އެމްޓީސީސީ އިން މި ސަރުކާރުގައި 94 މަޝްރޫޢު ނިންމައިފި، ނިންމީ އިންތިޚާބަކަށް ނޫން: އާޒިމް
6 އޮކްޓޯބަރު 2022 | ބުރާސްފަތި 04:15މި ސަރުކާރަކީ ހަމައެކަނި އިންތިޚާބުތަކަށް ފޮޅޭ މަލެއް ނޫން: އާޒިމް
އާދަމް އާޒިމް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ އެމްޓީސީސީ އިން ފާއިތުވި 4 އަހަރު ދުވަސް ތެރޭގައި 94 ވަރަކަށް މަޝްރޫޢު ނިންމާފައިވާ ކަމަށާއި، އެއިން އެއްވެސް މަޝްރޫޢުއެއް ނިންމާފައި ވަނީ އިންތިޚާބަކާއި ދިމާކޮށް ނޫން ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
އައްޑޫސިޓީގެ ސ.ހިތަދޫ ގޮނޑުދޮށް ހިމާޔަތްކުރުމުގެ މަޝްރޫޢު ފެއްޓުމުގެ ރަސްމިއްޔާތުގައި ވާހަކަދައްކަަވަމުން އާޒިމް ވަނީ މަޝްރޫޢުތަކާއި މެދު އާއްމުންގެ ހުރި ބައެއް ކަންބޮޑުވުންތަކަށް އަލިއަޅުވާލައްވާފައެވެ. އެގޮތުން ބައެއް ފަހަރު ރަށްރަށުގެ މަޝްރޫޢުތައް ކުރިއަށް ގެންދަނީ އިންތިޚާބުތަކަށް އަމާޒުކޮށްގެން ކަމަށް ބުނެ ފާޑުކިޔުން އަމާޒުވާކަމަށް އާޒިމް ވަނީ ވިދާޅުވެފައެވެ.
ހަމައެހެންމެ ރަށްރަށުގައި މުހިންމު ޕްރޮޖެކްޓްތައް ފެށި ނަމަވެސް އެ ޕްރޮޖެކްޓްތައް ކަނޑައަޅާ މުއްދަތުގައި ނިންމާނެކަމާއި މެދު ބައެއް ފަހަރު އާއްމުން ސުވާލު އުފައްދާކަން ފާހަގަކުރައްވާ އާޒިމް ވިދާޅުވީ ރައްޔިތުން އެގޮތަށް ސުވާލުކުރަނީ ކުރީގެ ސަރުކާރުތަކުން ކަންކަން ކޮށްދޭނެ ކަމަށް ވައުދުވުމަށް ފަހު އެ ވައުދުތައް ފުއްދަމުން ނުދާތީ ކަމަށެވެ. އެހެންނަމަވެސް މި ސަރުކާރަކީ އެގޮތަށް އަމަލުކުރާނެ ބައެއް ނޫން ކަމަށާއި މި ސަރުކާރުން މަޝްރޫޢުތައް ފަށަނީ ކެމްޕެއިންތަކާއި ދިމާކޮށް އެކަނި ނޫން ކަމަށް އާޒިމް ވިދާޅުވިއެވެ. އާޒިމް ވިދާޅުވީ މި ސަރުކާރުން ތިބެނީ އަބަދުވެސް މަޝްރޫޢުތައް ފަށަފަށާ ކަމަށެވެ.
އާޒިމް ވިދާޅުވީ އެމްޓީސީސީ އިން އެ ކުންފުންޏާއި ހަވާލުކުރާ ކޮންމެ މަސައްކަތެއް ވެސް އެ މަސައްކަތެއްގެ މުއްދަތުގައި ނިންމާލެވޭތޯ ވަރަށް ބޮޑު ސަމާލުކަމެއް ދޭ ކަމަށެވެ. އަދި ޕްލޭނިން މިނިސްޓްރީ އިން އެމްޓީސީސީ އަށް އިތުބާރުކޮށް އެ ކުންފުންޏާއި ގިނަ މަޝްރޫޢުތަކެއް ހަވާލުކޮށްފައިވާކަން އާޒިމް ވިދާޅުވިއެވެ. މީގެ އިތުރުން މި ސަރުކާރަކީ ކަމެއްކޮށްދޭނެ ކަމަށް ވައުދުވެއްޖެ ނަަމަ އެކަމެއް ކޮށްދޭނެ ސަރުކާރެއް ކަަމަށް ފާހަގަކުރައްވާ އާޒިމް ވަނީ ސަރުކާރާއި ރައީސް އިބްރާހިމް މުހައްމަދު ޞާލިހު އަށް ތައުރީފްކުރައްވާފައެވެ.
