މެންޗެސްޓަރ ސިޓީން ޔުނައިޓެޑް ބަލިކުރިއިރު، ހާލަންޑާއި ފޮޑެން ހެޓްރިކް ހެދި

އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑާ ބައްދަލުކުރި މެޗު ބޮޑު ތަފާތަކުން ކާމިޔާބުކޮށްފިއެވެ.

ސިޓީގެ އިއްތިހާދު ސްޓޭޑިއަމްގައި ކުޅުނު މި މެޗު އެޓީމުން ކާމިޔާބުކުރީ 6-3ންނެވެ. މި މެޗުގައި ސިޓީގެ އާލިން ބްރައުޓް ހާލަންޑާއި ފިލް ފޮޑެން ވަނީ ހެޓްރިކް ހަދާފައެވެ.

މެޗުގެ ކުރީކޮޅުގައި ސިޓީން ވަނީ ލަނޑު ޖަހައި ލީޑު ނަގާފައެވެ. ފުރަތަމަ ހާފުގެ އަށްވަނަ މިނެޓުގައި ސިޓީއަށް ލީޑު ނަގައިދިނީ ފިލް ފޮޑެންއެވެ. އޭގެ ފަހުން ހާލަންޑު ވަނީ ކެވިން ޑިބްރައިނާގެ އެހީތެރިކަމާއެކު ހަތަރު މިނެޓުގެ ތެރޭގައި ދެލަނޑު ޖަހައި ސިޓީއަށް ލީޑު ފުޅާކޮށްދީފައެވެ. ފުރަތަމަ ހާފު ނިމެން މިނެޓަކަށް ވެފައިވަނިކޮށް ސިޓީގެ ހަތަރުވަނަ ލަނޑު ޖެހީ ފިލް ފޮޑެންއެވެ. މިއީ ހާލަންޑުގެ އެހީތެރިކަމާއެކު ފޮޑެން ކާމިޔާބުކުރި ލަނޑެކެވެ.

ދެވަނަ ހާފުގައި ޔުނައިޓެޑުން ވަނީ ކުޅުން ރަނގަޅުކޮށް ނަތީޖާ އަނބުރާލުމަށް މަސައްކަތް ކޮށްފައެވެ. އެގޮތުން މެޗުގެ 56 ވަނަ މިނެޓުގައި ކްރިސްޓަން އެރިކްސަން ދިން ޕާހެއް, ޑީއޭރިއާ ބޭރުން ގޯލުގެ ތިރީ ކަނަށް ފޮނުވާލައިގެން އެންތަނީ ވަނީ ޔުނައިޓެޑަށް އުންމީދެއް ހޯދައިދީފައެވެ.

ނަމަވެސް ސިޓީން ވަނީ އިތުރު ދެލަނޑު ޖަހައި ފަރަގު ބޮޑުކޮށްފައެވެ. މެޗުގެ 64 ވަނަ މިނެޓުގައި ސާޖިއޯ ގޮމޭޒް ހުރަސްކޮށްދިން ބޯޅައެއް ގޯލިގެ ތެރެއަށް ފޮނުވާލައިގެން ހާލަންޑު އޭނާގެ ހެޓްރިކް ފުރިހަމަކުރިއެވެ. ހާލަންޑު ވަނީ މި ސީޒަންގެ ޕްރިމިއަރ ލީގުގައި ކުޅުނު އަށް މެޗުގައި 14 ލަނޑު ޖަހާފައެވެ. މި ހެޓްރިކާއެކު ހާލަންޑް ވަނީ ޕްރިމިއަރ ލީގުގައި ދިގު ކެރިއަރެއް އޮތް ކްރިސްޓިއާނޯ ރޮނާލްޑޯއާ އެއް އަދަދަކަށް ހެޓްރިކް ހަދާފައެވެ. ހާލަންޑާއި ރޮނާލްޑޯވެސް ވަނީ ޕްރިމިއަރ ލީގުގައި ތިން ހެޓްރިކް ހަދާފައެވެ.

އޭގެ ނުވަ މިނެޓު ފަހުން ފޮޑެން ވަނީ އޭނާގެ ހެޓްރިކްވެސް ފުރިހަމަކޮށްފައެވެ. މި ލަނޑާއެކު ސިޓީން ވަނީ އެއްފަހަރާ ހަތަރު ބަދަލު ގެނެސް، ޓީމުގެ މުހިންމު ކުޅުންތެރިންތަކަކަށް ރެސްޓް ދީފައެވެ.

ޔުނައިޓެޑުން ފަރަގުކުރީ މެޗުގެ ފަހު ވަގުތުކޮޅުގައެވެ. ޔުނައިޓެޑްގެ ފަހު ދެލަނޑުވެސް ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން ނުކުތް އެންތަނީ މާޝިއަލްއެވެ. ފަހު ލަނޑަކީ މެޗުގެ އިތުރު ވަގުތުގައި ލިބުނު ޕެނަލްޓީއަކުން އޭނާ ޖެހި ލަނޑެކެވެ.

މި މެޗުގައި ޔުނައިޓެޑްގެ ތަރި ކްރިސްޓިއާނޯ ރޮނާލްޑޯ ކުޅޭކަށް ނާރުވައެވެ. މީގެ އިތުރުން ޑިފެންޑަރު ހެރީ މެގުއަރ ޓީމުގެ މެޗު ސްކޮޑުގައިވެސް ނުހިމަނައެވެ. މި ސީޒަންގައި މި ދެކުޅުންތެރިންނަށްވެސް މާ އެދެވޭ ކުޅުމެއް ދެއްކިފައެއް ނުވެއެވެ.

މި ނަތީޖާއާއެކު 20 ޕޮއިންޓު ހޯދައިގެން ސިޓީ އޮތީ ތާވަލުގެ ދެވަނަ މަގާމުގައެވެ. 12 ޕޮއިންޓާއެކު ޔުނައިޓެޑް އޮތީ ތާވަލުގެ ހަވަނަ މަގާމުގައެވެ.

މެންޗެސްޓަރ ޑާބީގައި މިހާތަނަށް އެންމެ ބޮޑު ތަފާތަކުން ޓީމެއް މޮޅުވެފައިވަނީ ފަސް ލަނޑުގެ ތަފާތަކުންނެވެ. ސިޓީން ވަނީ ދެފަހަރެއްގެ މަތިން 6-1, އަދި އެއްފަހަރު 5-0ން ޔުނައިޓެޑް ބަލިކޮށްފައެވެ. ޔުނައިޓެޑް ވަނީ 1994 ވަނަ އަހަރު 5-0ން ސިޓީ ބަލިކޮށްފައެވެ.