ކޫންޑޭ އާއި އަރައުހޯ އަށް އަނިޔާވެ ކުޅުމާ ދުރަށް
މި ދެ ކުޅުންތެރިންނަށް ވެސް އަނިޔާވެފައިވަނީ ދެ ކުޅުންތެރިން ނިސްބަތްވާ ޤައުމުން ކުޅުނު މެޗުގައި
ބާސެލޯނާގެ ފަރިތަކުރުމެއްގެ ތެރެއިން
ބާސެލޯނާގެ ދެ ޑިފެންޑަރުން ކަމަށްވާ ފްރާންސްގެ ޖޫލްސް ކޫންޑޭ އާއި އުރުގުއާއީގެ ރޮނާލްޑް އަރައުހޯ އަށް އަނިޔާވެ ކުޅުމާ ދުރަށް ދާން ޖެހިއްޖެއެވެ.
މި ދެ ކުޅުންތެރިންނަށް ވެސް އަނިޔާވެފައިވަނީ ދެ ކުޅުންތެރިން ނިސްބަތްވާ ޤައުމުން ކުޅުނު މެޗުގައެވެ. ފްރާންސް އިން ކުޅުނު މެޗުގެ ތެރެއިން ކޫންޑޭ އަށް އަނިޔާވެ ވަނީ ބަދަލުކޮށްފައެވެ. އަދި އެއަށްފަހު ހެދި ޓެސްޓުތަކުން ދައްކާ ގޮތުގައި އޭނާގެ ވާތު ފައިގެ ފަލަ މަސްގަނޑަށް ވަނީ އަނިޔާވެފައި ކަމަށް މީޑިއާ ރިޕޯޓުތައް ބުނެއެވެ. މިކަމުގެ ސަބަބުން ކޫންޑޭ ކުޅުމާ ދުރުގައި ހުންނަން ޖެހޭނެ ކަމަށް ވެސް މީޑިއާ ތަކުގައި ވަނީ ރިޕޯޓުކޮށްފައެވެ.
މީގެ އިތުރުން އުރުގުއާއިން އިރާނާ ދެކޮޅަށް ކުޅުނު މެޗުގައި އަރައުހޯ އަށް ވެސް ވަނީ އަނިޔާވެފައެވެ. އަދި އޭގެ ފަހުން ހެދި ޓެސްޓުތަކުގެ ނަތީޖާއިން ދައްކާ ގޮތުގައި އަރައުހޯގެ ކަނާއަތު ފައިގެ އުކުޅު ވަޅަށް ވަނީ އަނިޔާވެފައެވެ. އަދި އެ އަނިޔާ އިން ރަނގަޅު ވަންދެން އޭނާ ކުޅުމާ ދުރުގައި ހުންނަން ޖެހޭނެ ކަަމަށް ވެސް ރިޕޯޓުތައް ބުނެއެވެ.
ކޫންޑޭ އާއި އަރައުހޯ އަންނަނީ މި ސީޒަންގައި ރަނގަޅު ކުޅުމެއް ދައްކަމުންނެވެ. އިންޓަނޭޝަނަލް ބެރޭކަށްފަހު އޮކްޓޫބަރު މަހުގެ ދެ ވަނަ ދުވަހު ލީގު އަލުން ފަށާއިރު، އަނިޔާގެ ސަބަބުން މި ދެ ކުޅުންތެރިންނަށް ކުޅެވޭ ގޮތް ނުވެއްޖެ ނަމަ، ބާސެލޯނާ އަށް ދަތިތަކަކާ ކުރިމަތިލާން ޖެހޭނެ ކަމަށް ރިޕޯޓުތައް ބުނެއެވެ.
