ގެއްލިގެން ހޯދަމުން އަންނަ އަޒްހާންގެ ހަށިގަނޑުކަމަށް ބެލެވޭ ހަށިގަނޑެއް ފެނިއްޖެ
ތަހުގީގުގެ ތެރެއިން ހިންގި އޮޕަރޭޝަނެއްގައި މި ހަށިގަނޑު ފެނިފައިވަނީ އާދީއްތަ ދުވަހުގެ ހަވީރު 5:45ހާއިރު
ގެއްލިގެން ހޯދަމުން އަންނަ އަޒްހާން
ހުޅުމާލެއިން ގެއްލިގެން ހޯދަމުން އަންނަ މުހައްމަދު އަޒްހާންކަމަށް ބެލެވޭ މީހެއްގެ ހަށިގަނޑު ފެނިއްޖެއެވެ.
ފުލުހުން ބުނީ ހުޅުމާލެއިން ގެއްލިގެން ހޯދަމުންދާ މުހައްމަދު އަޒްހާންކަމަށް ބެލެވޭ މީހާގެ ހަށިގަނޑު، ތަހުގީގުގެ ތެރެއިން ހިންގި އޮޕަރޭޝަނެއްގައި އާދީއްތަ ދުވަހުގެ ހަވީރު 5:45ހާއިރު ފެނިފައިވާ ކަމަށެވެ.
މި މައްސަލައިގެ އިތުރު ތަފްސީލެއް ފުލުހުން ހާމައެއް ނުކުރެއެވެ. ފުލުހުން ބުނީ އިތުރު މައުލޫމާތު އާދީއްތަ ދުވަހުގެ ރޭގެ ވަގުތެއްގައި ހިއްސާކުރާނެ ކަމަށެވެ.
މިމަހުގެ 19 ވަނަ ދުވަހު ހުޅުމާލެ ދެވަނަ ފިޔަވަހިން ގެއްލިގެން ހޯދަމުން އަންނަ އަޒްހާން އެންމެ ފަހުން ފެނިފައި ވަނީ ހުދު ކާރަކަށް އަރައިގެން ދަނިކޮށްކަމަށް ފުލުހުން ވަނީ މީގެ ކުރިން ބުނެފައެވެ.
އުމުރުން 27 އަހަރުގެ އަޒްހާން ގެއްލިގެން ރިޕޯޓްކޮށްފައިވަނީ ސެޕްޓެމްބަރ 19 ވަނަ ދުވަހުގެ ރޭގަނޑު 7 ޖަހާ އެހާކަންހާއިރުއެވެ. މެރާކީ ކެފޭގައި ބަރިސްތާއެއްގެ ވަޒީފާ އަދާކުރަމުން އަންނަ އަޒްހާން ދިރިއުޅެމުން އައީ ހިޔާ ޓަވަރުގެ ފްލެޓެއްގައި، އޭނާގެ އާއިލާއާއެކުގައެވެ.
މިދިޔަ އާދިއްތަ ދުވަހު ފުލުހުން ބުނީ، ފުލުހުން މިހާތަނަށް ބެލިބެލުމުން، އަޒްހާން އެންމެ ފަހުން ފެނިފައިވަނީ މިދިޔަ ހޯމަ ދުވަހު ފަތިހު ހިޔާ ފްލެޓުގެ 13 ވަނަ ޓަވަރު ކައިރިން ހުދު ކުލައިގެ ޓެކްސީއަކަށް އަރަނިކޮށްކަމަށެވެ. އެ ސަރަހައްދުގެ ސީސީޓީވީ ފުޓޭޖްތައް ބެލުމުން، އެ ދުވަހުގެ ފަތިހު 4:53ހާއިރު އޭނާ ޓެކްސީއަކަށް އަރާ މަންޒަރު ފެނިފައިވާ ކަމަށްވެސް ފުލުހުން ވަނީ ބުނެފައެވެ.
އެހެންކަމުން އިތުރު ފުޓޭޖްތަކުގެ އަލީގައި އެ ކާރު ދެނެގަތުމުގެ މަސައްކަތް ކުރަމުންދާކަމަށް ފުލުހުން ވަނީ ބުނެފައެވެ.
