ސްޓެލްކޯގެ ނުވިކި ހުރި ފްލެޓުތަކުގެ ގުރުއަތުލުން ބާއްވައިފި

ހިޔާ މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި ސްޓެލްކޯއިން ތަރައްގީކޮށްފައިވާ ޓަވަރުތަކުން މިހާތަނަށް ނުވިކި ހުރި ފްލެޓުތަކުގެ ގުރުއަތުލުން ބާއްވައިފިއެވެ.

"ބްލޫ ރިޖް" ގެ ނަމުގައި ސްޓެލްކޯއިން ތަރައްގީކޮށްފައިވާ މި ދެ ޓަވަރުގައި މިހާރު ވެސް މީހުން ދަނީ ދިރިއުޅެމުންނެވެ. މިއީ ސަރުކާރު ކުންފުނިތަކުން ހުޅުމާލެ ދެވަނަ ފިޔަވަހީގައި ތަަރައްގީ ކުރި ޓަވަރުތަކުގެ ތެރެއިން މީހުން ދިރިއުޅެން ފެށި ފުރަތަމަ ޓަވަރެވެ.

ސްޓެލްކޯގެ ދެ ޓަވަރުގައި މިހާތަނަށް ނުވިކި ހުރި ފްލެޓުތަކުގެ ގުރުއަތުލުން އެ ކުންފުނިން ބާއްވާފައިވަނީ މިދިޔަ އަންގާރަ ދުވަހުގެ ރޭގައެވެ.

ސްޓެލްކޯގައި ހުޅުމާލެއިން ތަރައްގީކޮށްފައިވާ ދެ ޓަވަރުގައި 360 ފްލެޓް ވަނީ ހަދާފައެވެ. އެއީ އެއް ކޮޓަރީގެ 72 އެޕާޓްމަންޓާއި ދެކޮޓަރިއާއި މެއިޑް ރޫމް ހިމެނޭ 288 އެޕާޓްމަންޓެވެ.

އެ ކުންފުނިން ބުނެފައިވާ ގޮތުގައި މިހާތަނަށް ނުވިކި ހުރީ ދެ ކޮޓަރީގެ 16 ފެލްޓާއި އެއް ކޮޓަރީގެ 16 ފްލެޓެވެ. އަދި މީގެ ކުރިން އެއް ކޮޓަރީގެ ފްލެޓެއް ލިބުނު މުވައްޒަފަކު އޭނާއަށް ލިބުނު ފްލެޓް ދޫކޮށްލުމުން ގުރު ނެގި އިރު އެ ފްލެޓަށް ވެސް ގުރު ނަގާފައިވާ ކަމަށް ސްޓެލްކޯއިން ބުނެއެވެ. މި ފްލެޓުތަކަށް ކުރިމަތިލި މުވައްޒަފުންގެ ތެރެއިން އެއް ކޮޓަރީގެ ފްލެޓުތަކަށް ޝަރުތުހަމަވާ 75 މުވައްޒަފުން ތިބިއިރު ދެ ކޮޓަރީގެ ފްލެޓަށް ޝަރުތު ހަމަވާ 235 މުވައްޒަފުން ތިއްބެވެ.

ސްޓެލްކޯއިން ވަނީ ނުވިކިހުރި ޔުނިޓްތަކުގެ ކޮންމެ ކެޓަގަރީއަކުން ވެސް އިތުރު 15 މުވައްޒަފުންގެ ނަން ވެއިޓިން ލިސްޓްގެ ގޮތުގައި ގުރުއަތުން ނަގާފައެވެ. މި މުވައްޒަފުންނަށް ފުރުސަތު ލިބޭނީ އަންގާރަ ދުވަހުގެ ރޭ ގުރުއަތުން ހޮވުނު މުވައްޒަފުންގެ ތެރެއިން އެއްވެސް ސަބަބަކާ ހުރެ މުވައްޒަފަކު ފްލެޓު ދޫކޮށްލުމުންނެވެ.

ސްޓެލްކޯގެ ފްލެޓްތަކަށް ފައިސާ ދައްކަނީ 18 އަހަރަށް ބަހާލައިގެންނެވެ. އެގޮތުން އެއް ކޮޓަރީގެ އެޕާޓްމަންޓަކަށް މަހު ކުލީގެ ގޮތުގައި 5622 ރުފިޔާ ދައްކަން ޖެހޭއިރު 2 ކޮޓަރިއާއި މެއިޑް ރޫމް ހިމެނޭ ފްލެޓްތަކަށް މަހަކު 10،356 ރުފިޔާއާއި 10،652 ރުފިޔާއާއި ދެމެދުގެ އަގެއް ދައްކަން ޖެހެއެވެ. މީގެ އިތުރުން ފްލެޓްތަކުގެ މެއިންޓެނަންސް ފީގެ ގޮތުގައި އިތުރު 1000 ރުފިޔާ ދައްކަން ޖެހެއެވެ.