ހުޅުލެ ފަރަށް އެރި އުޅަނދު ތިންލައްކަ ރުފިޔާއިން ޖޫރިމަނާކޮށްފި
ހުޅުލޭގެ ފަރަށް 02 ސެޕްޓެމްބަރު އުޅަނދު އެރުމާގުޅިގެން ފަރަށް ލިބުނު ގެއްލުންތައް ބެލުމުގެ ގޮތުން 10 ސެޕްޓެމްބަރ ގައި ވަނީ ސާވޭ ކޮށްފައި
ހުޅުލެ
"އެމްވީ ޗެން ގްލޯރީ 9" ނަމަކަށް ކިޔާ އުޅަނދެއް ހުޅުލޭ ފަރަށް އަރައި ލިބުނު ގެއްލުމާ ގުޅިގެން 365،000 ރުފިޔާއިން އެ އުޅަނދުގެ ވެރިފަރާތް ޖޫރިމަނާ ކޮށްފައިވާ ކަމަށް އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.
އެއިދާރާއިން ބުނީ ހުޅުލޭގެ ފަރަށް 02 ސެޕްޓެމްބަރުގައި އުޅަނދު އެރުމާގުޅިގެން ފަރަށް ލިބުނު ގެއްލުންތައް ބެލުމުގެ ގޮތުން އެ އުޅަނދުގެ ވެރިފަރާތުން ޢައްޔަންކުރި ސަރވެޔަރަކާއެކު، 10 ސެޕްޓެމްބަރު ގައި އެ އުޅަނދު ފަރަށް އެރި ސަރަޙައްދަށް ގޮސް ޖޮއިންޓް ސަރވޭއެއްވަނީ ކުރެވިފައިވާކަމަށެވެ.
އީޕީއޭން ކުރިއަށް ގެންދިޔަ ޖޮއިންޓް ސަރވޭއިން ފަރުގައި އެ އުޅަނދު ޖެހިފައިވާތީވެ، ފަރަށް ކޮންމެވެސް ވަރެއްގެ ގެއްލުންތަކެއް ލިބިފައިވާކަން ވަނީ ފާހަގަކުރެވިފައެވެ. މިގޮތުން، ހުޅުލޭގެ ފަރަށް ލިބިފައިވާ ގެއްލުން ތިމާވެއްޓަށް ދޭ ގެއްލުންތަކަށް ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދު ގެ ދަށުން ބެލިބެލުމުން ޖޫރިމަނާއަށް ކަނޑައެޅިފައިވާ ޢަދަދަކީ ތިންލައްކަ ފަސްދޮޅަސް ފަސްހާސް (365,000.00) ރުފިޔާކަމަށް އީޕީއޭން ބުނެއެވެ.
ޖޫރިމަނާގެ ފައިސާ، އީޕީއޭން އެދިފައިވާގޮތަށް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނަށް 13 ސެޕްޓެމްބަރު ގައި އެ އުޅަނދުގެ ލޯކަލް އެޖެންޓް (ގްރޭސް އެޓޯލް ޕްރައިވެޓް ލިމިޓެޑް) ގެ ފަރާތުން ވަނީ ދައްކާފައިކަމަށް އީޕީއޭން ބުނެއެވެ.
ފަރުތަކަށް އުޅަނދު އެރުމާއެކު ލިބޭ ގެއްލުން ބެލުމަށްފަހު އީޕީއޭން އަންނަނީ އެފަރާތްތައް ޖޫރިމަނާކުރަމުންނެވެ.
