ލީގު ބުރެއް ކުޅުމަށްފަހު އެންމެ މަތިން ޕޮއިންޓު ހޯދާ ދެޓީމަށް ފައިނަލަށް ދަތުރުކުރާ ގޮތަށެވެ.