އާރްވީއެސްއޭ ވިމެންސް ހޭންޑް ބޯލް ޓޯނަމެންޓް ފަށައިފި

ހއ ހޯރަފުށީ އާރުވީ ސްޕޯޓްސް އެކަޑަމީން އިންތިޒާމުކުރާ އާރްވީއެސްއޭ ވިމްނެސް ހޭންޑް ބޯލް ޓޯނަމެންޓް ފަށައިފިއެވެ.

މުބާރާތް ފަށާފައިވަނީ ހުކުރު ދުވަހުގެ ހަވީރު ހޯރަފުށީގައެވެ. މުޅި ހއ އަތޮޅަށް ހުޅުވާލައިގެން ކުރިއަށްގެންދާ މި މުބާރާތުގައި ފަސް ޓީމަކުން ވާދަކުރެއެވެ. މިފަހަރުގެ މުބާރާތުގައި ވާދަކުރަނީ ހޯރަފުށީގެ ތިން ޓީމަކާއި އިހަވަންދޫ އަދި މާރަންދޫއިން ޓީމެކެވެ. މުބާރާތް ކުޅޭނީ ލީގު އުސޫލަށެވެ. ފައިނަލްގައި ވާދަކުރާނީ ލީގު ބުރުގައި އެންމެ ރަނގަޅު ނަތީޖާ ހޯދާ ދެޓީމެވެ.

މުބާރާތުގެ ފުރަތަމަ ދުވަހުގައި ދެމެޗު ކުޅުނެވެ. ފުރަތަމަ މެޗުގައި ބައްދަލުކުރީ 22 ސްޕޯޓްސް ކްލަބާއި ޓީމް މާރަންދޫއެވެ. މި މެޗު 13-14ން ކާމިޔާބުކުރީ އެންމެ ފަހުގެ ޗެމްޕިއަން 22 ސްޕޯޓްސް ކްލަބެވެ. މެޗުގެ މޮޅު ކުޅުންތެރިއަކީ 22 ސްޕޯޓްސް ކްލަބްގެ ރޫނާއެވެ.

ދެވަނަ މެޗުގައި އިމަގުގެ މައްޗަށް އެފްސީ ފްރިގޭޓާ ކުރިހޯދީ 04-11ންނެވެ. މެޗުގެ މޮޅު ކުޅުންތެރިއަކަށް ހޮވުނީ ފްރިގޭޓާގެ އައިޝަތު ޝާލީއެވެ.

މިއީ އާރްވީއެސްއޭ ވިމްނެސް ހޭންޑް ބޯލް ޓޯނަމެންޓް ކުރިއަށް ގެންދާ ދެވަނަ ފަހަރެވެ. ފުރަތަމަ މުބާރާތް ކުރިއަށް ގެންދިޔައީ ހަމައެކަނި ހޯރަފުށީގެ ޓީމުތަކަށް ހުޅުވާލައިގެންނެވެ. އެމުބާރާތުގެ ޗެމްޕިއަންކަން ހޯދީ 22 ސްޕޯޓްސް ކްލަބެވެ. މ,ިފަހަރުގެ މުބާރާތް ކުރިއަށްދާނީ މި މަހުގެ 13ގެ ނިޔަލަށެވެ. މުބާރާތް އިންތިޒާމުކުރުމުގައި ހޯރަފުށީ ކައުންސިލާއި ހޭންޑްބޯލް މޯލްޑިވްސްވެސް ވަނީ އާރުވީ ސްޕޯޓްސް އެކަޑަމީއާއި ގުޅިފައެވެ.