ކުޅުދުއްފުށީ ހުކުރު މިސްކިތަށް ގެއްލުން ދީފި
މިސްކިތަށް ގެއްލުން ދީފައިވަނީ އާދީއްތަ ދުވަހުގެ ރޭ
ކުޅުދުއްފުށީގެ ހުކުރު މިސްކިތަށް ގެއްލުން ދީފައި
ކުޅުދުއްފުށި ސީޓިގެ ހުކުރު މިސްކިތް މަރާމާތުކުރުމުގެ މަސައްކަތް ކުރިއަށް ދަނިކޮށް ބަޔަކު އެތަނަށް ގެއްލުން ދީފިއެވެ.
ކުޅުދުއްފުށި ސިޓީގެ މޭޔަރު މުހައްމަދު އާތިފް ކުރެއްވި ޕޯސްޓެއްގައި ވިދާޅުވީ އެ މިސްކިތަށް ބަޔަކު ގެއްލުން ދީފައިވާ ކަމަށެވެ. އަދި ގެއްލުން ދީފައިވަނީ މިދިޔަ އާދީއްތަ ދުވަހުގެ ރޭ ކަމަށް ވެސް އޭނާ ވިދާޅުވިއެވެ.
މޭޔަރު ވިދާޅުވީ މިސްކިތުގެ ތަޅުމުގެ މަތީގައި ސިމެންތި ޖަހައި ނުހިކި ހުއްޓައި، ތަޅުން މައްޗަށް ފެން ހޮޅިއެއް ދޫކޮށްލައި ތަޅުމުގައި އެކި އެއްޗެހި ލިޔެފައިވާ ކަމަށެވެ. މިއީ ނާތަހުޒީބު އަމަލެއް ކަމަށާއި އެފަދަ އަމަލުތަކުގެ ސަބަބުން ރައްޔިތުންނަށް މާލީ ގޮތުންނާއި އެހެނިހެން ގޮތްގޮތުން ބޮޑެތި ގެއްލުންވެ، ރަށުގެ ތަރައްގީ އަށް ހުރަސްއެޅެމުންދާ ކަމަށް ވެސް އޭނާ ވިދާޅުވިއެވެ.
މީގެ އިތުރުން އެފަދަ އަމަލުތައް ހިންގިޔަސް، ރަށުގެ ތަރައްގީ އާއި ރައްޔިތުންގެ ހެވާއި ލާބައަށް ސިޓީ ކައުންސިލުން މަސައްކަތްކުރުމުގައި ދެމި އޮންނާނެ ކަމަށް ވެސް މޭޔަރު ވިދާޅުވިއެވެ.
މި މައްސަލަ މިހާރު ވަނީ ފުލުހުންނަށް ހުށަހަޅާފައެވެ.
