އަދާލަތާއެކު ލިބިވަޑައިގަތްވަރަށް، "ފިކުރެއްގެ ދިރުމަށް" ގާސިމަށް ވޯޓު ހޯދައެއްނުދެވޭނެ: އަލީ ނަޒީރު
15 މާރިޗު 2023 | ބުދަ 15:56ޖޭޕީން ވަނީ ވަކިން ވާދަކުރަން ނިންމާފައި
އަލީ ނަޒީރު
އަދާލަތު ޕާޓީއާއެކު މަސައްކަތްކޮށްގެން ގާސިމް އިބްރާހީމަށް ލިބިވަޑައިގަތް ވަރަށް، ކުރިއަށް އޮތް ރިޔާސީ އިންތިޚާބުގައި "ފިކުރެއްގެ ދިރުމަށް" ވޯޓު ހޯދައިނުދެވޭނެ ކަމަށް، އަދާލަތު ޕާޓީގެ ތަރުޖަމާނު އަލީ ނަޒީރު ވިދާޅުވެއްޖެއެވެ.
ހޯމް މިނިސްޓްރީގެ ސްޓޭޓް މިނިސްޓަރުގެ މަގާމުވެސް އަދާކުރައްވަމުން ގެންދަވާ އަލީ ނަޒީރު މިފަދައިން ވިދާޅުވީ، ކުރިގެ ރައީސް މުހައްމަދު ނަޝީދުގެ "ފިކުރެއްގެ ދިރުން"ގައި ހިމެނޭ ފަރާތްތަކުން ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީގެ ލީޑަރު ގާސިމް އިބްރާހީމަށް ތާއީދުކުރަން ނިންމާފައިވާކަމަށް ޚަބަރު ފެތުރިފައިވަނިކޮށެވެ.
އަންގާރަ ދުވަހު ޖޭޕީން ވަނީ، މިއަހަރުގެ ރިޔާސީ އިންތިޚާބުގައި އެ ޕާޓީން ވާދަކުރާނީ އެ ޕާޓީ އިސްވެ އޮވެ އުފައްދާ ކޯލިޝަނަކާއެކު ކަމަށް ބުނެފައެވެ. އެހެންކަމުން ފިކުރެއްގެ ދިރުން ޓީމުން އެ ޕާޓީއާއެކު ކޯލިޝަން ހަދަން ނިންމާފައިވާކަމުގެ އަޑުތައް ވަނީ ފެތުރިފައެވެ.
އަލީ ނަޒީރު ކުރެއްވި ޓްވީޓެއްގައި ވިދާޅުވީ, އަދަދުތައް ބޭނުންގޮތަކަށް ލިޔެ އެތުރިދާނެ ކަމަށާއި, ނަމަވެސް ޑރ. ހަސަން ރަނިންގ މޭޓަކަށް ލައްވައިގެން, އަދާލަތު ޕާޓީއާއެކު މަސައްކަތްކުރައްވައިގެން ލިބިވަޑައިގެންނެވި މިންވަރަށް މިހާރުގެ ޓީމާއި ފިކުރެއްގެ ދިރުން ޓީމަށް ވޯޓު ހޯދައިނުދެވޭނެކަން ގާސިމަށްވެސް އެނގިވަޑައިގަންނަވާނެ ކަމަށެވެ.
ޖޭޕީން މިއަހަރުގެ ރިޔާސީ އިންތިޚާބުގައި ވަކިން ވާދަކުރަން ނިންމާފައިވާއިރު، އެ ޕާޓީއަކީ މިހާރު ވެރިކަންކުރާ ކޯލިޝަނުގެ ހިއްސާއެކެވެ. އެގޮތުން އެ ޕާޓީގެ ގިނަ މެމްބަރުންތަކެއް ސަރުކާރުގެ އިސް މަގާމުތަކުގައި އެބަތިއްބެވިއެވެ.
