ޕީއެސްޖީ އާއި ބެންފިކާ އެއްވަރު، މެސީއަށް ރެކޯޑެއް

ޔުއެފާ ޗެމްޕިއަންސް ލީގުގައި ބެންފިކާ އާއި ޕީއެސްޖީ ބައްދަލުކުރި މެޗު އެއްވަރުވިއިރު, ޕީއެސްޖީގެ ލިއޮނެލް މެސީ ރެކޯޑެއް ހަދައިފިއެވެ.

ބެންފިކާގެ ދަނޑުގައި ބުދަ ދުވަހުގެރޭ ކުޅުނު މި މެޗު ނިމުނީ 1-1ން އެއްވަރު ވެގެންނެވެ. މެޗުގައި ފުރަތަމަ ލަނޑުޖަހާ ލީޑު ނެގީ ޕީއެސްޖީންނެވެ. ނޭމާ އާއި އެމްބާޕޭގެ އެހީތެރިކަމާއެކު މެޗުގެ 22 ވަނަ މިނެޓުގައި ޕީއެސްޖީއަށް މި ލަނޑު ކާމިޔާބުކޮށްދިނީ މެސީއެވެ. މި ލަނޑާއެކު މެސީ ވަނީ ޗެމްޕިއަންސް ލީގުގައި 40 ޓީމާއި ދެކޮޅަށް ލަނޑުޖެހި ފުރަތަމަ ކުޅުންތެރިޔާއަށް ވެފައެވެ.

މެސީގެ މި ރެކޯޑާއެކުވެސް ޕީއެސްޖީ މެޗުން މޮޅު ނުވިއެވެ. ފުރަތަމަ ހާފުގެ 41 ވަނަ މިނެޓުގައި ޕީއެސްޖީގެ ޑެނީލޯ ޕެރޭރާ އަތުން ބައިކޮޅަށް ގޯލެއް ވަދެ, މެޗު ނިމުނީ ދެޓީމު އެއްވަރުވެގެންނެވެ.

މި މެޗުގެ ދެވަނަ ހާފުގައިވެސް ލަނޑުޖަހާނެ ގިނަ ފުރުސަތުތަކެއް ޕީއެސްޖީއަސް ލިބުނެވެ. ނަމަވެސް ނޭމާ އާއި އަޝްރަފް ހަކީމީ އަދި އެމްބާޕޭ އުފެއްދި ހަމަލާތަކުގެ ހުރަހަކަށްވީ ބެންފިކާގެ ކީޕަރު އޮޑިސޭސް ލަޗޯޑިމޯސްއެވެ.

މި މެޗުން މޮޅުވެގެން ޕީއެސްޖީގެ ކޯޗު ކްރިސްޓޮފް ގަލްޓިއޭއަށްވެސް ރެކޯޑަކާއި އަރާ ހަމަކުރެވެން އޮތެވެ. އެއީ ޓީމުގެ ކޯޗުކަމާއި ހަވާލުވެ, ފުރަތަމަ ކުޅުނު ތިން މެޗުން މޮޅުވި ތިންވަނަ ކޯޗުގެ މަޤާމެވެ. ނަމަވެސް މެޗުން އެއްވަރުވުމުން ގަލްޓިއޭއަށް ވަނީ އެފުރުސަތު ގެއްލިފައެވެ.

މެޗުން މޮޅު ނުވެވުނު ނަމަވެސް ޕީއެސްޖީ އޮތީ ގްރޫޕްގެ އެއްވަނަ މަޤާމުގައެވެ. ދެވަނާގައި އޮތް ބެންފިކާއަށްވެސް ތިން މެޗުން ލިބެނީ 7 ޕޮއިންޓެވެ. ޕީއެސްޖީއަށް ކުރި ލިބެނީ ފައިދާ ގޯލުންނެވެ. ތިންވަނާގައި އޮތް ޔުވެންޓަސްއަށް ތިން ޕޮއިންޓު ލިބިފައި ވާއިރު, ތާވަލުގެ ފުލުގައި އޮތް މަކާބީ ހައިފާއަށް ޕޮއިންޓެއް ނުލިބެއެވެ.