އަރަބިއްޔާ އާއި ޖަމާލުއްދީން ސްކޫލު އަޅަން އަމީން ކޮންސްޓްރަކްޝަންއާ ހަވާލުކޮށްފި

އަރަބިއްޔާ ސުކޫލުގެ އައު އިމާރާތާއި ޖަމާލުއްދީން ސުކޫލުގެ އެނެކްސް އިމާރާތުގެ މަސައްކަތް ޑިޒައިން އެންޑް ބިލްޑް އުސޫލުން އަމީން ކޮންސްޓްރަކްޝަންއާ ހަވާލުކޮށްފިއެވެ.

ދެ ސްކޫލު ނިންމުމުގެ އެއްބަސްވުމުގައި އެޑިއުކޭޝަން މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. އައިޝަތު އަލީއެވެ. އަދި އަމީން ކޮންސްޓްރަކްޝަންގެ ފަރާތުން ސޮއިކުރެއްވީ އެ ކުންފުނީގެ ސެކްރެޓަރީ އިބްރާހިމް ނިހާދެވެ.

ސޮއިކުރެވުނު އެއްބަސްވުމުގެ ދަށުން މި މަސައްކަތް 420 ދުވަހުގެ ތެރޭގައި ނިންމަން ޖެހެއެވެ. މަޝްރޫއުގެ އަގަކީ 168،525،150.92 (ސަތޭކަ ފަސްދޮޅަސް އަށް މިލިއަން ފަސްލައްކަ ފަންސަވީސްހާސް ސަތޭކަ ފަންސާސް) މިލިއަން ރުފިޔާ އެވެ.

މި މަޝްރޫއުގެ ދަށުން ބާ ޖަމާލުއްދީން ހުރި ސަރަހައްދުގައި 40 ކްލާސްރޫމާއި މަލްޓިޕާޕަސް ހޯލެއް އިމާރާތް ކުރުމަށް ވަނީ ހަމަޖެހިފަ އެވެ. އަދި ހަތަރު ލިފްޓު ހަރުކުރާނެ އެވެ.

ޖަމާލުއްދީން ސުކޫލުގެ އައު އިމާރާތުގައި އަޅާނީ 34 ކްލާސްރޫމާއި ދެ ލިފްޓެވެ.

އަރަބިއްޔާ ސްކޫލް ބައު ޖަމާލުއްދީން ހުރިތަނަށް ބަދަލު ކުރަނީ އެ ސްކޫލް ކުރިން ހިންގި އިމާރާތުގައި ކުދިންނަށް ކިޔަވައިދިނުމަކީ ރައްކާތެރިކަމަކަށް ނުވާތީއެވެ. އެގޮތުން، ޗާންދަނީ މަގުގައި ހިންގި އެ އިމާރާތުގައި ރެނދުލައި އެތަނުގައި ކިޔަވައިދިނުމަކީ ރައްކާތެރިކަމަކަށް ނުވާތީ ވަގުތީ ގޮތުން އެ އިމާރާތް ވަނީ މިހާރު ބަންދުކޮށްފައެވެ.

އިމާރާތް ވަގުތީ ގޮތުން ބަންދު ކުރި ނަމަވެސް އަރަބިއްޔާ ސްކޫލުގެ ކިޔެވުން މެދުުނުކެނޑި އަދިވެސް ކުރިއަށް އެބަދެއެވެ. އެ ސްކޫލް ވަގުތީގޮތުން ހިންގަމުން އަންނަނީ ހުޅުމާލެ ފެރީ ޓާރމިނަލް ކައިރީގައި ހުންނަ ކުރީގެ ފޮރިން މިނިސްޓްރީ ހިންގި އިމާރާތުގައެވެ.

700 އަށްވުރެ ގިނަ ކުދިން ކިޔަވަމުން އަންނަ އަރަބިއްޔާ ސްކޫލަކީ ރާއްޖޭގައި އަރަބި މީޑިއަމަށް ކިޔަވައިދޭ ހަމައެކަނި ސްކޫލެވެ.

ބައު ޖަމާލުއްދީންގައި ހުރި އިމާރާތްތައް ތަޅާލާނެ ބަޔަކު ހޯދަން އިއުލާންކޮށް އެ މަސައްކަތް ހަވާލު ކޮށްފައިވަނީ ވެލްޓްރޭޑިން ޕްރައިވެޓް ލިމިޓެޑާއެވެ. އެ ކުންފުންޏާ މި މަސައްކަތް މެއި މަހުގެ 10 ވަނަ ދުވަހު ހަވާލުކޮށްފައިވަނީ 75 ދުވަހުގެ ތެރޭގައި ނިންމާގޮތަށް 2.4 މިލިއަން ރުފިޔާއަށެވެ.