މިހާތަނަށް ނައިވާދޫއަށް ނުކޮށްދެވީ އޮތީ ބަނދަރުގެ މަސައްކަތް އެކަނި – ރައީސް
ނައިވާދޫއަށް ކޮށްދޭންޖެހޭ ވަރަށް ގިނަ ކަންތައްތަކެއް އެބަހުރި
ނައިވާދޫގެ ފެނުގެ ނިޒާމް ރަސްމީކޮށް، ރައީސް ޞާލިހު ފައްޓަވައިދެއްވާ ވާހަކަފުޅުދައްކަވަނީ
ވެވަޑައިގެންނެވި ވައުދުފުޅުތަކުގެ ތެރެއިން މިހާތަނަށް ހދ. ނައިވާދޫއަށް ނުކޮށްދެވި އޮތީ ބަނދަރުގެ މަސައްކަތް އެކަނި ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހދ. ނައިވާދޫގެ ފެނުގެ ނިޒާމުގެ ހިދުމަތް ރަސްމީކޮށް ފައްޓަވައިދެއްވާ ވާހަކަފުޅުދައްކަވަމުންނެވެ. ރައީސް ވިދާޅުވީ ނައިވާދޫއަށްކޮށްދޭންޖެހޭ ވަރަށް ގިނަ ކަންތައްތަކެއް އެބަހުރި ކަމަށެވެ. ރިޔާސީ އިންތިހާބުގައި ކަންތައްތަކެއް ކޮށްދެއްވާނެކަމަށް ވައުދުފުޅުވެވަޑައިގެންނެވި ކަމަށާއި، އޭގެ ތެރެއިން ފާހަގަ ޖަހަމުންދާއިރުގައި އެ ވައުދުތަކުގެ ތެރެއިން މިހާތަނަށް ނުފެށި އޮތީ ބަނދަރުގެ މަސައްކަތް ކަމަށެވެ. އިރާދަކުރެއްވިއްޔާ މި ދައުރުގައި ލަސްތަކެއްނުވެ އެ މަސައްކަތް ފަށާ ބަނދަރަށް ދިމާވެފައިވާ ދަތިކަން ހައްލުކޮށްދެއްވާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ނާވައިދޫގެ ސިއްހީ މަރުކަޒަކީ އެއީ މަޖިލިސް އިންތިހާބުގައި ކޮށްދެއްވާނެކަމަށް ވިދާޅުވިކަމެއް ކަމަށާއި، އެ މަސައްކަތުގެ އަޕްގްރޭޑިންގ މަސައްކަތް މިހާރު ނިމިފައިވާ ކަމަށާއި، އަދިވެސް ރާއްޖޭގެ އެކި ރަށްރަށަށް އެންމެ ބޭނުންވާ އެއްކަމަކީ ސިއްހީ ހިދުމަތް ރަނގަޅުކުރުން ކަމުގައި ގަބޫލުކޮށް ހިދުމަތް ރަނގަޅަށް ދިނުމަށް އެކި މަސައްކަތް ކުރައްވަމުން ގެންދަވާ ކަމަށެވެ.
ރައީސުލްޖުމްހޫރިއްޔާ ތިލަދުންމައްޗަށް ކުރައްވާ މިދަތުރުފުޅުގައި އެންމެ ފުރަތަމަ ވަޑައިގަންނަވާނީ، ހދ. ނައިވާދޫ އަށެވެ. އެއަށްފަހު، ހދ. ފިނޭއަށާއި، ހއ. އުތީމަށް އަދި ހއ. ދިއްދޫއަށް އެމަނިކުފާނު ވަޑައިގަންނަވާނެއެވެ.
ހއ. އުތީމުގައި ބޭއްވުމަށް ހަމަޖެހިފައިވާ ޤައުމީ ދުވަހުގެ ޙަރަކާތްތަކުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ހއ. އުތީމަށް ކުރައްވާ ދަތުރުފުޅުގައި އެމަނިކުފާނާއެކު ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު އުތީމަށް ވަޑައިގަންނަވާނެއެވެ.
ތިލަދުންމައްޗަށް ކުރައްވާ މި ދަތުރުފުޅުގައި ރައީސުލްޖުމްހޫރިއްޔާ މި ރަށްރަށުގައި ސަރުކާރުން ކުރިޔަށް ގެންގޮސްފައިވާ ބައެއް ޢުމްރާނީ މަޝްރޫޢުތައް ނިންމައި ޚިދުމަތްތައް ރަސްމީގޮތުން އިފްތިތާޙްކޮށްދެއްވާނެއެވެ. މީގެތެރޭގައި ރަށްރަށުގެ ފެނުގެ ނިޒާމާއި، ނަރުދަމާގެ ނިޒާމް ހިމެނެއެވެ. އަދި ރާއްޖެ ޓްރާންސްޕޯޓް ލިންކް (އާރް.ޓީ.އެލް) ގެ ޒޯން 1 ގެ ޚިދުމަތް ފަށައި އެ ނިޒާމް އެސަރަޙައްދުގައި ފުރިހަމަކޮށްފައިވާތީ ރަސްމީކޮށް އެކަން ފާހަގަކުރުމަށް ބާއްވާ ރަސްމިއްޔާތުގައި އެމަނިކުފާނު ބައިވެރިވެވަޑައިގަންނަވާނެއެވެ. މީގެ އިތުރުން މި ދަތުރުފުޅުގެ ތެރެއިން އެ ރަށްރަށުގެ ކައުންސިލްތަކާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކާ ރައީސުލްޖުމްހޫރިއްޔާ ބައްދަލުކުރައްވައި މަޝްވަރާކުރެއްވުމަށް ވެސް ވަނީ ހަމަޖެހިފައެވެ.
ރައީސުލްޖުމްހޫރިއްޔާ ތިލަދުންމައްޗަށް ކުރައްވާ މި ދަތުރުފުޅުގައި އެމަނިކުފާނުގެ އަރިހުގައި ސަރުކާރުގެ މަތީ ފަންތީގެ އިސް ބޭފުޅުން ބައިވެރިވެވަޑައިގަންނަވާނެއެވެ. މި ދަތުރުފުޅު ނިންމަވާލެއްވުމަށްފަހު، ރައީސުލްޖުމްހޫރިއްޔާ މާލެ ވަޑައިގަންނަވާނީ، ބުދަ ދުވަހުއެވެ.
