ބައްދަލުވުމުގެ އޯޑިއޯ މަޖިލީހުގެ ޔޫޓިއުބް ޗެނަލުން ކުޑަ ވަގުތުކޮޅަކަށް ލައިވް ސްޓްރީމް ކުރެވުނީ ދިމާވި ޓެކްނިކަލް މައްސަލައަކާ ގުޅިގެން
ރައްޔިތުންގެ މަޖިލީހުގެ އިދާރާ
ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ)ގެ ބައްދަލުވުން ސިއްރު ކޮށްފައިވަނިކޮށް އެބައްދަލުވުމުގައި ހިނގާ ދިޔަ ކަންތައްތައް މީޑިޔާތަކުން ގެނެސްދީފައިވާތީ އެޚަބަރު ނެގުމަށް މަޖިލީހުގެ އިދާރާއިން މީޑިއާތަކަށް އަންގައިފިއެވެ.
ބުދަ ދުވަހު ކުރިޔަށްދިޔަ 241 ކޮމިޓީއަށް ހާޒިރުކޮށްފައިވަނީ ހޯމް މިނިސްޓަރ އިމްރާން އަބްދުﷲއެވެ. މިކަމާއި ގުޅިގެން މަޖިލީހުގެ އިދާރާއިން ނެރުނު ނޫސް ބަޔާނެއްގައި ބުނެފައިވަނީ 241 ކޮމިޓީގެ ބައްދަލުވުމަކީ ސިއްރު ބައްދަލުވުމެއް ކަމަށް ކޮމިޓީން ނިންމި ކަމަށެވެ. އެގޮތަށް ނިންމާފައި ވަނިކޮށް ބައްދަލުވުމުގެ އޯޑިއޯ މަޖިލީހުގެ ޔޫޓިއުބް ޗެނަލުން ކުޑަ ވަގުތުކޮޅަކަށް ލައިވް ސްޓްރީމް ކުރެވުނީ ދިމާވި ޓެކްނިކަލް މައްސަލައަކާ ގުޅިގެން ކަމަށެވެ.
ހޯމް މިނިސްޓަރާ ސުވާލުކޮށްފައިވަނީ ފުލުހުންގެ ހިދުމަތުގެ ގާނޫނުގެ ދަށުން ވަކި މުއްދަތެއްގެ ތެރޭގައި ހަދަންޖެހޭ ގަވައިދުތަކެއް ހަދާފައި ނުވާތީއެވެ. ގާނޫނުގައި ފުލުހުންގެ މަސައްކަތްތަކާ ގުޅޭ ގަވާއިދުތައް ގާނޫނަށް އަމަލުކުރަން ފަށާތާ ހަމަސް ތެރޭގައި އެކުލަވާލާ ގެޒެޓް ކުރަން ބުނެފައިވެއެވެ. ކޮމިޝަނަ އޮފް ޕޮލިސްގެ ލަފާގެ މަތިން ގަވައިދުތައް ހަދަންޖެހެނީ ހޯމް މިނިސްޓަރެވެ.
