އަމީނީ މަގު ތަރައްގީކުރުމަށްޓަކައި، އެ މަގުގައި ހުރި ގަސްތަކެއް ނަގާ މައްސަލާގައި، ސިވިލް ކޯޓަށް ހުށަހެޅި މައްސަލައިގެ ވަގުތީ އަމުރެއް ނެރެދެވެން ނެތްކަމަށް ސިވިލް ކޯޓުން ނިންމައިފިއެވެ.

ސިވިލް ކޯޓުން އަދީއްތަ ދުވަހު ނިންމި ނިންމުމުގައި ބުނެފައިވަނީ، މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ (ދިވެހި ދައުލަތް) އަދި ރޯޑް ޑިވެލޮޕްމަންޓް ކޯޕަރޭޝަން ލިމިޓެޑުގެ މައްޗަށް ރައްދުވާގޮތަށް، ގ. ކެނެރީގެ މުހައްމަދު ނަޝީދުގެ ފަރާތްޕުޅުން ނެރެދިނުމަށް އެދިވަޑައިގެންފައިވާ، ވަގުތީ އަމުރު ނެރެދެވޭނެތަކެއް ނެތް ކަމަށް ކަނޑައަޅާ ކަމަށެވެ.

މި ނިންމުމުގައި ބުނެފައިވަނީ; މަދަނީ މައްސަލައެއް ކޯޓަށް ވެއްދުމަށްފަހު އެ މައްސަލައެއް ނިމެންދެން ވަގުތީ އަމުރަކަށް އެދުމުން، އެ މައްސަލާގައި ހިމެނޭ މައުޟޫގެ މުވާލާތް ކެނޑިދާނެކަމަށް ދެކިގެން ވަގުތީ އަމުރު ނެރެންވެއްޖެނަމަ، ހެދިފައިވާ ގާނޫނުތަކާއި ގަވާއިދުތަކުގެ ބޭނުންކެނޑި، ކޯޓުތަކަކީ ނުރަނގަޅު ނިޔަތުގައި އަންނަ މީހާއަށްވެސް ހިމާޔަތް ދެވިގެންދާނެ ހިޔާވެއްސެއްކަމުގައި ވެގެން ހިނގައިދާނެ ކަމަށެވެ.

އަދި މިއީ އަދުލު އިންސާފު ގާއިމްކުރުމުގެ ޒިންމާ މަތިކުރެވިފައިވާ ކޯޓުތަކުން ތަރުހީބުދީގެންވާނެ ކަމެއްކަމުގައި ނުދެކޭކަމަށެވެ. އެހެންކަމުން ވަގުތީ އަމުރަށް އެދުމުން މައުޟޫއީ މައްސަލައިގެ މުވާލާތް ކެނޑިދާނެތޯ ނުވަތަ ނޫންތޯ ބަލަންޖެހޭނެކަމަށް ނުދެކޭކަމަށެވެ.

ރައީސް ނަޝީދުގެ ފަރާތްޕުޅުން މި މައްސަލަ ސިވިލް ކޯޓަށް ހުށަހަޅުއްވާފައިވަނީ މިދިޔަ މަހުގެ 30 ވަނަ ދުވަހުއެވެ. ރައީސް ނަޝީދުގެ ފަރާތްޕުޅުން މި މައްސަލަ ސިވިލް ކޯޓަށް ހުށަހެޅުއްވީ ޝުނާނާ އެންޑް ކޯ އެލްއެލްޕީގެ ލޯ ފަރމުންނެވެ. އަމީނީ މަގުގެ ގަސްތައް ކެނޑުން ހުއްޓުވުމަށް ވަގުތީ އަމުރަކަށް ރައީސް ނަޝީދު ވަނީ އެދިވަޑައިގަންނަވާފައެވެ. މި މައްސަލައިގައި ރައީސް ނަޝީދުގެ ފަރާތްޕުޅުން ދައުވާ އުފުލަނީ ރޯޑް ޑިވެލޮޕްމަންޓް ކޯޕަރޭޝަނާއި، މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ މައްޗަށެވެ.

