އޮކްޓޯބަރ 1ވާ ހޮނިހިރު ދުވަހު 4 ދާއިރާގެ ބައި-އިލެކްޝަން ކުރިއަށްދާނެއެވެ.

ހޮނިހިރު ދުވަހު ވޯޓުލުން ކުރިއަށްދާ އިންތިޚާބުތަކަކީ; ށ. މާއުނގޫދޫ ކައުންސިލް މެންބަރު އިންތިޚާބުކުރުމަށް ބާއްވާ ބައި-އިލެކްޝަނާއި ރ. ރަސްމާދޫ، ތ. ގުރައިދޫ، އަދި ލ. ދަނބިދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަނެވެ. މިއިންތިޚާބުތަކުގެ ވޯޓުލުން ކުރިއަށްދާނީ ހޮނިހިރު ދުވަހުގެ ހެނދުނު 8ން ހަވީރު 4 ޖެހުމާ ހަމައަށެވެ.

ށ. މާއުނގޫދޫ ކައުންސިލަށް މެމްބަރަކު އިންތިޚާބުކުރުމަށް ބާއްވާ އިލެކްޝަންގައި ވާދަކުރަނީ ޕީޕީއެމްގެ ފަރާތުން، ކެންޑިޑޭޓް ނަންބަރު 1 މުޙައްމަދު އިބްރާހީމް ވަޙީދާއި އެމްޑީޕީގެ ފަރާތުން، ކެންޑިޑޭޓް ނަންބަރު 2 ފާޠިމަތު ޝިމާނާއެވެ.

ރ. ރަސްމާދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީއަށް މެމްބަރަކު އިންތިޚާބުކުރުމަށް ބާއްވާ އިލެކްޝަންގައި ވާދަކުރަނީ ޕީޕީއެމްގެ ފަރާތުން، ކެންޑިޑޭޓް ނަންބަރު 1 ޞާބިރާ މުޙައްމަދާއި އެމްޑީޕީގެ ފަރާތުން ކެންޑިޑޭޓް ނަންބަރު 2 މަރްޔަމް ލިޔުޝާއެވެ.

ލ. ދަނބިދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންގައި 4 ކެންޑިޑޭޓުން ވާދަކުރެއެވެ. އެއީ އެމްއެންޕީގެ ފަރާތުން، ކެންޑިޑޭޓް ނަންބަރު 1 މަރިޔަމް ސާމިރާއާއި ޕީޕީއެމްގެ ފަރާތުން، ކެންޑިޑޭޓް ނަންބަރު 2 މަރްޔަމް ރަޝީދާއާއި، އަމިއްލަގޮތުން ވާދަކުރާ ކެންޑިޑޭޓް ނަންބަރު 3 ޢާއިޝަތު ވިސާމާގެ އިތުރުން އެމްޑީޕީގެ ފަރާތުން ވާދަކުރާ ކެންޑިޑޭޓް ނަންބަރު 4 ޢާއިޝަތު ޒިޔާދާއެވެ.

ތ. ގުރައިދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި-އިލެކްޝަންގައި ވާދަކުރަނީ އެމްއެންޕީގެ ފަރާތުން، ކެންޑިޑޭޓް ނަންބަރު 1 ފާޠިމަތު ރަނިއްޔާއާއި ޕީޕީއެމްގެ ފަރާތުން، ކެންޑިޑޭޓް ނަންބަރު 2 ޝަރުމާ ޢަލީ މަނިކެވެ.

ވޯޓުލުން ކުރިއަށްދާނީ މިރަށްރަށުގައި ބެހެއްޓިފައިވާ ވޯޓު ފޮށިތަކަށެވެ. މާލޭގައި ދިރިއުޅޭ މިދާއިރާތަކުގެ ރައްޔިތުން ވޯޓުލުމަށް ހަމަޖެހިފައިވަނީ އިމާދުއްދީން ސްކޫލްގައި ބެހެއްޓިފައިވާ ފޮއްޓަށެވެ.

ށ. މާއުނގޫދޫގައި ބަހައްޓާފައިވާ ވޯޓު ފޮއްޓަށް 673 މީހުންނަށް ވޯޓުލެވޭއިރު، ލ. ދަނބިދޫގައި ބަހައްޓާފައިވާ ވޯޓު ފޮއްޓަށް 552 މީހުންނަށް ވޯޓުލެވެއެވެ. ތ. ގުރައިދޫގައި ބަހައްޓާފައިވާ 1 ނަންބަރު ވޯޓު ފޮއްޓަށް 543 މީހުންނަށް ވޯޓުލެވޭއިރު، 2 ނަންބަރު ވޯޓު ފޮއްޓަށް 566 މީހުންނަށް ވޯޓުލެވެއެވެ. ރ. ރަސްމާދޫގައި ބެހެއްޓިފައިވާ ވޯޓު ފޮއްޓަށް 449 މީހުންނަށް ވޯޓުލެވެއެވެ. މާލޭގައި ބެހެއްޓިފައިވާ މިދާއިރާތަކުގެ މީހުން ވޯޓުލާން ހަމަޖެހިފައިވާ ފޮއްޓަށް 1031 މީހުންނަށް ވޯޓުލެވެއެވެ.

ވޯޓުލައި ނިމޭތާ 30 މިނެޓް ފަހުން ވޯޓު ގުނަން ފަށާއިރު، މިއިންތިޚާބުތަކުގެ ނަތީޖާ ހޮނިހިރު ދުވަހު އިއުލާންކުރުމަށް ވަނީ ހަމަޖެހިފައެވެ.