ކުރިމަގުގައި ކުޅުންތެރިން ހޯދުމަށް ބޮޑު ޚަރަދެއް ނުކުރާނަން: މެންޗެސްޓަރ ޔުނައިޓެޑް

ކުރިއަށް ހުރި ޓްރާންސްފަރ ވިންޑޯތަކުގައި ކުޅުންތެރިން ހޯދުމަށް ބޮޑު ޚަރަދުތަކެއް ނުކުރާނެކަމަށް، މެންޗެސްޓަރ ޔުނައިޓެޑްގެ ފުޓްބޯޅަ ޑިރެކްޓަރު ޖޯން މާޓޯ ބުނެފިއެވެ.

މެންޗެސްޓަރ ޔުނައިޓެޑުން ވަނީ މިދިޔަ ސަމަރ ޓްރާންސްފަރ މާކެޓުގައި އަންދާޒާ ކުރިވަރަށްވުރެ ގިނަ ކުޅުންތެރިން ޓީމަށް ގެންގޮސްފައެވެ. މިދިޔަ ޓްރާންސްފަރ ވިންޑޯގައި ޔުނައިޓެޑުން ވަނީ އެންތަނީ, ކަސެމީރޯ, ކްރިސްޓަން އެރިކްސަން, ލިސަންޑްރޯ މާޓިނޭޒް އަދި ޓްރަޔަލް މަލާސިއާގެ ސޮއި ހޯދާފައެވެ. ޔުނައިޓެޑުން އަންދާޒާކުރިވަރަށްވުރެ ގިނަ ކުޅުންތެރިން ހޯދީ ޓީމުގެ އައު ކޯޗު އެރިކް ޓެން ހާގުގެ އެދުމަށެވެ.

ކްލަބުގެ މާލީ ހާލަތާއި ގުޅޭގޮތުން ބުރާސްފަތި ދުވަހު ވާހަކަދައްކަމުން ޖޯން ބުނީ، ނިމުނު ސަމަރ ޓްރާންސްފަރގައިވެސް ޕްލޭންކުރި ވަރަށްވުރެ މާ ބޮޑަށް ޚަރަދު ކުރެވިފައިވާ ކަމަށެވެ. އެހެންކަމުން ކުރިއަށް އޮތް ތަނުގައި ކްލަބަށް އައު ކުޅުންތެރިން ހޯދުމަށް އެފަދަ ބޮޑު ޚަރަދެއް ނުކުރާނެކަން ފާހަގަކޮށް ޖޯން ވަނީ، ސަޕޯޓަރުންގެ ފަރާތުންވެސް އެކަމަށް އުންމީދު ނުކުރުމަށް އެދިފައެވެ.

މީގެ އިތުރުން ޖޯން ވަނީ ޓެން ހާގް ޓީމާ ހަވާލުވެފައި ގެނައި ބަދަލުތަކަށް ތައުރީފުކޮށްފައެވެ. އޭނާ ބުނީ ޓެން ހާގް ޓީމާ ހަވާލުވިތާ ހަތަރު މަސް ވީއިރު ޓީމު އޮތީ ވަރަށް އެއްބައިވަންތަކަންމަތީގައި ކަމަށެވެ. އަދި ނަތީޖާތަކުންވެސް އެކަން ފެންނަކަން ޖޯން ފާހަގަކުރިއެވެ.

މި ސީޒަންގެ ޕްރިމިއަރ ލީގުގައި ޔުނައިޓެޑް ކުޅުނު ފުރަތަމަ ދެމެޗުން ވަނީ ބަލިވެފައެވެ. ނަމަވެސް އޭގެ ފަހުން ކުޅުނު ހަތަރު މެޗުވެސް އެޓީމުން ކާމިޔާބުކުރިއެވެ. މިދިޔަ ސީންގެ ދަށް ނަތީޖާގެ ސަބަބުން މި ސީޒަންގެ ޗެމްޕިއަންސް ލީގަށް ޔުނައިޓެޑް ކޮލިފައި ނުވެއެވެ.