ދިވެހި ކާބަފައިން، އެކީ އެއްހަމައެއްގައި، އުފުލާ ގެނެސް، އަޅުގަނޑުމެންނާ ހަވާލު ކުރި ޒިންމާ އަކީ، މިޤައުމާއި ދިވެހި ޤައުމިއްޔަތު
ގައުމީ ދުވަހުގެ ޖަލްސާގައި ރައީސް އިބްރާހިމް މުހައްމަދު ޞާލިހް ވާހަކަފުޅުދައްކަވަނީ
ދިވެހިރާއްޖޭގެ ޤައުމިއްޔަތަށް ފުރާނައެޅި، ދިރުން ލިބުނީ، ދިވެހިންގެ ސަބަބުންކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރާއްޖޭގެ 80 ވަނަ ގައުމީ ދުވަސް ފާހަގަކުރުމަށް އަންގާރަ ދުވަހު ހއ. އުތީމު، ބޮޑުތަކުރުފާނުގެ ހަނދާނި މަރުކަޒުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ދިރިއުޅޭ އިންސާނުން ނެތި، ފަޅަށް އޮންނަ ކިތަންމެ ބޮޑު ސަރަހައްދަކީ، އަދި ޤައުމެއް ނޫން ކަމަށެވެ. ޤައުމެއް ނެތެމަ، ޤައުމިއްޔަތެއް ނޯންނާނެ ކަމަށާއި، ދިވެހިރާއްޖޭގެ ޤައުމިއްޔަތަށް ފުރާނައެޅި، ދިރުން ލިބުނީ، ދިވެހިންގެ ސަބަބުން ކަމަށް ރައީސް ވިދާޅުވިއެވެ.
ރައީސް ވިދާޅުވީ ދިވެހިންގެ އުޅުމާއި، ގުޅުމާއި، އިސްކުރާ ކަންކަމާއި، ފަސްކުރާ ކަންކަމުގައި، ހުންނަ ތަރުތީބަކީ، ޤައުމިއްޔަތުގެ ތަރުތީބު ކަމަށެވެ.
ރައީސް ވިދާޅުވީ ދިވެހިންނަކީ އަސްލާއި ނަޞްލުން އެއްބައެއް ކަމަށެވެ. އިސްލާމްދީނުގެ ހިދާޔަތުގައި، އެންމެން ފިދާވާ ޤައުމެއް ކަމަށެވެ. އާދަކާދައާ ބަހުރުވަ އެކައްޗެއް ކަމަށާއި، އެކަކަށް ޖެހޭ ބޮޑު ކަމެއްގައި، އަނެކުން ޙިއްޞާވި ޤައުމެއް ކަމަށެވެ. އެއް ބަދިގޭގެ ތެލީގެ ފުލުގައި އުނދުޅިން ޖެހޭ އަޑު އިވިއްޖެނަމަ، އަނެއް ބަދިގެއިން ކާތަކެތި ގެނެސްދޭ ބައެއް ކަމަށެވެ. ދިވެހި ޤައުމިއްޔަތު ޒީނަތްވެދާ، މި އަގުބޮޑު ގަހަނާ ގެންގުޅުނު އެހެން ބަޔަކު، މިދުނިޔޭގައި މަދުވާނެ ކަމަށެވެ.
ރައީސް ވިދާޅުވީ އެޒަމާން، އެޒަމާނުގެ ގޮތުގައި ފާއިތުވެ، މިޒަމާން އައިއިރުވެސް، ދިވެހިންގެ "ދިވެހިއްޔަތަށް" ދުނިޔެ އެބަ ހެކިވާ ކަމަށެވެ. ފަތުރުވެރިން ރާއްޖެ އަންނާން ފެށިތާ މިއީ 50 ވަނަ އަހަރު ކަމަށާއި، މެހެމާންދާރީއާ އޯގާތެރި ކަމާއި ހިތްހެޔޮކަން ނުވި ނަމަ، ދުނިޔޭގެ އެންމެ މަޤްބޫލު ޓޫރިސްޓް މަންޒިލްކަމުގައި، ރާއްޖެއަކަށް ނުވެވުނީސް ކަމަށެވެ.
އަދި ބޮޑު ތަކުރުފާނު ކުރައްސަވައި ދެއްވި ޤައުމިއްޔަތުގެ ޗާޓުން ދައްކަނީ، މެހެމާނުންނަށް ކަމޭ ހިތާ އިޙްތިރާމްކޮށް އޯގާތެރިވުން ކަމަށެވެ. ރާއްޖެއަށް ލާބަ ހުރި ކޮންމެ ކަމެއްގައި، އެތަކުރުފާނު އިސްކުރެއްވި ޚާރިޖީ ސިޔާސަތަކީ ޤައުމިއްޔަތުގެ ބައެއް ކަމަށެވެ. މިދެންނެވި ޤައުމިއްޔަތުގެ ސިފަތަށް ދެމެހެއްޓުމަކީ، މިނިވަންކަން ދެމެހެއްޓުމުގެ އެއް އަސާސް ކަމަށް ރައީސް ވިދާޅުވިއެވެ.
