ބަހަކާ މެދު ފަހުރުވެރިވާ ކަމަށްވާނަމަ ދިވެހިންނަށްވުރެ ވަކިން ބޮޑަށް އެކަމަށް ފަހުރުވެރިވާންޖެހޭ ބައެއް ނެތް
ތާރީޚީ އިލްމު ދިރާސާކުރައްވާ ބޭފުޅެއްކަމަށްވާ މުހައްމަދު ޑީޑީ
މިއަދު އިނގިރޭސިބަހުގެ ނުފޫޒު ދިވެހިންގެ ތެރޭގައި އިނގިރޭސިންގެ ހިމާޔަތުގައި އޮތް ދުވަސްވަރަށްވުރެވެސް މާބޮޑު ކަމަށް ތާރީޚީ އިލްމު ދިރާސާކުރައްވާ ބޭފުޅެއްކަމަށްވާ މުހައްމަދު ޑީޑީ ވިދާޅުވެއްޖެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި ދިވެހިން ދިވެހި ބަހާއި ދިވެހި ތާރީޚާއި ދިވެހި ވަންތަކަމާއި ދުރަށްދާ ސަބަބުތަކާއި ގުޅޭގޮތުން ވާހަކަދައްކަވަމުން ޑީޑީ ވިދާޅުވީ ދުނިޔޭގެ ކޮންމެ ގައުމަކަށް ބަލާލިނަމަވެސް ކޮންމެ ބަޔަކުވެސް އުޅެނީ އެބަޔެއްގެ އަމިއްލަވަންތަކަން އެހެން ބަޔަކަށް ދެއްކޭތޯކަމަށެވެ. ނަމަވެސް ދިވެހިން އެއާ މުޅިން ތަފާތުކަމަށް ޑީޑީ ވިދާޅުވިއެވެ. ދިވެހިންނަށް ހީވަނީ ރާއްޖޭގައި ހިނގާ ކަންކަމަކީ ވަރަށް ކަޓު ބޯދާ ކަންކަންކަމަށް ޑީޑީ ވިދާޅުވިއެވެ.
އެހެން ގައުމުތަކުގައި ބޯދާ ކަމެއްވިއްޔާ އެކަމެއް ދެމެހެއްޓޭތޯ މަސައްކަތްކުރާކަމަށާއި ނަމަވެސް ދިވެހިން އަމަލުކުރަނީ އެކަމެއް ޒަމާނާ އެއްގޮތަށް ބަދަލުކުރުމަށްކަމަށް ޑީޑީ ވިދާޅުވިއެވެ. އެގޮތަށް ކަންކުރާއިރު ގިނަ ފަހަރަށް އެކަމެއް ބަދަލުވެފައިއޮންނަނީ އިނގިރޭސި ނަމަކަށްކަމަށް ޑީޑީ ވިދާޅުވިއެވެ.
ބަހަކާ މެދު ފަހުރުވެރިވާ ކަމަށްވާނަމަ ދިވެހިންނަށްވުރެ ވަކިން ބޮޑަށް އެކަމަށް ފަހުރުވެރިވާންޖެހޭ ބައެއް ނެތްކަމަށް ޑީޑީ ވިދާޅުވިއެވެ. ފަސްލައްކަ އެއްހާ މީހުން އެކަނި ވާހަކަދައްކާ ބަހަކާއި އަކުރެއް އޮތުމަކީ ފަހުރުވެރިވާންޖެހޭކަމެއް ކަމަށް ޑީޑީ ވިދާޅުވިއެވެ.
މީގެއިތުރުން ދިވެހި ތާރީޚު މިހާރަށްވުރެ ބޮޑަށް ކިޔަވާކުދިންނަށް އުނގަންނައިދިނުމަށް އެތަކެއްޗާ ހަމައަށް ވާސިލުވެވޭނެ ފަސޭހަގޮތްތަކެއް ހުންނަންޖެހޭކަމަށް ޑީޑީ ވިދާޅުވިއެވެ. އަދި ދިވެހި ބަހުން ކިޔަވައިދިނުން ފަދަ ކަންކަމަށް ސިޔާސަތު އެކުލަވާލާ ހިސާބުން އެއްބާރުލުންދީ އެކަންކުރަންޖެހޭކަމަށް ޑީޑީ ވިދާޅުވިއެވެ.
