ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވެރިކަން، ބާރަށް ތަރައްގީ ކުރިއަށްދިޔަ ޒަމާނުގެގޮތުގައި ތާރީޚުގައި ލިޔެވިގެންދާނެ ކަމަށް، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ހދ. ނައިވާދޫގެ ފެނުގެ ނިޒާމުގެ މަސައްކަތް ނިންމައި، ޚިދުމަތް ދިނުމަށް އެ ރަށުގައި ހޯމަ ދުވަހު ބޭއްވި ރަސްމިއްޔާތުގައި ވާހަކަފުޅުދައްކަވަމުން އަސްލަމް ވިދާޅުވީ، އެހެން ސަރުކާރުތަކާ މި ސަރުކާރު ތަފާތުވާނެކަމަށެވެ. އެގޮތުން، މި ސަރުކާރުން ގިނަ އަދަދެއްގެ މަޝްރޫއުތައް ހިންގަމުންދާއިރު، ރައީސް ވަޑައިގަންނަވަން ޖެހިވަޑައިގަންނަވާނީ މަޝްރޫއުތައް ނިންމުން ފާހަގަކުރެއްވުމަށްކަމަށެވެ.

މި ސަރުކާރުން މަޝްރޫއުތައް ހިންގުމުގައި ތަފާތުކުރުމެއް ނުގެންގުޅޭކަން ފާހަގަކުރައްވައި އަސްލަމް ވިދާޅުވީ، ހުރިހައި މަޝްރޫއެއްވެސް ބާރަށް ކުރިއަށްދާކަމަށެވެ. އަދި ރަށްރަށް ތަރަައްގީކުރެވޭނީ އަތޮޅުތަކާމެދު ވިސްނައި، ހުރިހާ ރަށަކީވެސް ރާއްޖޭގެ ބައެއްކަމަށް ދެކިގެން މަސައްކަތްކުރުމުގެ ފިކުރު ހުރި ބަޔަކަށްކަމަށާއި، މި ސަރުކާރުގައި އެ ފިކުރު އެބަހުރި ކަމަށްވެސް އަސްލަމް ވިދާޅުވިއެވެ.

އަސްލަމް ވަނީ މި ސަރުކާރުން ކުރަމުން އަންނަ މަސައްކަތްތައް ކުރިއަށް އޮތްތަނުގައި ތާރީޚުގައި ލިޔެވިގެންދާނެކަމަށާއި، އެގޮތުން، މިއީ ތަރައްގީއަށާއި ސާފުތާހިރު ދިރިއުޅުމަކަށް މަގުފަހިކޮށްދިން ޒަމާންކަމަށް އޭނާ ވިދާޅުވިއެވެ.

އަސްލަމް ވިދާޅުވިގޮތުގައި، މި ސަރުކާރުން ވަނީ މިހާތަނަށް 44 ރަށެއްގެ ބަނދަރުގެ މަސައްކަތް ފަށައި ނިންމާފައެވެ. އަދި 37 ރަށެއްގެ ބަނދަރުގެ މަސައްކަތް މިހާރު ކުރިއަށްދާ ކަމަށްވެސް ވިދާޅުވިއެވެ.

މި ސަރުކާރުން ފެށި މަގު ހެދުމުގެ މަސައްކަތްތަކުގެ ތެރެއިން 5 ރަށެއްގެ މަސައްކަތް މިހާތަނަށް ނިންމާލާފައިވާއިރު، އިތުރު 21 ރަށުގެ މަސައްކަތް މިހާރުވެސް ކުރިއަށްދާކަން އަސްލަމް ފާހަގަކުރެއްވިއެވެ. އަދި 7 ރަށެއްގެ ބިން ހިއްކުމުގެ މަސައްކަތް ނިމިފައިވާއިރު، އިތުރު 7 ރަށުގެ ބިން ހިއްކުމުގެ މަސައްކަތް ކުރިއަށްދާ ކަމަށާއި، އެއް އެއާޕޯޓުގެ މަސައްކަތް ނިމިފައިވާއިރު، ތިން އެއާޕޯޓުގެ މަސައްކަތް މިހާރު ކުރިއަށްދާކަންވެސް އޭނާ ފާހަގަކުރެއްވިއެވެ.

މީގެ އިތުރުން ފެނާއި ނަރުދަމާގެ މަސައްކަތްތަކުގެ ތެރެއިން 11 ރަށެއްގެ މަސައްކަތް މި ސަރުކާރުން ނިންމާލާފައިވާއިރު، 130 ރަށުގެ މަސައްކަތް ކުރިއަށްދާ ކަމަށްވެސް އަސްލަމް ވިދާޅުވިއެވެ.