ރައީސުލްޖުމްހޫރިއްޔާ އިބްރާހީމް މުހައްމަދު ސާލިހާ ބައްދަލުކުރެއްވުމަށް ޖުމްހޫރީ ޕާޓީގެ ލީޑަރު ގާސިމް އިބްރާހީމް ރައީސް އޮފީހަށް ވަޑައިގެންފިއެވެ.
ގާސިމް ރައީސް އޮފީހަށް ވަޑައިގެންނެވިކަން ޖުމްހޫރީ ޕާޓީގެ ސްޕޯކްސްޕާސަން އަލީ ސާލިހު ވަނީ ކަށަވަރުކޮށްދެއްވާފައެވެ.
ރައީސްއާ ބައްދަލުކުރައްވަނީ ރިޔާސީ އިންތިޚާބަށް ކޯލިޝަން ހެދުމާއި ގުޅޭ މަސްވަރާ ކުރެއްވުމަށްތޯ ރާއްޖެއެމްވީން ސުވާލުކުރުން އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވީ އެކަމުގެ ތަފްސީލު އަދި އެނގިވަޑައިގައިނުގަންނަވާ ކަމަށެވެ. އެހެންނަމަވެސް ތަފްސީލު ލިބުމުން ހިއްސާ ކުރައްވާނެ ކަމަށެވެ.
ގާސިމް ރައީސާ ބައްދަލުކުރެއްވުމަށް ވަޑައިގެންފައިވާއިރު މިއަހަރު ބާއްވާ ރިޔާސީ އިންތިޚާބުގައި ޖުމްހޫރީ ޕާޓީ (ޖޭޕީ) އިން ވަކިން ވާދަކުރުމަށް އެ ޕާޓީގެ ކައުންސިލަށް ވަނީ ލަފާދީފައެވެ. ރިޔާސީ އިންތިޚާބުގެ ފުރަތަމަ ބުރުގައި ޖޭޕީގެ ރިޔާސީ ކެނޑިޑޭޓެއް ވާދަކުރުމަށް ނުވަތަ އެ ޕާޓީ އިސްވެ އުފައްދާ ކޯލިޝަނަކުން ރިޔާސީ އިންތިޚާބުގައި ވާދަކުރުމަށް ގޮވާލައި ރައްޔިތުންގެ މަޖިލީހުގެ ތިނަދޫ ދެކުނު ދާއިރާގެ ކުރީގެ މެންބަރު އަބްދުﷲ އަހުމަދު ހުށަހެޅުއްވި ގަރާރަށް ބަހުސްކޮށް ވޯޓު ނަގައިފައިވެއެވެ.
ރިޔާސީ އިންތިޚާބާ މެދު ޖޭޕީން އަމަލު ކުރާނެ ގޮތް ނިންމާނީ އެ ޕާޓީގެ ގައުމީ ކޮންފަރެންސް އިން އިންތިޚާބުކުރާ އައު ކައުންސިލުންނެވެ.
ޖޭޕީއަކީ މިހާރު އޮތް ސަރުކާރުގެ ކޯލިޝަން ބައިވެރިއެކެވެ. އަދި ނައިބު ރައީސް ފައިސަލް ނަސީމަކީ އެ ޕާޓީގެ ބޭފުޅެކެވެ. ސަރުކާރުގެ އިސް މަގާމުތަކުގައި ވެސް އެ ޕާޓީގެ ބޭފުޅުން ތިއްބަވައެވެ.
