ކުރިއަތް އޮތް ފަސް ދުވަހު ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެ: މޫސުމާއި ބެހޭ ޤައުމީ އިދާރާ
ޚާއްސަކޮށް އުތުރާއި މެދުރާއްޖެތެރޭގައި ވައިގަދަވުމާއެކު ކަނޑުތައް ވަރަށް ބޮޑަށް ގަދަވެގެންދާނެ
ޚާއްސަކޮށް ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް ވަރަށް ބޮޑަށް ވަނީ އިލްތިމާސްކޮށްފައި
ކުރިއަތް އޮތް ފަސް ދުވަހު ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވާނެ ކަމަށް މޫސުމާއި ބެހޭ ޤައުމީ އިދާރާ އިން ބުނެފިއެވެ.
އެ އިދާރާ އިން ބުނީ ޚާއްސަކޮށް އުތުރާއި މެދުރާއްޖެތެރޭގައި ވައިގަދަވުމާއެކު ކަނޑުތައް ވަރަށް ބޮޑަށް ގަދަވެގެންދާނެ ކަމަށް ލަފާ ކުރެވޭ ކަމަށެވެ. އެހެންކަމުން ހުރިހާ ފަރާތްތަކުން ޚާއްސަކޮށް ކަނޑުދަތުރު ކުރާ ފަރާތްތަކުން މޫސުމަށް ސަމާލުވުމަށް ވަރަށް ބޮޑަށް ވަނީ އިލްތިމާސްކޮށްފައެވެ.
ހުޅަނގު މޫސުމާއި އިރުވައި މޫސުމުގައިވެސް ރާއްޖެއަށް ގަދަވަޔާއެކު ވިއްސާރަ ކުރެއެވެ. އެހެންނަމަވެސް ގަދަވަޔާއެކު ދިގުދެމިގެންދާގޮތަށް ވިއްސާރަ ކުރަނީ ހަމައެކަނި ހުޅަނގު މޫސުމުގައެވެ. އިރުވައި މޫސުމުގެ ހަޅައާއި ގުޅިގެން ގިނަދުވަސްތަކެއްވަންދެން އާންމުކޮށް ބާރަށް ވައި ޖެހެމުން ދެއެވެ. މިގޮތަށް ވައިގަދަވުމުން ރުއްގަސް ވެއްޓި، ގޭގޭގެ ފުރާޅުތައް އެއްލައިލާ، ފުރާޅު މައްޗަށް ރުއްގަސް ވެއްޓުން ފަދަ ހިތާމަވެރި ހާދިސާތަކާ ކުރިމަތިލާން ޖެހެއެވެ. އަދި ދަނޑުބިންތަކުގައި އުހަށް ހެދިފައި ހުންނަ ފަޅޯ އަދި ފަތްކެޔޮ ކަހަލަ ގަސްތައް ވެއްޓި ދަނޑުބިންތައް ހަލާކު ވެއެވެ. ގަދަވަޔާއެކު ވިއްސާރަކުރުމުން ކަނޑުދަތުރުކުރުމަށް ހުރަސްއެޅި، މަސްވެރިންނާއި، ފެރީ ދަތުރުތަކަށް ބުރޫ އަރައެވެ.
ހދ.ހަނިމާދޫ އެއަރޕޯޓް ޖެޓީގައި އަޅާފައި އޮތް ލޯންޗެއް ދިޔަވެ އަޑިއަށް ގޮސްގެން، އެމްއެންޑީއެފް ނޮދަން އޭރިއާ ކޮމާންޑް ހދ. ހަނިމާދޫ ޕޯސްޓްގެ ސިފައިން ވަނީ އެހީތެރިކަން ފޯރުކޮށްދީފައެވެ.
މި ހާދިސާގެ މަޢުލޫމާތު އެމްެއެންޑީއެފް ހަނިމާދޫ ޕޯސްޓަށް ލިބުނީ ހުކުރު ދުވަހުގެ 12:41 އެހާއިރުއެވެ. އެ މަޢުލޫމާތު ލިބުމާއެކު ސިފައިން އެ ސަރަހައްދަށް ގޮސް އެހީތެރިކަން ފޯރުކޮށްދީފައިވެއެވެ. އަދި، ސިފައިންނާއި އާންމުން ގުޅިގެން ކުރި މަސައްކަތުން މިހާރު މި ލޯންޗު ވަނީ އެ ސަރަހައްދުން އެއްގަމަށް އަރުވާފައެވެ. މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ.