އަމީނީ މަގުގެ ގަސްތައް ކަނޑާތީ ރައީސް ނަޝީދު ވަނީ މަޖިލީހުގައިވެސް ކަންބޮޑުވުން ފާޅު ކުރައްވާފައެވެ. އެމަނިކުފާނު ވިދާޅުވިގޮތުގައި، އަމީނީ މަގުގައި އިންދާފައި ހުރި ބޮޑެތި ގަސްތައް ނުނަގައި އެ މަގު ހެދޭނެ ގޮތްތައް ހޯދަންޖެހެއެވެ. އަދި ގަހެއް ހެދުމަށް 15-20 އަހަރު ނަގާއިރު، މަގުތައް ހަދާއިރު ގަސްތައް ބަހައްޓައިގެން އެކަން ކުރެވޭނެ ގޮތެއް ހޯދަންޖެހޭ ކަމަށްވެސް އެމަނިކުފާނު ވަނީ ވިދާޅުވެފައެވެ.

އަމީނީ މަގު ހެދުމުގެ މަޝްރޫއު ކުރިއަށްދާއިރު، މިހާރު މަސައްކަތް ކުރަމުން އަންނަ ސަރަހައްދުގައި ހުރި ގަސްތައް ކަނޑާތީ އެ މައްސަލަ މަޖިލީހަށް ވެސް ވަނީ ހުށަހަޅާފައެވެ. މި މައްސަލަ މަޖިލީހަށް ހުށަހެޅުއްވީ ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފުއެވެ.

މި މައްސަލަ ކޯޓަށް ހުށަހަޅާފައިވާއިރު، އަމީނީ މަގުން ކަނޑާ ގަސްތައް އެހެން ތަންތަނަށް ބަދަލު ކުރާނެކަމަށް ސަރުކާރުން ވަނީ ބުނެފައެވެ.

އެކަމާ ގުޅޭގޮތުން ރައީސް އޮފީހުގެ ތަރުޖަމާނު މިއުވާނު މުހައްމަދު ވިދާޅުވީ، ގަސްތައް ކެނޑުމަކީ އެއްވެސް ބަޔަކު ކުރަން ބޭނުންވާ ކަމެއް ނޫންކަމަށާއި، ނަމަވެސް ބައެއް ޕްރޮޖެކްޓްތައް ހިންގުމަށްޓަކައި ގަސް ކަނޑަންޖެހޭ ހާލަތްތައްވެސް އަންނަކަމަށެވެ. އެ މަގުގައި ހުރި ގަސްތަކުގެ މޫތައް ފެތުރިފައިވުމުގެ ސަބަބުން، ހޮޅިތައް ވަޅުލުމުގައިވެސް ގޮންޖެހުން ހުރިކަން ފާހަގަކުރައްވައި މިއުވާން ވިދާޅުވީ، އަމީނީ މަގަކީ މިހާރުވެސް ހަދަން ޖެހިފައިވާ މަގެއްކަމަށެވެ.

އަމީނީ މަގު ހެދުމުގެ މަސައްކަތް މިހާރު ކުރިއަށްދާއިރު، ގަސްތައް ހުރުމުގެ ސަބަބުން އޭގެ އިތުރުންވެސް އިތުރު ގޮންޖެހުންތައް ހުރިކަމަށް މިއުވާން ވިދާޅުވިއެވެ.

އޭގެ އިތުރުން، އެ މަގުން ކަނޑާ ގަސްތައް އަލުން އެހެން ތަންތަނަށް ބަދަލުކުރުމުގެ ޕްލޭންތަކެއްވެސް ހިމެނިފައިވާކަމަށް މިއުވާން ވިދާޅުވިއެވެ. މި މައްސަލައާ ގުޅޭގޮތުން، އަމީނީ މަގުގެ މަސައްކަތް ކުރަމުން އަންނަ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން މީގެ ކުރިން ބުނެފައިވަނީ، އެ ކުންފުނިން އަމީނީ މަގުގައި ހުރި ގަސްތައް ނެގުމަށްފަހު ކުޑަގިރި ޕިކްނިކް އައިލެންޑަށް ބަދަލުކުރުމަށް ނިންމާފައިވާކަމަށެވެ. އަދި މަގު ހަދައި ނިމުމުން އެ މަގުގައި ގަސް އިންދެން ހުންނަ ތަންތަނުގައި ގަސްތައް އިންދާނެ ކަމަށްވެސް ވަނީ ބުނެފައެވެ.