ޑިސެމްބަރު މަހުގެ ކުރިން ހޯރަފުށީ މަގުތަކުގައި ތާރުއަޅައި ނިންމާނެކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އެމްޓީސީސީގެ ސީއީއޯ އާދަމް އާޒިމް މިހެން ވިދާޅުވީ، އެމްޓީސީސީން ހޯރަފުށީ މަގުތަކުގައި ތާރުއެޅުމުގެ މަސައްކަތް ފެށުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. އާޒިމް ވިދާޅުވީ ހޯރަފުށީގައި އެމްޓީސީސީން ކުރަމުންދާ މަސައްކަތް އަވަހަށް ނިންމަން ލިބޭ އެންމެ ބޮޑު ހިތްވަރަކީ ރަށުގެ ރައްޔިތުންގެ ފަރާތުން ލިބޭ އެއްބާރުލުން ކަމަށެވެ. ރައްޔިތުންގެ އެއްބާރުލުން ނުލިބޭނަމަ އެކަން އެހެން ނުވީސް ކަމަށެވެ. ހޯރަފުއްޓަކީ މިހާތަނަށް ކުރެއްވި ދަތުރުތަކަށް ބަލާލާއިރު އެންމެ ގިނައިން އާދެވުނު އެއް ރަށްކަމަށާއި، އެކަން އެހެން ދިމާވަނީ ރައްޔިތުން ދޭ ލޯތްބާއި އިހުތިރާމާއި ގަދަރުގެ ސަބަބުންކަމަށެވެ.

އާޒިމް ވިދާޅުވީ ހޯރަފުށީގެ މަގުތަކުގައި ތާރުއެޅުމުގެ ރަސްމިއްޔާތު ބޭއްވިގެންދަނީ، މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް، އެމްޓީސީސީއަށް ކުރައްވާ އިތުބާރެއްގެ ސަބަބުން ކަމަށެވެ. މި އިތުބާރާއެކު މިހާތަނަށް 7 ބިލިއަން ރުފިޔާގެ މަސައްކަތް ހަވާލުކޮށްފައިވާ ކަމަށެވެ.

އާޒިމް ވިދާޅުވީ އެއްވެސް ކަމެއް ލަސްނުކޮށް، ކޮލިޓީކޮށް އެތައްޒަމާނަކަށް ބޭނުންކުރެވޭގޮތަށް ހެދުމަށް އަބަދުވެސް މިނިސްޓަރ އަސްލަމް އިރުޝާދު ދެއްވާކަމަށާއި، އެމްޓީސީސީން މަސައްކަތް ކުރިއަށް ގެންދަވާނީވެސް އަދި ކުރައްވާނީވެސް އެގޮތަށްކަމަށެވެ.

ހޯރަފުށީގައި، އެމްޓީސީސީން ކުރިއަށް ގެެންދާ ބައެއް މަޝްރޫއުތަކަށް އަލިއަޅުއްވާލައްވައި އާޒިމް ވިދާޅުވީ، ހޯރަފުށީގައި ގޮނޑުދޮށް ހިމާޔަތްކުރުމުގެ މަސައްކަތް ކުރިއަށްދާކަމަށާއި، އެއަރޕޯޓުގެ ގޮނޑުދޮށް ހިމާޔަތްކުރުމާއި މަގުހެދުން ކުރިއަށްދާކަމަށެވެ. އާޒިމް ވިދާޅުވީ ކޮވިޑްގެ ވަގުތުގައިވެސް، ދިވެހިރާއްޖެއަކީ ހިނގަހިނގައި ހުރި ގައުމެއްކަން ދައްކުވައިދިނީ ހޯރަފުށީ ރައްޔިތުން ކަމަށާއި، ކޮވިޑްގެ ހާލަތުގައި ރައީސް ޞާލިޙުގެ ސަރުކާރު ހިނގާކަން ދައްކައިދިނީ ހޯރަފުށީ ރައްޔިތުންކަމަށެވެ.

ހޯރަފުށީގެ މަގުތައް ޒަމާނީ ފެންވަރަށް ތަރައްގީކުރުމުގެ މަޝްރޫއުގެ ދަށުން ހޯރަފުށީގެ 11 މަގެއްގައި، 5,303 މީޓަރު ދިގުމިނުގެ ސަރަހައްދެއްގައި ތާރު އެޅުމަށް ވަނީ ހަމަޖެހިފައެވެ. އަދި 11,113.80 (އެގާރަހާސް އެއްސަތޭކަ ތޭރަ ޕޮއިންޓް އަށެއް ސުމެއް) އަކަމީޓަރުގެ ސަރަހައްދެއްގައި ދުވާރު ހެދުމާއި، ފެންހިންދާ ނިޒާމު ގާއިމުކުރުމާއި، މަގުބައްތި ހަރުކުރުމަށްވެސް ވަނީ ހަމަޖެހިފައެވެ.

އެމްޓީސީސީއާ ހަވާލުކުރެވުނު 71.90 މިލިއަން ރުފިޔާގެ މި މަަޝްރޫއު ނިންމުމަށް ކަނޑައަޅާފައިވަނީ 470 ދުވަހުގެ ތެރޭގައެވެ.