ޑްރަގްގެ ވަބާއާއި، މާރާމާރީފަދަ ކުށްތަކަކީ ފަތުރުވެރިކަމުގެ ކުރިއެރުމަށް ހުރި ހުރަސްތަކެއްކަމަށް ޖުމްހޫރީ ޕާޓީގެ ލީޑަރު، އަދި ފަތުރުވެރިކަމުގެ ދާއިރާގައި ގިނަ ޚިދުމަތްތަކެއް ކުރައްވާފައިވާ ޤާސިމް އިބްރާހިމް ވިދާޅުވެއްޖެއެވެ.

ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ރާއްޖެޓީވީން ގެނެސްދިން "ރަން 50" ކަވަރޭޖަށް ދެއްވި ޚާއްސަ އިންޓަރވިއުއެއްގައި ޤާސިމް ވިދާޅުވީ، ފަތުރުވެރިކަން ދެމެހެއްޓުމަށްޓަކައި ތިމާވެށި ރައްކާތެރި ކުރުން މުހިއްމު ކަމަށެވެ. އެގޮތުން ޤާސިމް ވިދާޅުވީ، އަަބަދުވެސް ކަނޑުތަކާއި ފަރުތައް ސާފުކޮށް، ސާފު ތިމާވެއްޓެއް އޮތުމަކީ ދުނިޔޭގެ މާކެޓުގައި ރާއްޖެއަށް އިތުރު ޖާގަ ލިބިގެންދާނެ ކަމެއް ކަމަށެވެ.

ފަތުރުވެރިކަމުގެ ދެމެހެއްޓުމަށްޓަކައި އަހުލާގު ރަނގަޅު މުޖުތަމައެއް އޮތުންވެސް މުހިއްމުކަމަށް ޤާސިމް ވިދާޅުވިއެވެ. އެގޮތުން ޑްރަގްގެ ވަބާއާއި، މާރާމާރީއާއި، މީހުން މެރުން ފަދަ ކަންކަމަކީ ފަތުރުވެރިކަން ކުރިއަރައިގެން އަންނައިރު މި ދާއިރާއަށް ގެއްލުން ކުރާނެ ކަންތައްތައްކަމަށް ކަމަށް ޤާސިމް ވިދާޅުވިއެވެ.

އެ ކަންކަމުގެ އިތުރުން، ދެމެހެއްޓެނިވި ގޮތެއްގައި ފަތުރުވެރިކަން ކުރިއަށް ގެންދިއުމަށްޓަކައި އެކި ކަންކޮޅުތަކުގައި މިހާރު ޤާއިމު ކުރަމުންދާ އެއަރޕޯޓުތަކަކީ ހެޔޮ ފިޔަވަޅަކަށް ވާނެކަމަށް ޤާސިމް ވިދާޅުވިއެވެ.

ގާސިމް ވިދާޅުވީ، އެކި ސަރަޙައްދުތަކުގައި ޤާއިމު ކުރަމުންދާ އެއާޕޯޓުތަކުގެ ސަބަބުން ފަތުރުވެރިންގެ އިތުރުން ދިވެހިންނަށް ވެސް އޭގެ މަންފާ އެތައް ގޮތަކުން ކުރާނެ ކަމަށެވެ. އެހެންނަމަވެސް އެންމެ އެދެވޭ ގޮތެއްގައި އެއާޕޯޓުތައް އަދި އޮޮޕަރޭޓު ނުކުރާކަން ވެސް ޤާސިމް ވަނީ ފާހަގަ ކުރައްވާފައެވެ.