ހިތަދޫގެ ރައްޔިތުން ބުނަނީ ގޮނޑުދޮށް ހިމާޔަތް ނުކޮށް ވޯޓު ހޯދަން އައުން ރަނގަޅެއް ނޫނޭ: ނިޒާރު
އެމްޓީސީސީގެ އަމާޒަކީ މި މަޝްރޫޢުގެ މަސައްކަތް 5 މަސް ދުވަސްތެރޭގައި ނިންމުން
އަލީ ނިޒާރު
ހިތަދޫގެ ގޮނޑުދޮށް ހިމާޔަތް ނުކޮށް ވޯޓު ހޯދަން އައުން ރަނގަޅެއް ނޫން ކަމަށް ހިތަދޫގެ ރައްޔިތުން ބުނަމުންދާ ކަމަށް އައްޑޫ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
ބުދަ ދުވަހު، ސ. ހިތަދޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ ޢަމަލީ މަސައްކަތް ފެށުމުގެ ރަސްމިއްޔާތުގައި ވާހަކަދައްކަވަމުން ނިޒާރު ވަނީ އެއީ ހިތަދޫގެ ރައްޔިތުން ގިނަ ދުވަހު ކުރަމުން އައި އުންމީދެއް ފުރިހަމަކުރުމަށް ލިބޭ ފުރުސަތެއް ކަމަށް ވިދާޅުވެފައެވެ. ހިތަދޫގެ ގޮނޑުދޮށް ހިމާޔަތް ނުކުރެވި ބައެއް ސަރަހައްދުތަކަށް އުދަ އެރުމުގެ ސަބަބުން ހިތަދޫގެ ބައެއް ސަރަހައްދުތަކަށް ވަރަށް ބޮޑަށް ގެއްލުންވަމުންދާ ކަމަށް ވެސް އޭނާ ވިދާޅުވިއެވެ. މި މައްސަލަ އަކީ ޒަމާންވީ މައްސަަލައެއް ކަމަށް ވާއިރު ގޮނޑުދޮށް ހިމާޔަތް ނުކޮށް އޮތުމުގެ ސަބަބުން ގޮނޑުދޮށާއި ކައިރީގެ ގޭގޭގައި ދިރިއުޅެމުންދާ ރައްޔިތުން ދިރިއުޅެން ޖެހިފައި ވަނީ ވަރަށް ބޮޑެތި ތަކުލީފުތަކެއްގައި ކަމަށް ނިޒާރު ވިދާޅުވިއެވެ.
އެ ސަރަހައްދުގެ ހުރިހާ ގެއަކަށް ވަކިވަކިން ޒިޔާރަތްކޮށްފައިވާ ކަމަށާއި އެ ސަރަހައްދުގެ މީހުން އެދެނީ އެ މަޝްރޫޢު ފުރިހަމަނުކޮށް ވޯޓު ހޯދަން ނައުން ކަމަށް ނިޒާރު ވިދާޅުވިއެވެ.
ހިތަދޫގެ ބަނދަރު ހެދުމުގެ މަޝްރޫޢުގެ އަމަލީ މަސައްކަތް ފަށާފައި ވަނީ ހޯމަ ދުވަހު އެކަމަށްޓަކައި ހިތަދޫގެ އެންމެ ބޮޑަށް ގިރާ، އުދަ އެރުމުގެ މައްސަލަ ދިމާވަމުންދާ ސަރަހައްދުގައި ބޭއްވި ރަސްމިއްޔާތެއްގައެވެ. މި މަސައްކަތް ވީހާވެސް އަވަހަށް ނިންމާދިނުމަކީ އެ ސަރަހައްދުގެ ރައްޔިތުންގެ ވަރަށް ބޮޑު އުންމީދަކަށް ވާއިރު، އެ މަސައްކަތް އަވަސްކޮށް، އަންނަ އަހަރުގެ ފުރަތަމަ ކުއާޓާގެ ތެރޭގައި ނިންމާނެ ކަމަށް އެމްޓީސީސީ އިން ވަނީ ބުނެފައެވެ. އެމްޓީސީސީގެ އަމާޒަކީ މި މަޝްރޫޢުގެ މަސައްކަތް 5 މަސް ދުވަސްތެރޭގައި ނިންމުމެވެ.
