މިއީ ފުޓުބޯޅަ އަށް ލޯބިކުރާ އެންމެނަށް ކަޅު ދުވަހެއް: އިންފަންޓީނޯ

އިންޑޮނޭޝިއާ ލީގުގައި ކުޅުނު ފުޓުބޯޅަ މެޗެއްގެ ތެރެއިން ހިނގި ހާދިސާ ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ހަރުކަށި އިބާރާތުން ކުށްވެރިކޮށްފިއެވެ.

އިންޑޮނޭޝިއާގެ އަރެމާ އާއި ޕާސެބަޔާ ސުރަބަޔާ ދެމެދު ކުޅުނު މެޗުން އަރެމާ ބަލިވުމުން، ސަޕޯޓަރުން ވަނީ ދަނޑަށް އަރައިގަތުމަށް މަސައްކަތްކޮށްފައެވެ. އެ ސަޕޯޓަރުން ހުއްޓުވުމަށް ފުލުހުން ވަނީ ޓިއަރ ގޭސް ބޭނުކޮށްފައެވެ. އަދި ޓިއަރ ގޭސް ބޭނުން ކުރުމުން، ސްޓޭޑިއަމުން ނުކުތުމަށް ސަޕޯޓަރުން އުޅުމުގެ ތެރޭގައި ތޮއްޖެހި، ނޭވާހާސްވެ ހިނގި މި ހާދިސާގައި އެތައް ބަޔަކު މަރުވެ، ގިނަ ބަޔަކު ވަނީ ޒަޚަމްވެފައެވެ. އޭގެ ތެރޭގައި ސަޕޯޓަރުންނާއި، ސަލާމަތީ ކަންކަން ބެލެހެއްޓުމުގައި ހަރަކާތްތެރިިވި ފުލުހުން ހިމެނެއެވެ.

މި ހާދިސާގައި މިހާތަނަށް 174 މީހުން މަރުވެ، 180 އަށްވުރެ ގިނަ މީހުންނަށް އަނިޔާވެފައިވާ ކަމަށް ރިޕޯޓުތައް ބުނެއެވެ.

މިކަމާ ގުޅިގެން ފީފާގެ ރައީސް އިންފަންޓީނޯ ނެރުއްވި ބަޔާނެއްގައި ވިދާޅުވީ، އިންޑޮނޭޝިއާގައި ހިނގި ހާދިސާގެ ސަބަބުން މުޅި ފުޓުބޯޅަ ދުނިޔެ އޮތީ ޝޮކެއްގައި ކަމަށެވެ. މިއީ ފުޓުބޯޅައިގައި ޝާމިލްވާ އެންމެނަށް ވެސް ކަޅު ދުވަހެއްކަން ފާހަގަކޮށް، އިންފަންޓީނޯ ވަނީ އެ ހާދިސާގައި މަރުވި ފަރާތްތަކުގެ އާއިލާ އަށް ތައުޒިޔާ ދަންނަވާފައެވެ. މީގެ އިތުރުން އިންފަންޓީނޯ ވަނީ އިންޑޮނޭޝިއާއަށް ދިމާވި ދަތި އުނދަގޫ ޙާލަތުގައި ފީފާ އާއި މުޅި ދުނިޔޭގެ ފުޓުބޯޅަ އާއިލާ އޮތީ އެ ޤައުމާއެކު ކަމަށް ވިދާޅުވެފައެވެ.

މި ހާދިސާއާ ގުޅިގެން އިންޑޮނޭޝިއާގެ ޗީފް ސެކިޔުރިޓީ އޮފިސަރު މަހްފޫދް ވިދާޅުވީ، ދަނޑުގެ ޖާގައަށް ވުރެ ގިނައިން މީހުން އެ މެޗަށް ވަދެފައިވާ ކަމަށެވެ. އޭނާ ވިދާޅުވީ އެ ދަނޑުގެ ޖާގަ އަކީ 38،000 މީހުން ކަމަށާއި، ނަމަވެސް 42،000 ޓިކެޓު އެ މެޗަށް ދޫކޮށްފައިވާ ކަމަށެވެ. މި ހަމަނުޖެހުމުގައި މީހުންގެ އިތުރުން ބައެއް މުދާތަކަށް ވެސް ވަނީ ގެއްލުން ލިބިފައެވެ. އޭގެ ތެރޭގައި 13 އުޅަނދެއް ހިމެނޭއިރު، 10 އުޅަނދަކީ ފުލުހުންގެ އުޅަނދެވެ.

މި ހާދިސާއާ ގުޅިގެން އެ ޤައުމުގެ ލީގު ވަނީ ހަފްތާއެއްގެ މުއްދަތަށް ސަސްޕެންޑުކޮށްފައެވެ. މީގެ އިތުރުން މި ހާދިސާއާ ގުޅިގެން އެ ޤައުމުގެ ސަރުކާރުން ވަނީ މައާފަށް ވެސް އެދިފައެވެ. އަދި މި މައްސަލަ ފުރިހަމައަށް ތަހުގީގު ކުރާނެ ކަމަށް ވެސް އެ ޤައުމުގެ ސްޕޯޓްސް އެންޑް ޔޫތު މިނިސްޓަރު ޒައިނުއްދީން އަމަލީ ވަނީ ވިދާޅުވެފައެވެ.