ފާއިތުވި 24 ގަޑިއިރު އެންމެ ގިނައިން ވާރޭވެހުނީ ހަނިމާދޫއަށް
މޫސުމާބެހޭ ގައުމީ އިދާރާއިން ބުނެފައިވަނީ ކުރިއަށް އޮތް 5 ދުވަހު ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެކަމަށް
މާލެއަށް ބޯކޮށް ވާރޭވެހެނީ
ފާއިތުވި 24 ގަޑިއިރު ރާއްޖޭގެ އެކި ސަރަހައްދުތަކަށް ވިއްސާރަކޮށްފައިވާއިރު، އެންމެ ގިނައިން ވާރޭވެހިގެން ރިކޯޑްކުރެވިފައިވަނީ ހދ. ހަނިމާދޫއަށް ކަމަށް، މޫސުމާބެހޭ ގައުމީ އިދާރާއިން ބުނެފިއެވެ.
އެއިދާރާއިން ހާމަކޮށްފައިވާ ތަފާސްހިސާބުތަކަށް ބަލާއިރު، ހަނިމާދޫއަށް ވަނީ 17.4 މިލިމީޓަރުގެ ވާރޭ ވެހިފަވެއެވެ. ދެން އެންމެގިނައިން ވާރޭވެހިގެން ރިޕޯޓްކޮށްފައިވަނީ ލ. ކައްދޫއަށެވެ. އެއީ 14.5 މިލިމީޓަރުގެ ވާރޭއެވެ. ށ. ފުނަދޫއަށް 12.5 މިލިމީޓަރުގެ ވާރޭވެހިފައިވާއިރު، ރ. އަލިފުއްޓަށް 12.3 މިލިމީޓަރުގެ ވާރޭވެހިގެން ރިޕޯޓްކޮށްފައިވެއެވެ.
ކ. ގާފަރަށް 11.7 މިލިމީޓަރުގެ ވާރޭވެހިގެން ރިޕޯޓްކޮށްފައިވާއިރު، ފުވައްމުލަކަށް ވަނީ 11 މިލިމީޓަރުގެ ވާރޭވެހިފައެވެ.
މޫސުމާބެހޭ ގައުމީ އިދާރާއިން ބުނެފައިވަނީ، ކުރިއަށް އޮތް 5 ދުވަހު ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެކަމަށެވެ. ޚާއްސަކޮށް، އުތުރާއި މެދުރާއްޖެތެރޭގައި ވައިގަދަވުމާއެކު ކަނޑުތައް ވަރަށް ބޮޑަށް ގަދަވެގެންދާނެ ކަމަށް ލަފާ ލކުރެވޭ ކަމަށެވެ. އެހެންކަމުން ހުރިހާ ފަރާތްތަކުން (ޚާއްސަކޮށް ކަނޑުދަތުރު ކުރާ ފަރާތްތަކުން) މޫސުމަށް ސަމާލުވުމަށް ވަރަށް ބޮޑަށް ވަނީ އިލްތިމާސްކޮށްފައެވެ.
ހުޅަނގު މޫސުމާއި އިރުވައި މޫސުމުގައިވެސް ރާއްޖެއަށް ގަދަވަޔާއެކު ވިއްސާރަކުރެއެވެ. އެހެންނަމަވެސް ގަދަވަޔާއެކު ދިގުދެމިގެންދާގޮތަށް ވިއްސާރަކުރަނީ ހަމައެކަނި ހުޅަނގު މޫސުމުގައެވެ. އިރުވައި މޫސުމުގެ ހަޅައާ ގުޅިގެން ގިނަދުވަސްތަކެއް ވަންދެން އާންމުކޮށް ބާރަށް ވައިޖެހެމުން ދެއެވެ.
