މ. މުލަކުގައި ފުލުހެއްގެ ސައިކަލުގައި ރޯކޮށްލައިފިއެވެ.

އެކަމާއި ގުޅިގެން ފުލުހުން ބުނީ ހުކުރު ދުވަހުގެ ރޭގެ ވަގުތެއްގައި މުލަކުގައި ފުލުހެއްގެ ސައިކަލުގައި ރޯކޮށްލާފައިވާކަމަށެވެ. އެކަމުގެ މައުލޫމާތު ފުލުހުންނަށް ލިބުނީ ހުކުރު ދުވަހުގެ ރޭ ފަތިހު 4:30 އެހާއިރުކަމަށެވެ. ސައިކަލުގައި ރޯކޮށްލާފައިވަނީ ފުލުސް މީހާ ދިރިއުޅޭ ގެ ކައިރީގައި ޕާކުކޮށްފައި ހުއްޓާކަމަށާއި އަލިފާން ރޯކޮށްލުމާއި ގުޅިގެން ސައިކަލް ވަނީ ބޭނުންނުކުރެވޭ ވަރަށް އަނދާފައިކަމަށް ފުލުހުން ބުނެއެވެ.

މިކަމާއި ގުޅިގެން ބަލަންޖެހޭ ކަންކަން ބަލަމުން އަންނަކަމަށް ފުލުހުން ބުނެއެވެ. އިތުރު ތަފްސީލެއް ފުލުހުން ހާމައެއްނުކުރެއެވެ.

މިކަމާއި ގުޅޭ އިތުރު ތަފްސީލު "ރާއްޖެ އެމްވީ" އަށް ދެއްވަމުން މުލަކު ކައުންސިލްގެ ރައީސް އަހުމަދު ޖަމާލު ވިދާޅުވީ ސައިކަލުގައި ރޯކޮށްލި ސީދާ ވަކި ސަބަބެއް އެނގިވަޑައިނުގަންނަވާކަމަށެވެ. އަދި ފުލުހުންނާއި ރައްޔިތުންނާ ދެމެދު ހިތްހަމަނުޖެހުމެއް އުޅޭކަމެއްވެސް ފާހަގަކުރެވިފައިނުވާކަމަށް ކައުންސިލުގެ ރައީސް ވިދާޅުވިއެވެ.

ރޯކޮށްލާފައިވަނީ މުލަކާއި ކައިރި ރަށެއްގެ ފުލުސް ސްޓޭޝަންގައި މަސައްކަތްކުރާ ފުލުހެއްގެ ސައިކަލުގައި ކަމަށާއި އެފުލުސް މީހާ މީގެ ކުރިން މުލަކުގައި މަސައްކަތްކުރި ކަމަށް އަހުމަދު ޖަމާލު ވިދާޅުވިއެވެ.

ރޯކޮށްލާފައިވާ ސައިކަލުގެ ފޮޓޯތަކެއް ސޯޝަލް މީޑިޔާގައި ދައުރުވަމުން އަންނައިރު ސައިކަލު އެއްކޮށް އަނދާއަޅިއަށްވެފައިވާތަން ފޮޓޯތަކުން ފެނެއެވެ.

މިއަހަރުގެ ކުރީކޮޅު ނ.މިލަދޫގައިވެސް ފުލުހެއްގެ ސައިކަލުގައި ރޯކޮށްލާފައިވެއެވެ. އެމައްސަލައާ ގުޅޭގޮތުން ފުލުހުން ބުނީ ނ.މިލަދޫގައި މަސްތުވާތަކެތީގެ ވިޔަފާރި ކުރަން އުޅުނު މީހަކު ހުއްޓުވުމުން ފުލުސް މީހާއަށް އިންޒާރު ދީފައިވާ ކަމަށެވެ. އަދި އޭގެ ފަހުން ފުލުސް މީހާގެ ސައިކަލުގައި ރޯކޮށްލާފައިވާއިރު، ސައިކަލް ވަނީ ބޭނުންނުކުރެވޭ ވަރަށް އަނދާފައެވެ.

ސައިކަލުގައި އަލިފާން ރޯކޮށްލާ މަންޒަރު ފެންނަ ވީޑިއޯއެއް ސޯޝަލް މީޑިޔާގައި އާންމުވިއެވެ.