އިންޑިޔާގެ މަޝްހޫރު ސުޕަރ ސްޓަރ އަމީތާބް ބައްޗަން އަށް މި އޮކްޓޯބަރު މަހުގެ 11 ވަނަ ދުވަހު 80 އަހަރު ފުރޭއިރު، އެ މުނާސަބަތު ފާހަގަކުރުމަށް ޚާއްސަ ފޮޓޯ މައުރަޒަކާ އެކު އަމީތާބުގެ ކުރީގެ ފިލްމުތައް ދައްކާލުން ކުރިއަށް ގެންދާގޮތަށް ހަމަޖައްސައިފިއެވެ.

ހިލޭ ސާބަހަށް މަސައްކަތް ކުރާ ޖަމިއްޔާއެއްކަމަށްވާ ފިލްމު ހެރިޓޭޖް ފައުންޑޭޝަނުން އިންތިޒާމު ކޮށްގެން ބާއްވާ ފެސްޓިވަލް ފެށުމަށް ހަމަޖެހިފައިވަނީ 8 އޮކްޓޯބަރު ވާ ހޮނިހިރު ދުވަހު އެވެ. ހަތަރު ދުވަހަށް ދެމިގެންދާ މި ޚާއްސަ ފެސްޓިވަލުގައި އިންޑިޔާގެ 17 ސިޓީއެއްގެ 22 ސިނަމާއެއްގައި އަމީތާބުގެ ކުރީގެ 60 ފިލްމެއް ދެއްކޭނެ އެވެ. ހަމަ އެއާއެކު އެކީ އަމީތާބުގެ ކުރިން ނުފެންނަ ކުރީގެ 50 ފޮޓޯއެއްގެ ޚާއްސަ މައުރަޒެއް ވެސް ފިލްމު އަޅުވާ ސިޓީއެއްގައި ކުރިއަށް ދާނެ ކަމަށް ޚަބަރު ލިބެއެވެ. މި ފޮޓޯތަކަކީ ފިލްމު ހިސްޓޯރިއަން އެއްކަމަށްވާ އެސް.އެމް.އެމް އައުސަޖާ ތިރީހަކަށް އަހަރު ދުވަހުގެ ތެރޭ އެއްކޮށްފައި ހުރި ފޮޓޯތަކެއް ކަމަށް ވެއެވެ. އައުސަޖާ އަކީ ބޮލީވުޑް ފިލްމުތަކާ ބެހޭ ގޮތުން އެތައް ފޮތެއް ވެސް ނެރެފައިވާ ހިސްޓޯރިއަން އެކެވެ. އަދި "ބޮލީވުޑް ތުރޫ ޕޯސްޓަރސް" މިނަމުގައި ހުސް ފިލްމު ޕޯސްޓަރު ހިމަނައިގެން ވެސް ވަރަށް ކާމިޔާބު ފޮތެއް އޭނާ ނެރެފައިވެއެވެ.

އަމީތާބް ބައްޗަން އަކީ މިއަދު ހިންދީ ފިލްމު ކުޅުމުގެ އިތުރުން ތަފާތު އެތައް ދާއިރާއަކުން މަޝްހޫރު ފަންނާނެކެވެ.