ނާސާގެ ކުރީގެ އެސްޓްރޮނޯޓް ހައިޑީއާއެކު "މީޓް އެންޑް ގްރީޓް" ހަރަކާތެއް ބާއްވައިފި
މި ހަރަކާތް ބާއްވާފައިވަނީ ރާއްޖޭގައި ހުންނަ އެމެރިކަން ސެންޓަރާއި، ސަގާފީ ތަރިކަ ރައްކާތެރިކުރާ ގައުމީ މަރުކަޒާއި، ދިވެހިރާއްޖޭގެ ގައުމީ ކުތުބުޚާނާ ގުޅިގެން
ނާސާގެ ކުރީގެ އެސްޓްރޮނޯޓް ހައިޑީ
ނާސާގެ ކުރީގެ އެސްޓްރޮނޯޓެއްކަމަށްވާ ހައިޑީ މެރީ ސްޓެފަނިޝީން ޕައިޕާރއާއެކު "މީޓް އެންޑް ގްރީޓް" ބާއްވައިފިއެވެ.
ހޮނިހިރު ދުވަހު ބޭއްވި އެ ހަރަކާތް ބާއްވާފައިވަނީ ދިވެހިރާއްޖޭގައި ހުންނަ އެމެރިކަން ސެންޓަރު އަދި ހެރިޓޭޖް މިނިސްޓްރީގެ އިތުރުން، ގައުމީ ކުތުބުޚާނާ ގުޅިގެންނެވެ. ނޭޝަނަލް އާޓް ގެލަރީގައި ކުރިއަށް ގެންދިޔަ މި ހަރަކާތުގައި ގިނަ އަދަދެއްގެ ކުޑަކުދިންނާއި ޒުވާނުން ވަނީ ބައިވެރިވެފައެވެ. ޒުވާން ކުދިންގެ މެދުގައި ޖައްވީ ކަންކަމަށް ޝައުގު އުފެއްދުމުގެ މަގުސަދުގައި ކުރިއަށްގެންދިޔަ މި ހަރަކާތުގައި ނާސާގެ ކުރީގެ އެސްޓްރޮނޯޓް އަދި ނޭވީ ކެޕްޓަން، ހައިޑީ މެރީ ވަނީ އޭނާ މަސައްކަތުގެ ދާއިރާއަށް ނުކުތް ގޮތް ހިއްސާކުރައްވާފައެވެ. އަދި އޭނާ އެ ދާއިރާއަށް ނުކުތުމުގެ ކުރިން ސިފައިންގެ ނޭވީގައި ހޭދަކުރި ދުވަސްތަކުގެ ތަޖުރިބާ އޭނާ ވަނީ ހިއްސާކޮށްފައެވެ. މީގެ އިތުރުން އޭނާއަށް އެ ދާއިރާގައި ދިމާވި ގޮންޖެހުންތައް އޭނާ ވަނީ ހިއްސާކޮށްފައެވެ.
އޭނާ ބުނީ އެއްވެސް އިރެއްގައި އެސްޓްރޮނޯޓްއަކަށް ވެވިދާނެކަމަށް ކުރިން ހީނުކުރާކަމަށާއި، އެފަދަ ކަމަކަށް އުންމީދުވެސް ނުކުރާ ކަމަށެވެ. އެހެންނަމަވެސް ކުރަން ބޭނުންވެގެން ކޮށްފިނަމަ ކާމިޔާބުކަމާއެކު ކޮންމެ ކަމެއްވެސް ކުރެވޭނެކަމަށް އޭނާ ބުންޏެވެ. އެފަދަ ކަމެއް ހާސިލް ކުރެވޭނީ ބުރަ މަސައްކަތުން ކަމަށާއި، ހިތްވަރު ދޫކޮށްނުލައި މަސައްކަތްކުރުމަކީ ވަރަށް މުހިންމު ކަމެއްކަން އޭނާ ވަނީ ފާހަގަކޮށްފައެވެ.
މި މީ"ޓް އެންޑް ގްރީޓް" ހަރަކާތް ކުރިއަށް ގެންގޮސްފައި ވަނީ ގާތްގަނޑަކަށް 2 ގަޑިއެއްހާ އިރަށެވެ.
