ދައުލަތުން 2.4 ބިލިއަން ރުފިޔާގެ ލޯނު އަނބުރާ ދައްކައިފި

ދައުލަތުން 2.4 ބިލިއަން ރުފިޔާގެ ލޯނު އަނބުރާ ދައްކާފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.

ދައުލަތުން ނަގާފައިވާ ލޯނުތައް އަނބުރާ ދައްކަމުންދާކަމަށް ފިނޭންސް މިނިސްޓަރު އިބްރާހިމް އަމީރު ވަނީ މީގެ ކުރިން ވިދާޅުވެފައެވެ. އަދި ލޯނުތައް އަނބުރާ ދެއްކުމުގެ ގާބިލުކަން ދައުލަތުގެ އެބަހުރި ކަމަށްވެސް މިނިސްޓަރު ވިދާޅުވިއެވެ.

Advertisement

ފިނޭންސް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާގޮތުން އަހަރުގެ މިހާތަނަށް ދައުލަތުން ވަނީ 2.4 ބިލިއަން ރުފިޔާގެ ލޯނު އަނބުރާ ދައްކާފައެވެ. ފާއިތުވި އަހަރުގެ މި މުއްދަތާ ހަމައަށް 3.6 ބިލިއަން ރުފިޔާގެ ލޯނު ދައުލަތުން ދައްކާފައިވެއެވެ.

މިހާތަނަށް އައިއިރު ދައުލަތުން ކުރި ޚަރަދު ވަނީ 25.5 ބިލިއަން ރުފިޔާއަށް އަރާފައެވެ. މީގެ ތެރޭގައި އެޑްމިނިސްޓްރޭޓިވް އަދި އޮޕަރޭޝަނަލް ޚަރަދުގެ ގޮތުގައި ޖުމްލަ 11.3 ބިލިއަން ރުފިޔާ ޚަރަދުކޮށްފައިވާކަމަށް މިނިސްޓްރީގެ ތަފާސްހިސާބުން ހާމަކުރެއެވެ. މީގެ ތެރޭގައި ގްރާންޓްސްއާއި، ސަބްސިޑީ އަދި އާސަންދައިގެ ޚިދުމަތް ދިނުމަށް 5.7 ބިލިއަން ރުފިޔާ ޚަރަދުކޮށްފައިވާކަން ފާހަގަކޮށްފައިވެއެވެ. އަދި މުސާރައާއި، އިނާޔަތް އަދި ޕެންޝަނަށް 7.3 ބިލިއަން ރުފިޔާ ވަނީ ޚަރަދުކޮށްފައެވެ.

މީގެ އިތުރުން ތަރައްގީގެ މަޝްރޫއުތައް ހިންގުމަށް ބޭނުންވާ ތަކެތި ހޯދަން 4.8 ބިލިއަން ރުފިޔާ މިހާތަނަށް ވަނީ ޚަރަދުކޮށްފައެވެ. އަދި މަޝްރޫއުތަކަށް 1.2 ބިލިއަން ރުފިޔާ ވަނީ ޚަރަދުކޮށްފައެވެ. މީގެ އިތުރުން ޕީއެސްއައިޕީ މަޝްރޫއުގެ ގޮތުގައި 4.7 ބިލިއަން ރުފިޔާގެ މަޝްރޫއު ހިންގާފައިވާކަމަށް ފިނޭންސް މިނިސްޓްރީން ހާމަކުރެއެވެ.

އަހަރުގެ މިހާތަނަށް އައިއިރު ދައުލަތަށް އާމްދަނީގެ ގޮތުގައި ލިބިފައިވަނީ 19.3 ބިލިއަން ރުފިޔާއެވެ. އާމްދަނީގެ އެންމެ ބޮޑު ބައެއް ހިއްސާކުރަނީ ޓެކުހުންނެވެ.