އެންސްޕާގެ ޗީފް އެގްޒެކެޓިވް އޮފިސަރގެ މަގާމަށް މަރްޔަމް ޝަފީޤު
އެމަގާމަށް އޭނާ އައްޔަންކުރައްވާފައި ވަނީ ކުރިން އެ މަގާމު ފުރުއްވަމުންގެންދެވި އިސްމާޢީލް ޢައްޒާމް ވަޖީހު އިސްތިއުފާދެއްވާފައި ވާތީ
އެންސްޕާގެ ޗީފް އެގްޒެކެޓިވް އޮފިސަރގެ މަގާމަށް އައްޔަން ކުރެއްވި މަރްޔަމް ޝަފީޤު
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)ގެ ޗީފް އެގްޒެކެޓިވް އޮފިސަރގެ މަޤާމަށް މ. މާފުށީގެ، މަރްޔަމް ޝަފީޤު މިއަދު އައްޔަންކުރައްވައިފިއެވެ.
މަރްޔަމް ޝަފީޤު އެމަގާމަށް އައްޔަންކުރައްވާފައި ވަނީ ކުރިން އެ މަގާމު ފުރުއްވަމުން ގެންދެވި އިސްމާޢީލް ޢައްޒާމް ވަޖީހު އިސްތިއުފާދެއްވާފައި ވާތީއެވެ. މަރްޔަމް ޝަފީޤް ވަނީ ތައިލެންޑްގެ ޗުލަލޯންގކޯން ޔުނިވަރސިޓީން ހެލްތު އިކޮނޮމިކްސްގެ ދާއިރާއިން މާސްޓަރސް ޑިގްރީ ހާސިލްކުރައްވާފައެވެ.
މަރްޔަމް ޝަފީޤު މީގެ ކުރިންވެސް އެންސްޕާގެ ޗީފް އެގްޒެކެޓިވް އޮފިސަރުގެ މަގާމާއި އެ އިދާރާގެ އިސް މަގާމުތަކާއި، ސިއްހީ ދާއިރާއާއި އަދި ދައުލަތުގެ އެހެން ބައެއް އިދާރާތަކުގެ އިސް މަގާމުތައް ފުރުއްވާފައިވެއެވެ. އޭނާ އެންމެ ފަހުން ހުންނެވީ އާސަންދަ ކުންފުނީގެ މެނޭޖިންގ ޑިރެކްޓަރުގެ މަގާމުގައެވެ.
